សន្តិសុខសង្គម

បុរសម្នាក់បាត់ពីផ្ទះ ៩ ថ្ងៃ ស្រាប់តែប្រទះឃើញដេកស្លាប់នៅបាតជ្រោះ

បានផុស

១២ ខែ មុន

នៅ

ថ្ងៃអាទិត្យ ៦ កុម្ភៈ ២០២២

ដោយ

បុរសម្នាក់បានចាកចេញបាត់ពីផ្ទះរយៈពេល ៩ថ្ងៃ សាច់ញាតិដើររកគ្រប់ទីកន្លែង ប៉ុន្តែរកមិនឃើញសោះ ត្រូវបានប្រជាពលរដ្ឋប្រទះឃើញដេកស្លាប់នៅក្នុងព្រៃហើមស្អុយរលួយមើលមិនយល់។ហេតុការណ៍នេះបានកើតឡើង កាលពីថ្ងៃទី ៥ ខែកុម្ភៈ ឆ្នាំ ២០២២ វេលាម៉ោង ១៩ និង ៣០ នាទី នៅចំណុចភូមិថ្មី សង្កាត់ឡាបានសៀក ក្រុងបានលុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា បន្ទាប់ពីទទួលបានព័ត៌មានពីប្រជាពលរដ្ឋបានរាយការណ៍ភ្លាម កម្លាំងប៉ុស្តិ៍ សហការជាមួយកម្លាំងជំនាញការិយាល័យបច្ចេកទេសវិទ្យាសាស្ត្រ បានចុះទៅដល់កន្លែងកើតហេតុ ធ្វើកោសល្យវិច័យទៅលើដងខ្លួនសពពុំមានស្លាកស្នាមអ្វីគួរឲ្យកត់សំគាល់នោះឡើយ។

សមត្ថកិច្ចបានបញ្ជាក់ទៀតថា យោងទៅតាមការបំភ្លឺរបស់គ្រួសារជនរងគ្រោះថា ជនរងគ្រោះបានដើរបាត់ពីផ្ទះកាលពីថ្ងៃទី ២៨ ខែមករា ឆ្នាំ ២០២២ ជនរងគ្រោះជាមនុស្សគរ ហើយមានសតិមិនគ្រប់ តែងតែដើរចេញពីផ្ទះមកវត្តភូមិថ្មី ដោយសារជនរងគ្រោះមានកូនបួសជាព្រះសង្ឃ។ សពមានសភាពស្អុយរលួយ ស្លាប់នៅបាតជ្រោះចាប់តាំងពីថ្ងៃបាត់ខ្លួនរហូតដល់ប្រទះឃើញសពមានរយះពេល៩ថ្ងៃមកហើយនោះ។

សមត្ថកិច្ចបានសន្និដ្ឋានថា ផ្អែកតាមការពិនិត្យសពជនរងគ្រោះខាងលើនេះ ពិតជាស្លាប់ដោយសារខ្យល់គរពិតប្រាកដមែន មិនមែនជារឿងឃាតកម្មនោះទេ។ បច្ចុប្បន្នសព ត្រូវបានក្រុមការងារបច្ចេកទេសវិទ្យាសាស្ត្រពិនិត្យរួច និងបានប្រគល់សពជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕

អត្ថបទ៖ វុទ្ធឦសាន

Related Topics:ករណីដេកស្លាប់