ទឹកជំនន់នៅថៃ លិចជម្រកសត្វក្រពើ បណ្តាលឲ្យរួច, ពលរដ្ឋកំពុងភ័យខ្លួន

ស្ថានភាពទឹកជំនន់នៅប្រទេសថៃពិតជាធ្ងន់ធ្ងរ ឈានដល់លិចជម្រកសត្វក្រពើនៅខេត្ត Nakhon Sawan បង្ខំឲ្យការិយាល័យជលផលខេត្តចេញការព្រមានអំពីគ្រោះថ្នាក់និងតាមឃ្លាំមើលយ៉ាងដិតដល់ជាទីបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod នៅថ្ងៃព្រហស្បតិ៍ទី៩ខែតុលាឆ្នាំ២០២៥, តំបន់ជាច្រើននៃខេត្តនេះ ត្រូវទឹកជន់លិចធ្ងន់ធ្ងរ ដល់ថ្នាក់លិចទាំងជម្រកធម្មជាតិ Bueng Boraphet ថែមទៀតផង ខណៈពលរដ្ឋកំពុងភ័យខ្លួន។

ដូច្នេះហើយ លោក Wachirawut Kwangkwang មន្ត្រីជាន់ខ្ពស់នៅការិយាល័យជលផលខេត្ត បានចេញការព្រមានមួយទាក់ទងនឹង «ការឃ្លាំមើលសត្វក្រពើ» ដោយអះអាងថា ពលរដ្ឋត្រូវប្រយ័ត្នខ្លួនឲ្យមែនទែន ហើយបើឃើញមានសត្វក្រពើនៅកន្លែងណាមួយ ត្រូវជូនដំណឹងដល់អាជ្ញាធរភ្លាម។

ប្រទេសថៃកំពុងជួបប្រទះគ្រោះទឹកជំនន់ដ៏អាក្រក់ ខណៈបើយោងតាមរបាយការណ៍ចុងក្រោយបំផុត ​គិតត្រឹមព្រឹកថ្ងៃអង្គារទី៧ខែតុលាឆ្នាំ២០២៥ តួលេខមនុស្សស្លាប់ បានកើនដល់២២នាក់ហើយ។ 

តាមរយៈរបាយការណ៍ពីនាយកដ្ឋានបង្ការនិងកាត់បន្ថយគ្រោះមហន្តរាយថៃ និងត្រូវបានផ្សាយបន្តដោយសារព័ត៌មាន Bangkok Post, ខេត្ត-ក្រុងចំនួន១៩គឺត្រូវវាយប្រហារខ្លាំងបំផុត ​ហើយក្នុងនោះមាន២ខេត្តគឺ Uttaradit និង Ayutthaya បូករួមជាមួយទីក្រុងបាងកក ដែលត្រូវរងទុក្ខធ្ងន់ធ្ងរជាងគេ។

យ៉ាងណាក្តី មានការព្យាករថា ជនរងគ្រោះអាចកើនឡើងជាបន្តទៀត ព្រោះថៃ មិនទាន់អស់ព្យុះបោកបក់លើទេ ជាពិសេសបច្ចុប្បន្ន ព្យុះដែលកំពុងគំរាមកំហែងប្រទេសនេះគឺព្យុះ ម៉ាតម៉ូ៕

អត្ថបទ៖ សុខ សុវណ្ណ

ចុចអាន៖ ​ប្រទះឃើញ​សត្វ​ក្រពើ​មួយក្បាលនៅ​ក្នុង​ស្រះ​មុខ​ផ្ទះប្រជាពលរដ្ឋ