Update ៖ មន្ត្រីសាលាស្រុកដែលត្រូវក្រពើខាំបានស្លាប់ហើយ

មន្ត្រីសាលាស្រុកពួក ម្នាក់ ដែលបានដើរទៅបត់ជើងតូចរអិលធ្លាក់ចូលអាងក្រពើ ត្រូវក្រពើខាំបោករងរបួសធ្ងន់
ហើយ ត្រូវបានគ្រួសារដឹកបញ្ជូនទៅព្យាបាលនៅមន្ទីរពេទ្យនោះបានស្លាប់ហើយ ដោយសាររបួសធ្ងន់ធ្ងរពេក ទើបគ្រូពេទ្យអស់លទ្ធភាពក្នុងការព្យាបាល។

សូមរម្លឹកថា នៅវេលាម៉ោង១និង០០នាទីយប់អាធ្រាត្រថ្ងៃទី១៨ ខែមេសា ឆ្នាំ២០២២ ក្នុងភូមិកំពង់តាយ៉ង ឃុំពួក ស្រុកពួក ជនរងគ្រោះឈ្មោះ ស៊ូ សុធា ភេទប្រុស អាយុ៣៧ឆ្នាំ រស់នៅភូមិឃុំកើតហេតុ មុខរបរមន្ត្រីរដ្ឋបាលសាលាស្រុកពួក ត្រូវបានសត្វក្រពើខាំរងរបួសជាច្រើនកន្លែងដឹកយកទៅសង្គ្រោះនៅមន្ទីរពេទ្យបង្អែកខេត្តសៀមរាបហើយដោយសភាព ធ្ងន់ពេកក៏ត្រូវបានគ្រួសារដឹកទៅព្យាបាលនៅមន្ទីរពេទ្យកាល់ម៉ែតក្រុងភ្នំពេញ។

បន្ទាប់ពីមានការភ្ញាក់ផ្អើលមកកម្លាំងសមត្ថកិច្ចបានចុះទៅដល់កន្លែងកើតហេតុ រួចសួរនាំក្រុមគ្រួសារជនរងគ្រោះបានរៀបរាប់ឲ្យដឹងថា ជាប្រចាំជនរងគ្រោះ ជាប្តី ឈ្មោះ (ស៊ូសុធា) ជាអ្នក មើលថែទាំការចិញ្ចឹមសត្វក្រពើនិងដេកចងអង្រឹងនៅលើរោងទ្រុងក្រពើតែម្នាក់ឯង។

នៅល្ងាចថ្ងៃទី១៧ ខែមេសា ឆ្នាំ២០២២ ជនរងគ្រោះនិងក្រុមគ្រួសារជួបជុំគ្នាផឹកស្រា អស់ស្រាបៀរចំនួន១កេសហើយ បែកគ្នាទៅដេករៀងៗខ្លួន។ ចំណែកជនរងគ្រោះបានឡើងទៅដេកនៅរោងលើទ្រុងក្រពើលុះនៅម៉ោងចន្លោះ០១និង០០​នាទី​យប់ អាធ្រាត ក៏បានលឺសំលែង ជនរងគ្រោះស្រែកឲ្យជួយហើយលឺដល់អ្នកផ្ទះជិតខាងនិងអ្នកផ្ទះ ក៏ នាំគ្នាក្រោកទៅមើល នៅចំណុចរោងដេកលើទ្រុងក្រពើបានឃើញជនរង គ្រោះធ្លាក់ចូលក្នុងអាងទឹកក្រពើ ត្រូវបានសត្វក្រពើខាំ​បោក​ទាញហើយនាំគ្នាយកឈើជួយវាយក្រពើដើម្បីសង្គ្រោះ ដើម្បីយកជនរងគ្រោះដឹកទៅសង្គ្រោះនៅមន្ទីរពេទ្យ។

សមត្ថកិច្ចបានឲ្យដឹងថាទ្រុងចិញ្ចើមសត្វក្រពើមានច្រើនអាងជាប់គ្នាជុំបងប្អូន ដោយឡែកទ្រុងជនរង គ្រោះធ្លាក់ចូល គឺ
ទ្រុងទំហំ១០ម៉ែត្រ×១២ ម៉ែត្រ អាងទឹកទំហំ ៧ម៉ែត្រ×៨ម៉ែត្រ ក្នុងនោះសត្វក្រពើប្រភេទមេពូជ និងក្រពើឈ្មោល ចំនួនជាង២០ក្បាល(ធំៗ)។

សមត្ថកិច្ចបានឲ្យដឹងថា បច្ចុប្បន្នជនរងគ្រោះដែលជាម្ចាស់កសិដ្ឋានចិញ្ចឹមក្រពើនោះត្រូវបានគ្រូពេទ្យ ប្រាប់ទៅគ្រួសាររងគ្រោះថា ដោយសារមុខរបួសធ្ងន់ធ្ងរនិងច្រើនកន្លែងពេក មិនអាចព្យាបាលជានោះទេដោយឲ្យដឹកមកផ្ទះវិញ ហើយក៏ត្រូវស្លាប់តាមផ្លូវតែម្តង៕

អត្ថបទ៖ កុសល