តុលាការខេត្តកណ្តាលសម្រេចឃុំខ្លួនជនដៃដល់រឹតកសម្លាប់ក្មេងប្រុសអាយុ ១០ ឆ្នាំ ដាក់ពន្ធនាគារ

កាលពីល្ងាចថ្ងៃទី១៥ ខែកញ្ញា ឆ្នាំ២០២២ លោក ថោង ផល្លារង្សី ចៅក្រមស៊ើបសួរសាលាដំបូងខេត្តកណ្តាល បានសម្រេច​ចេញដីការឃុំខ្លួនជនដៃដល់ដែលយកខ្សែរឹតកសម្លាប់ក្មេងប្រុសអាយុ១០ឆ្នាំម្នាក់ ដោយមូលហេតុ ខឹងជនរងគ្រោះកាលពី២ខែមុន រឿងជនរងគ្រោះប្រើមិនបាន និងតមាត់ ដាក់ពន្ធនាគារបណ្តោះអាសន្ន ក្រោមការចោទប្រកាន់ពីបទ​”ឃាតកម្មដែលមានស្ថាន​ទម្ងន់ទោសទាក់ទងនិងជនរងគ្រោះ ” តាមមាត្រា២០២ នៃក្រមព្រហ្មទណ្ឌ ។ ដែលប្រព្រឹត្តនៅថ្ងៃទី១៣ ខែកញ្ញា ឆ្នាំ២០២២ វេលាម៉ោង១២និង៣៤នាទី នៅចំនុចទំនប់បឹងខ្វែងក្នុងរោងលំហែកាយ ភូមិព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល ។

ជនត្រូវចោទឈ្មោះ មិន រត្តនា ហៅម៉ៅ ភេទប្រុស អាយុ២៩ឆ្នាំ ជនជាតិខ្មែរ មុខរបរចាំដីចំការ មានទីលំនៅស្នាក់នៅភូមិព្រែកតាព្រហ្ម ឃុំ កំពង់អុស ស្រុកពញាឮ ខេត្តកណ្តាល។ ចំណែកជនរងគ្រោះឈ្មោះ ធី សុកសំណាង ហៅ ង៉ូវ ភេទប្រុស ជនជាតិខ្មែរ អាយុ១០ឆ្នាំ​មុខរបរ​សិស្ស​ថ្នាក់ទី២ មានទីលំនៅស្នាក់នៅភូមិ ព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល។

ជនសង្ស័យត្រូវបានឃាត់ខ្លួននៅថ្ងៃទី១៤ ខែកញ្ញា ឆ្នាំ២០២២ បន្ទាប់ពីកម្លាំងជំនាញកោសល្យវិច័យពិនិត្យលើសាកសពដោយអះអាងថា​ជាករណីឃាតកម្ម ខណៈដំបូងឡើយជនដៃដល់ប្រាប់ថា ជនរងគ្រោះចងកសម្លាប់ខ្លួនឯង៕

អត្ថបទ៖ ឆៃយ៉ា