នគរបាលខេត្តបន្ទាយមានជ័យចាប់ខ្លួនជនសង្ស័យប្រុសស្រី៨នាក់ ពាក់ព័ន្ធករណីលួច និងទទួលផលចោរកម្ម

កម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី៣០ ខែមីនា ឆ្នាំ២០២៦នេះ បានសហការជាមួយកម្លាំងអធិការដ្ឋាននគរបាលក្រុងប៉ោយប៉ែត ចុះស្រាវជ្រាវ និងបានឃាត់ខ្លួនជនសង្ស័យប្រុសស្រីទាំង៨នាក់ ដកហូតវត្ថុតាងមួយចំនួនពាក់ព័ន្ធករណីលួច និងទទួលផលចោរកម្ម។

លោកវរសេនីយ៍ឯក ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ការឃាត់ខ្លួនជនសង្ស័យប្រុស ស្រី ទាំងនាក់នេះ ធ្វើឡើងក្រោមការបញ្ជាផ្ទាល់ពីលោកឧត្ដមសេនីយ៍ត្រី សឿម សារិទ្ធ ស្នងការខេត្ត ដោយកម្លាំងនគរបាលព្រហ្មទណ្ឌកម្រិតធ្ងន់ សហការជាមួយកម្លាំងអធិការដ្ឋាននគរបាលក្រុងប៉ោយប៉ែត និងបានដកហូតវត្ថុតាង ម៉ូតូម៉ាកស្កុបពី ពណ៌ទឹកក្រូច ចំនួន០១គ្រឿង គ្មានស្លាកលេខ(ម៉ូតូជនរងគ្រោះ) និងម៉ូតូម៉ាកC១២៥ ពណ៌ខ្មៅ អត់ស្លាកលេខចំនួន០១គ្រឿង។

លោកវរសេនីយ៍ឯក បានឲ្យដឹងថា នៅចំពោះមុខសមត្ថកិច្ច ជនសង្ស័យទាំង០៨នាក់បានឆ្លើយសារភាពថា ពួកគេពិតជាបានប្រព្រឹត្តបទល្មើសលួចមានស្ថានទម្ងន់ទោស ចែកចាយ និងប្រើប្រាស់ថ្នាំញៀនពិតប្រាកដមែន។ ក្រោយសួរនាំ ម៉ូតូត្រូវបានប្រគល់ជូនជនរងគ្រោះវិញ រីឯជនសង្ស័យទាំងនេះ ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការបន្តតាមនីតិវិធី៕

អត្ថបទ៖ អពៅ