សន្តិសុខសង្គម

ចាប់បានហើយ ក្រុមចោរឆក់បណ្ដាលឲ្យស្ត្រីមា្នក់ស្លាប់នៅខណ្ឌពោធិ៍សែនជ័យ

បានផុស

៤ years មុន

នៅ

ថ្ងៃសៅរ៍ ២៩ មករា ២០២២

ដោយ

ដោយមានការយកចិត្តទុកដាក់ពីលោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ បានដឹកនាំកម្លាំងជំនាញព្រហ្មទណ្ឌបើកការស្រាវជ្រាវបង្ក្រាបមុខសញ្ញាឆក់ កាលពីវេលាម៉ោង១និង៤០នាទីរំលងអាធ្រាត្រ ឈានចូលថ្ងៃទី២៩ ខែមករា ឆ្នាំ២០២២ ឃាត់ខ្លួនជនសង្ស័យម្នាក់ជាមុខសញ្ញាឆក់។

ជនសង្ស័យឈ្មោះ ជុំ សុខបញ្ញា ភេទប្រុស អាយុ១៨ឆ្នាំ មុខរបរសិស្ស ស្នាក់នៅភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ ។ ដែលជាមុខសញ្ញាឆក់បណ្តាលឲ្យស្ត្រីម្នាក់ដួលបោកក្បាលស្លាប់ ក្រោយពេលបញ្ជូនទៅសង្គ្រោះនៅមន្ទីរពេទ្យរយៈពេល៤ថ្ងៃ កន្លងទៅ។

តាមចម្លើយសារភាពរបស់ជនសង្ស័យ បានប្រាប់សមត្ថកិច្ចថា រូបគេពិតជាបានធ្វើសកម្មភាព ឆក់យកកាបូបក្រវ៉ាត់ចង្កេះ ពីស្ត្រីរងគ្រោះពិតប្រាកដមែន។

ជនសង្ស័យសមត្ថកិច្ចកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅកាន់តុលាការចាត់ការបន្តតាមនីតិវិធី ។

សូមបញ្ជាក់ថា កាលពីថ្ងៃទី១៥ ខែមករា ឆ្នាំ២០២២ នៅវេលាម៉ោង៩និង៣០នាទីព្រឹក មានករណីជនសង្ស័យបានជិះម៉ូតូឆក់យកកាបូបក្រវ៉ាត់ចង្កេះពីស្ត្រីម្នាក់ឈ្មោះ អ៊ុក កាន់នីកា អាយុ៤១ឆ្នាំ នៅចំណុចមុខអាកាសយាន្ដដ្ឋានអន្តរជាតិភ្នំពេញ នៅតាមបណ្តោយផ្លូវសហព័ន្ធរុស្សី សង្កាត់កាកាបទី១ ខណ្ឌពោធិ៍សែនជ័យ ហើយជនរងគ្រោះបានដួលបោកក្បាលទៅនឹងថ្នល់ បណ្តាលឲ្យរងរបួសធ្ងន់ ត្រូវបានក្រុមគ្រួសារដឹកយកទៅធ្វើការសង្គ្រោះបន្ទាន់នៅមន្ទីរពេទ្យលោកសង្ឃ តែជាអកុសលនៅព្រឹកថ្ងៃទី១៩ ខែមករា ឆ្នាំ២០២២ ស្ត្រីរងគ្រោះបានបាត់បង់ជីវិត៕

អត្ថបទ៖ រ៉ាវុទ្ធ