ទុស្សេចរន្តអគ្គីសនី ឆេះផ្ទះរួមទាំងសម្ភារៈមួយចំនួនធំ នៅខេត្តតាកែវ

ខេត្តតាកែវ៖ អគ្គិភ័យ​បណ្ដាលឱ្យផ្ទះមួយខ្នងរួមទាំងសម្ភារៈ ថវិកាមួយចំនួនធំត្រូវបានភ្លើងលេបត្របាក់អស់គ្មានសល់ នៅ រសៀលថ្ងៃទី១៤ ខែធ្នូ ឆ្នាំ២០២១ នេះ។

អគ្គីភ័យឆេះផ្ទះប្រជាពលរដ្ឋនេះ ស្ថិតនៅ ក្នុងភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ ដែលម្ចាស់មានឈ្មោះ សេង ហួរ ភេទប្រុស អាយុ ៥៤ ឆ្នាំ។ អគ្គិភ័យខាងលើ ធ្វើឱ្យខាតបង់ផ្ទះធ្វើពីឈើប្រក់ក្បឿង ទំហំ ៦ ម៉ែត្រ គុណ ៧ ម៉ែត្រ។

ក្នុងហេតុការណ៍នេះ កម្លាំងជំនាញការិយាល័យបង្ការពន្លត់អគ្គីភ័យនៃស្នងការនគរបាលខេត្តតាកែវ សហការជាមួយកម្លាំងអធិការដ្ឋាននគរបាលស្រុកត្រាំកក់ បានប្រើប្រាស់រថយន្តពន្លត់អគ្គិភ័យចំនួន ៣ គ្រឿង ដោយប្រើប្រាស់ទឹកអស់ចំនួន ៤ ឡាន ទើបគ្រប់គ្រងអគ្គីភ័យបានទាំងស្រុង និងមិនរាលដាលដល់ផ្ទះអ្នកដទៃ។ ចំពោះមូលហេតុនៃការឆេះនេះ សមត្ថកិច្ចបានបញ្ជាក់ថា បណ្តាលមកពីឆ្លងចរន្តអគ្គិសនី។

សូមបញ្ជាក់ថា អគ្គីភ័យនេះបណ្តាលឱ្យឆេះផ្ទះខាងលើស្ទើរទាំងស្រុង និងខូចខាតទ្រព្យសម្បត្តិ សម្ភារៈមួយចំនួន តែមិនបណ្តាលឱ្យរងរបួសដល់មនុស្សឡើយ៕

អត្ថបទ៖ វីរៈ