សម្ដេចតេជោ ហ៊ុន សែន អំពាវនាវឲ្យកូរ៉េផ្ទេរបច្ចេកវិទ្យាព្យាបាលមកឲ្យគ្រូពេទ្យកម្ពុជា ដើម្បីទទួលបានចំណេះដឹងបន្ថែម

មានប្រសាសន៏នៅក្នុងពិធីសម្ពោធដាក់ដំណើរការជាផ្លូវការនូវអគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ នាព្រឹកថ្ងៃចន្ទ ទី២៨ ខែមីនា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានមានប្រសាសន៏ថា នេះគឺជាសមិទ្ធផលថ្មីមួយទៀត ដែលជាផ្លែផ្កា នៃចំណងទាក់ទងរវាងកម្ពុជា និងសាធារណរដ្ឋកូរ៉េ ហើយការសម្ពោធដាក់ឱ្យប្រើប្រាស់មន្ទីរពេទ្យនេះ គឺបង្ហាញអំពីការយកចិត្តទុកដាក់របស់រាជរដ្ឋាភិបាលកម្ពុជាក្នុងទំនាក់ទំនងជាមួយដៃគូអភិវឌ្ឍ ដើម្បីនាំមុខនូវឯកទេសនានាសម្រាប់បម្រើសេចក្តីត្រូវការរបស់ប្រជាជនកម្ពុជា។

បើតាមសម្ដេចតេជោហ៊ុន សែន នៅពេលនេះ កម្ពុជាមានឯកទេសច្រមុះ បំពង់ក ព្រមទាំងត្រចៀក ហើយខាងមុខនឹងមានឯកទេសផ្នែកចក្ខុរោគថែមទៀត ដូច្នេះនៅទីនេះ មាន៤ ឯកទេសបន្ថែមទៀត សម្រាប់ការព្យាបាលនៅមន្ទីរពេទ្យអង្គឌួង ក៏ដូចជានៅក្នុងប្រទេសកម្ពុជា។ សម្តេចតេជោអះអាងថា ពិតមែនហើយថា អ្នកដែលមានថវិកា គេអាចស្វែងរកការព្យាបាលនៅទីកន្លែងផ្សេងៗ ប៉ុន្តែអ្នកដែលមានប្រាក់តិចអាចព្យាបាលនៅទីនេះ។

ប្រមុខ​រដ្ឋាភិបាល​បាន​បញ្ជាក់នៅក្នុងទំនាក់ទំនងរយៈពេល២៥ឆ្នាំរវាងកម្ពុជា និងកូរ៉េនេះ បាននាំទៅដល់ការអនុវត្តគម្រោងជាច្រើន ដែលមានរហូតទៅដល់៨១គម្រោង ក្នុងនោះមានវិស័យសុខាភិបាល អប់រំ ដឹកជញ្ជូន វប្បធម៌ បច្ចេកវិទ្យាព័ត៌មាន និងទំនាក់ទំនង។ នេះហើយដែលជាផ្លែផ្កានៃទំនាក់ទំនងរវាងកម្ពុជា និងកូរ៉េ។

ក្នុងឋានៈជាអ្នកនាំមុខ និងជាស្ថាបនិក នៃទំនាក់ទំនងកម្ពុជាជាមួយសាធារណរដ្ឋកូរ៉េ សម្ដេចតេជោ ហ៊ុន សែន លើកឡើងថា “ខ្ញុំពិតជាមានមោទនភាព ដោយសារតែយើងចាប់ជ្រើសរើសយកនយោបាយការទូតបានត្រឹមត្រូវ ហើយយើងបានថែរក្សានូវទំនាក់ទំនងនេះរហូតមកដល់ពេលនេះ។ នេះមិនមែនគ្រាន់តែជាបញ្ហាកម្ចី ឬប្រាក់ជំនួយនោះទេ ប៉ុន្តែពាក់ព័ន្ធនឹងគ្រប់វិស័យទាំងអស់ ទាំងនយោបាយ ការទូត សេដ្ឋកិច្ច សង្គម វប្បធម៌ ដែលយើងត្រូវធ្វើទំនាក់ទំនងនៅគ្រប់ប្រទេសទាំងអស់ដោយគ្មានការរើសអើងនយោបាយ។

សម្ដេចតេជោ ហ៊ុន សែន បញ្ជាក់ទៀតថា “ខ្ញុំសប្បាយរីករាយ ដោយសារតែអ្វីៗនៅទីនេះបានបំរើនូវផលប្រយោជន៍ផ្ទាល់របស់ប្រជាជនរបស់យើង”។ សម្តេចថា ជនជាតិកូរ៉េ ពិតជាមិនមកព្យាបាលនៅទីនេះទេ លើកលែងតែករណីចាំបាច់មួយចំនួនសម្រាប់អ្នកវិនិយោគ ឬជនជាតិកូរ៉េ ដែលធ្វើការនៅកម្ពុជាតែប៉ុណ្ណោះ ដែលអាចមកពិនិត្យព្យាបាលនៅទីនេះ ប៉ុន្តែអ្នកដែលទទួលផលប្រយោជន៍ពិតប្រាកដ គឺជនជាតិកម្ពុជារបស់យើងតែម្ដង។

ជាមួយគ្នានោះ សម្ដេចតេជោ ហ៊ុន សែន ក្នុងនាមរាជរដ្ឋាភិបាលកម្ពុជា បានអំពាវនាវឲ្យផ្ទេរនូវបច្ចេកវិទ្យាទាំងឡាយ ដែលកូរ៉េមាន មកដល់គ្រូពេទ្យកម្ពុជា ដើម្បីទទួលបាននូវចំណេះដឹងបន្ថែមទៀត៕

អត្ថបទ៖ កោះកែវ