Connect with us

សន្តិសុខសង្គម

ឈើសុក្រំ ជិត ៥០ សន្លឹក ត្រូវបានកម្លាំងសមត្ថកិច្ចរឹបអូសពី នាយរងប៉ុស្ដិ៍នគរបាល

បានផុស

នៅ

កម្លាំងអធិការដ្ឋាននគរបាលស្រុក កម្លាំងកងរាជអាវុធហត្ថស្រុក សហការជាមួយកម្លាំងនគរបាលប៉ុស្ដិ៍ឃុំញ៉ាង ចុះរឹប​អូស​គំនរឈើសុក្រំប្រមាណជិង ៥០ សន្លឹក របស់នាយរងប៉ុស្ដិ៍នគរបាលព្រំដែនគោក ភូមិចង នៅត្រង់ចំណុចក្បែរផ្លូវច្រកចេញទៅប្រទេសវៀតណាម ច្រកទ្វារព្រំដែនគោកភូមិចង ស្ថិតនៅក្នុងភូមិចង ឃុំញ៉ាង ស្រុកអណ្តូងមាស ខេត្តរតនគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចការនេះដឹកនាំដោយគណៈបញ្ជាការឯកភាពស្រុកអណ្តូងមាស លោក កង សារឿន អភិបាល នៃគណៈអភិបាលស្រុកអណ្តូងមាស ដោយលោកបានចេញបទបញ្ជាទៅកម្លាំងសមត្ថកិច្ចក្នុងមូលដ្ឋានខាងលើ នៅថ្ងៃទី២១ ខែមិថុនាឆ្នាំ២០២២នេះ។

ក្នុងកិច្ចប្រតិបត្តិការចុះបង្ក្រាបឈើនេះ ដោយសារប្រជាពលរដ្ឋក្នុងមូលដ្ឋាន បានប្រទះឃើញគំនរឈើនោះ ជិតមួយសប្តាហ៍មកហើយ ប៉ុន្តែពួកគាត់មិនដឹងត្រូវរាយការណ៍ទៅខាងណាឱ្យចុះមកបង្ក្រាប ព្រោះឈ្មួញរកសុីជាម្ចាស់ឈើនោះ ជាសមត្ថកិច្ចនគរបាលប៉ុស្ដិ៍ភូមិចង តែម្ដង។

ប្រជាពលរដ្ឋអះអាងថា ឈ្មួញជាម្ចាស់ឈើរូបនោះមានឈ្មោះ ពៅ កុសល មានតួនាទី ជានាយរងប៉ុស្ដិ៍នគរបាលព្រំដែនគោក ភូមិចង ផ្ទាល់តែម្តង ជាឈ្មួញរកសុីឈើយូរមកហើយ ធ្វើជំនួញឈើយ៉ាងសកម្មប្រចាំភូមិចង ថែមទាំងមានអត្តចរិតក្រអឺតក្រទមកោងកាច និងគួរឱ្យស្អប់ពីសំណាក់ជនជាតិដើមភាគតិចច្រាយ ដែលរស់នៅក្នុងមូលដ្ឋាន។

ពាក់ព័ន្ធករណីការចោទប្រកាន់ខាងលើនេះ នាយរងប៉ុស្ថិ៍នគរបាលព្រំដែនគោកភូមិចង លោក ពៅ កុសល បានឱ្យដឹងថា ពិតជាឈើរបស់លោកពិតមែន ដែលទុកចោលនៅផ្ទះមីង ហើយជាឈើសល់ពីការធ្វើទ្វារបង្អួចជណ្តើរផ្ទះ។

បច្ចុប្បន្នបន្ទះក្ដារងឿ ប្រភេទឈើសុក្រំ ចំនួនសរុប ៤៨ សន្លឹក ពេញមួយគោយន្តកែច្នៃ ត្រូវបានជំនាញផ្នែករដ្ឋបាលព្រៃឈើ ស្រុកអណ្តូងមាស រឹបអូសយកមករក្សាទុកជាសម្បត្តិរដ្ឋ នៅប៉ុស្តិ៍រដ្ឋបាលនគរបាលឃុំញ៉ាង ស្រុកអណ្តូងមាស។

ទោះជាយ៉ាងណា មានមតិជាច្រើនលើកឡើង និងសំណូមពរទៅថ្នាក់ដឹកនាំ គណៈបញ្ជាការឯកភាពខេត្ត លោកឧត្តមសេនីយ៍ទោ យិន ចំណាន ស្នងការដ្ឋាននគរបាលខេត្តរតនគិរី ចាត់វិធានការទៅលើមន្ត្រីក្នុងក្របខណ្ឌជានគរបាលជាតិ ដែលពាក់ព័ន្ឋនឹងបទល្មើសព្រៃឈើ តាមអភិក្រមទី៥។ ប្រជាពលរដ្ឋបន្តថា បើថ្នាក់លើនៅតែបណ្តែតបណ្តោយ ទុកឱ្យមន្ត្រីបែបនេះឈរជើងនៅជួរបន្ទាត់ព្រំដែន បង្កភាពក្តៅក្រហាយដល់ប្រជាពលរដ្ឋ បំផ្លិចបំផ្លាញធនធានធម្មជាតិរបស់រដ្ឋ នោះសម្បត្តិរបស់ជាតិច្បាស់ជាវិនាសអន្តរាយ៕

អត្ថបទ៖ វុទ្ធឦសាន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម