ប្រទះឃើញបុរសពីរនាក់ស្លាប់ក្នុងអណ្ដូងជម្រៅជាង​៦ម៉ែត្រ

សពបុរសពីរនាក់ពូ និងក្មួយត្រូវបានសាច់ញាតិប្រទះឃើញដេកស្លាប់ក្នុងដណ្ដូងជម្រៅ៦ម៉ែត្រកន្លះ នៅចំណុចវាលស្រែកចម្ងាយ១.៧០០ម៉ែត្រ ពីផ្ទះអ្នកភូមិ។ ការប្រទះឃើញសពជនរងគ្រោះទាំងពីរនាក់នេះ គឺនៅម៉ោង៩យប់ ថ្ងៃទី១ ខែសីហា ឆ្នាំ២០២៣ នៅចំណុចវាលស្រែ ក្នុងភូមិស្គាក្តី ឃុំព្នៅទី២ ស្រុកស៊ីធរកណ្តាល ខេត្តព្រៃវែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ស្នងការដ្ឋាននគរបាលខេត្តព្រៃវែងបានឲ្យដឹងថា ជនរងគ្រោះមានឈ្មោះ ជ្រឿន ដេន ភេទប្រុស អាយុ៤៣ឆ្នាំ ឈ្មោះ ធន់ សារ៉េន ភេទប្រុស អាយុ៥៤ឆ្នាំ។ ជនរងគ្រោះទាំង២ មានទីលំនៅ នៅភូមិ-ឃុំកើតហេតុ។

តាមការបំភ្លឺរបស់ប្រពន្ធជនរងគ្រោះទាំង២នាក់បានឱ្យនគបាលដឹងថា មុនពេលកើតហេតុ ជនរងគ្រោះទាំង២នាក់បានទៅជីកអណ្តូងឱ្យឈ្មោះ អ៊ន អ៊ាប នៅវាលស្រែខាងលិចភូមិតាំងពីម៉ោងប្រហែល៣រសៀល រហូតដល់ម៉ោងប្រហែល​៩យប់មិនឃើញត្រឡប់មកផ្ទះវិញ ក៏ប្រើកូន និងក្មួយៗទៅតាម ពេលទៅដល់កន្លែងជីកអណ្ដូង ក៏ឃើញជនរងគ្រោះទាំង២នាក់ ដេកស្លាប់ក្នុងអណ្តូងបាត់ទៅហើយ។

តាមការធ្វើកោសល្យវិច័យបង្ហាញថា សពរងគ្រោះទាំង២នាក់ស្លាប់ដោយសារខ្វះខ្យល់អុកស៊ីសែន (ស្លាប់ដោយខ្លួនឯង) ដោយមិនមានស្លាកស្នាម ឬរបួសអ្វីគួរឱ្យកត់សម្គាល់ហើយ៕

អត្ថបទ៖ សុខុម