មន្ត្រីអគ្គិសនីខេត្ត បើកបរទាំងស្រវឹង បុករថយន្តដឹកដីខ្សាច់ពេញទំហឹង សំណាងមិនប៉ះពាល់ជីវិត

ខេត្តរតនគិរី៖ មន្ត្រីអគ្គិសនីខេត្ត បើកបរទាំងស្រវឹង បុករថយន្តដឹកដីខ្សាច់ពេញទំហឹង ក្នុងទិសដៅ ស្របគ្នា បណ្តាលឱ្យរងការខូចខាតមួយចំហៀងផ្នែកខាងមុខ សំណាងមិនប៉ះពាល់ជីវិត។ ករណីគ្រោះថ្នាក់ចរាចរណ៍នេះ បានកើតឡើងនៅ យប់ ថ្ងៃទី ១៦ ខែឆ្នូ ឆ្នាំ ២០២១ ត្រង់ចំណុចចម្ការចន្ទី ឈ្មោះ កានីន យ៉ុម (ទួលកៅ ស៊ូចាស់) ស្តិតនៅ ក្នុងភូមិថារ៉ងស្វាយ ឃុំអូរជុំ ស្រុកអូរជុំ។

ទាក់ទិនករណីគ្រោះថ្នាក់ចរាចរណ៍ខាងលើនេះ “កម្ពុជាថ្មី” មិនអាចទាក់ទង លោក ហុង គឹមសេង អធិការនគរបាលស្រុកអូរជុំ បានទេ នៅ ព្រឹកថ្ងៃទី ១៧ ខែធ្នូនេះ។

យោងតាមរបាយការណ៍ពីនគរបាលស្រុកអូរជុំ បានឱ្យដឹងថា បន្ទាប់ពីទទួលបានព័ត៌មាន កម្លាំងជំនាញនៃអធិការ និងកម្លាំងនគរបាលប៉ុស្តិ៍រដ្ឋបាល បានចុះដល់កន្លែងកើតហេតុ ឃើញរថយន្ត ២ គ្រឿង មួយជារថយន្តម៉ាក Mazda ពណ៌ប្រផេះ ពាក់ស្លាកលេខរដ្ឋ 13.2-1082 បើកបរដោយឈ្មោះ មឿង ផល្លី អាយុ ៥៥ ឆ្នាំ ជនជាតិខ្មែរ មុខរបរបុគ្គលិកអគ្គិសនី មានទីលំនៅ បច្ចុប្បន្នភូមិភ្នំស្វាយ សង្គាត់បឹងកន្សែង ក្រុងបានលុង ខេត្តរតនគិរី។

មួយទៀត ជារថយន្តដឹកដីខ្សាច់ម៉ាក ហ៉ីយ៉ាន់ដាយ ក្បាលពណ៌ប្រផេះ ពាក់ស្លាកលេខ ភ្នំពេញ 3C-2007 បើកបរដោយឈ្មោះ អូន លាងទ្រី ភេទប្រុស អាយុ ២៨ ឆ្នាំ ជនជាតិខ្មែរ មានទីលំនៅ បច្ចុប្បន្នភូមិ៤ សង្កាត់កាចាញ ក្រុងបានលុង ខេត្តរតនគិរី។

របាយការណ៍បានបញ្ជាក់ថា រថយន្តទាំង ២ គ្រឿងនោះ បើកបរក្នុងទិសដៅ ស្របគ្នា ពីជើងទៅ ត្បូង។ មូលហេតុ អ្នកបើកបររយន្តម៉ាក Mazda បើកបរក្នុងស្ថានភាពស្រវឹង ជ្រុលចង្កូតទៅ បុកគូថរថយន្តដឹកដីខ្សាច់ពីក្រោយពេញទំហឹង។

ក្រោយសមត្ថកិច្ចចុះត្រួតពិនិត្យរួច រថយន្តទាំង ២ គ្រឿង ត្រូវបានយកមករក្សាទុកនៅ អធិការដ្ថានគរបាល ស្រុកអូរជុំ ដើម្បីរង់ចាំធ្វើការសម្របសម្រួលតាមនីតិវិធី៕

អត្ថបទ៖ វុទ្ធឦសាន