​មុខ​សញ្ញា​បាញ់បោះជាង ​២០​គ្រាប់​ ចូលខ្លួន​សារភាព​​ថ្ងៃ​កើតហេតុ​

បាត់ដំបង៖ ជនសង្ស័យដែលបានប្រើប្រាស់កាំភ្លើង AK-47 (ស្វ័យបត់) បាញ់បោះ​ទាំងយប់អស់ជាង២០គ្រាប់ ត្រូវសមត្ថកិច្ចនាំខ្លួនយកមកបានហើយ ដើម្បីបញ្ជូនទៅតុលាការ។

លោក ម៉ែន រីម អធិការនគរបាលស្រុកសំឡូតបានបញ្ជាក់ថា នៅ ព្រឹកថ្ងៃទី១០ ខែធ្នូ ឆ្នាំ២០២១ កម្លាំងជំនាញ បានសហការជាមួយកម្លាំងអន្តរាគមន៍ស្រុក និងកម្លាំងប៉ុស្តិ៍នគរបាលរដ្ឋបាលតាសាញ ឃាត់ខ្លួនជនសង្ស័យឈ្មោះ សុខ គង់ ភេទប្រុស អាយុ៥៤ឆ្នាំ រស់នៅ ភូមិអូរស្ងួត ឃុំតាសាញ ស្រុកសំឡូត ខេត្តបាត់ដំបង បន្ទាប់ប្រើវិធីសាស្ត្រ​លួងលោម​។

លោកអធិការបានបន្តថា ជនសង្ស័យបានប្រើកាំភ្លើងAK47បាញ់ឡើងទៅ លើមេឃចំនួន២១គ្រាប់ កាលពីថ្ងៃទី០៦ ខែធ្នូ ឆ្នាំ២០២១ វេលាម៉ោងប្រហែល២០ និង០០នាទី ព្រមទាំងបានរត់គេចខ្លួន នាំទាំងអាវុធទៅ ជាមួយនោះ ត្រូវ​បាន​នាំ​យក​​ទៅ​ សាកសួរនៅ អធិការដ្ឋាននគរបាលស្រុក ហើយក៏កំពុងរៀបចំសំណុំរឿងបញ្ជូនទៅ ការិយាល័យជំនាញខេត្តតាមនីតិវិធីដែរ។

 ជនសង្ស័យរូបនេះបានសារភាពថា នៅយប់នោះខ្លួនបានផឹកស្រាអស់ប្រហែល ៥ កំប៉ុង ហើយ​នៅ ពេលនោះ​ហាក់បីដូចជាកម្រោលចូល បានស្ទុះទៅ ទាញកាំភ្លើងដែលខ្លួនលាក់ទុកយូរហើយ មកបាញ់ឡើងលើចំនួន ៣ គ្រាប់ រួចក៏បានប្តូរសោកាំភ្លើងទាញកៃបានតែ២ដងប៉ុណ្ណោះ គ្រាប់ដែលមានក្នុងបង់សរុប២១គ្រាប់ បានផ្ទុះចេញទាំងអស់តែម្តង ដោយពេលភ្ញាក់ខ្លួនឡើងមានអារម្មណ៍ភ័យពេកក៏រត់គេចតែម្តង។

ទីបំផុតសមត្ថកិច្ចចាប់ខ្លួន ពាក់ព័ន្ធនិងការលាក់អាវុធខុសច្បាប់ និងប្រើប្រាស់អាវុធខុសច្បាប់ ដោយសារតែកូនស្រីពៅទាក់ទងទៅខ្លួនដែលជាឪពុកអោយចេញមកសារភាព៕

អត្ថបទ៖សោ និយមរ័ត្ន