ធ្វេសប្រហែសបន្ដិច ឆេះតូបលក់អីវ៉ាន់អស់ ២៨ លានរៀល

អគ្គិភ័យឆាបឆេះរោងលក់អីវ៉ាន់ចាប់ហួយ ១ កន្លែង បណ្តាលឲ្យខូចខាតទ្រព្យសម្បត្តិ និងសម្ភារៈយ៉ាងច្រើន នៅព្រឹកថ្ងៃទី ២០ ខែមេសា ឆ្នាំ ២០២២ នេះ នៅវេលា​ម៉ោង ​០៩​ និង​ ០៤​ នាទី​ព្រឹក​ នៅ​ចំណុច​ក្រុមទី​ ០៧ ​ភូមិ​រាម​គន់ ​ឃុំ​គារ​ស្រុក​មោងឫស្សី​ ខេត្តបាត់ដំបង។

សមត្ថកិច្ច​បានឲ្យដឹងថា ​ទ្រព្យសម្បត្តិ​ដែល​ត្រូវបាន​ខូចខាត​ក្នុងករណី​ខាងលើនេះ​មានដូចជា ម៉ូតូ​ ៣​គ្រឿង និង​សម្ភារៈ​លក់ដូរ​មួយចំនួន​(​អីវ៉ាន់​ចាប់ហួយ​)​សរុប​គិត​ជា​ទឹកប្រាក់​អស់​ចំនួន​២៨,០០០,០០០(​ម្ភៃ​ប្រាំបី​លាន​រៀល​គត់​)​ ដែលមានម្ចាស់ផ្ទះ ឈ្មោះ ​អ៊ាង​ សុ​ផន​ ​អាយុ​ ៦៦ ​ឆ្នាំ​ រស់នៅ​ភូមិ​ឃុំ​។

​សមត្ថកិច្ច​បន្តថា ​មូលហេតុ​នៃ​ការឆេះ​នេះ​ គឺ​បណ្តាលមកពី​ម្ចាស់​តូប​យក​សាំង​ទៅ​ផ្ទេរ​ដាក់​ដប​នៅក្បែរ​ចង្ក្រាន​មាន​ភ្លើង​ទើប​បណ្ដាល​ឲ្យ​ឆាបឆេះ​បែបនេះ​តែម្តង​។ សមត្ថកិច្ច​ថា ​ក្នុងករណីនេះ​សមត្ថកិច្ច​បានចេញ​រថ​យន្ត​អគ្គិភ័យ​មួយគ្រឿង​ប្រើប្រាស់​អស់​ទឹក​ ១​ ឡាន ​និង​ប្រើប្រាស់​បំពង់​ពន្លត់អគ្គិភ័យ​អស់ ៧​ បំពង់​រលត់​ទាំងស្រុង​៕

អត្ថបទ៖ ​សៅ សារិទ្ធ​

​