អគ្គិភ័យឆេះអាហារដ្ឋាន​យីហោ«​ដីដុះ»ទាំងព្រឹកនៅក្រុងតាខ្មៅ

អាហារដ្ឋានមួយកន្លែងដែលមានស្លាកយីហោ «ដីដុះ» ត្រូវបានអគ្គិភ័យឆាបឆេះទាំងព្រឹកបណ្ដាលឲ្យខូចខាតសម្ភារៈមួយចំនួនធំ ដោយសារធ្លាយធុងហ្គាស។

ករណីអគ្គិភ័យនេះ បានកើតឡើងកាលពីវេលាម៉ោង០៥និង៣០​នាទីព្រឹក ថ្ងៃទី១៨ ខែមីនា ឆ្នាំ២០២២ នៅចំណុចអាហារដ្ឋាន​យីហោ«​ដីដុះ» ​ស្ថិតនៅភូមិតាខ្មៅ២​ សង្កាត់តាខ្មៅ​ ក្រុងតាខ្មៅ​ ខេត្តកណ្តាល។

យោងតាមរបាយការណ៍សមត្ថកិច្ចបានឲ្យដឹងថា ទីតាំងដែលត្រូវអគ្គិភ័យឆាបឆេះមានទំហំ​១២x១៦​ ម៉ែត្រ​ មានម្ចាស់ឈ្មោះ ម៉ុន មីស៊ីល ភេទ​ប្រុស​ អាយុ​៣៥​ឆ្នាំ មានទីលំនៅសង្កាត់​ស្ទឹងមានជ័យ ខណ្ឌមានជ័យ​ រាជធានីភ្នំពេញ​ ។

សមត្ថកិច្ចបានបញ្ជាក់ថា ក្នុងករណីអគ្គិភ័យនេះ បណ្ដាលឲ្យខូចខាតសម្ភារៈមួយចំនួនរួមមាន៖ ម៉ាស៊ីនត្រជាក់ចំនួន០៤គ្រឿង ទូរទស្សន៍ចំនួន០១​គ្រឿង ចង្គ្រានហ្គាស ចំនួន០២​គ្រឿង កង្ហាបញ្ឈរ ចំនួន០៥​ គ្រឿង កៅអីសាឡុង ចំនួន០៥ឈុត តែមិនបណ្តាលអោយគ្រោះថ្នាក់ដល់មនុស្សឡើយ។

ក្នុងប្រតិបត្តិការជួយអន្តរាគមន៍ កងកម្លាំងបង្ការ​ពន្លត់​អគ្គិភ័យ​និង​សង្គ្រោះ​ បាន​ប្រើប្រាស់​រថយន្តពន្លត់អគ្គីភ័យចំនួន​០៤គ្រឿង​ ប្រើប្រាស់ទឹកអស់​ចំនួន​០៤​រថយន្ត​ ទើបគ្រប់គ្រងស្ថានការណ៍បានទាំងស្រុងនៅវេលាម៉ោង​០៦និង៤៧​នាទីព្រឹក ថ្ងៃដដែល៕

អត្ថបទ៖ សុខុម