តុលាការសម្រេចឃុំខ្លួនចោរឆក់កាបូបស្ត្រីជនជាតិ​ ឥណ្ឌូនេស៊ីដាក់ពន្ធនាគារបណ្តោះអាសន្ន

ចៅក្រមស៊ើបសួរសាលាដំបូងខេត្តកណ្តាលលោក ស៊ូ បញ្ញាបានសម្រេចចេញដីកាឃុំខ្លួនបុរជនសង្ស័យជាចោរឆក់កាបូបពីស្ត្រីជនជាតិឥណ្ឌូនេស៊ីដាក់ពន្ធនាគារបណ្តោះអាសន្នពីបទ “លួចមានស្ថានទម្ងន់ទោស”(ឆក់កាបូប)” ចាត់ចែងឲ្យប្រើប្រាស់ដោយខុសច្បាប់នូវសារធាតុញៀន និង”ប្រើប្រាស់ដោយខុសច្បាប់នូវសារធាតុញៀន” តាមមាត្រា៣៥៣, មាត្រា៣៥៧ នៃក្រមព្រហ្មទណ្ឌ ,មាត្រា៤២ និងមាត្រា៤៥ នៃច្បាប់ស្តីពីការត្រួតពិនិត្យគ្រឿងញៀន។

ប្រព្រឹត្តនៅថ្ងៃទី០៣ ខែធ្នូ ឆ្នាំ២០២២ វេលាម៉ោង ១០ និង២០នាទី ចំណុចលើផ្លូវបេតុងស្ថិតនៅភូមិជ្រៃធំ ឃុំសំពៅពូន ស្រុកកោះធំ ខេត្តកណ្តាល។

បុរសជនត្រូវចោទមានឈ្មោះ សឿន គឹមសៀក អាយុ២១ឆ្នាំ ជនជាតិខ្មែរ មានទីលំនៅភូមិព្រែកសែម ឃុំសំពៅពូន ស្រុកកោះធំ ខេត្តកណ្តាល មុខរបរ មិនពិតប្រាកដ។ ជនរងគ្រោះជាស្ត្រីជនជាតិឥណ្ឌូនេស៊ី អាយុ២៤ឆ្នាំ មុខរបរបុគ្គលិក (កាស៊ីណូហ្គ្រេនដ្រាហ្គន)។

បើតាមរបាយការណ៍របស់សមត្ថកិច្ចដែលទទួលបាន៖ ជនរងគ្រោះបានដើរចេញពីបន្ទប់ស្នាក់នៅគោលបំណងទៅកន្លែងដូរលុយរកទិញអីហូប មកដល់ចំណុចកើតហេតុស្រាប់តែមានជនមិនស្គាល់អត្តសញ្ញាណ ០១នាក់ បានបើកម៉ូតូមកតាមពីក្រោយរួចហើយបានធ្វើសកម្មភាពឆក់យកកាបូបរបស់ជនរងគ្រោះជិះម៉ូតូគេចខ្លួនបាត់ទៅ។

បន្ទាប់មកជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសំពៅពូន ដើម្បីឲ្យសមត្ថកិច្ចនគរបាល ជួយស្វែងរកចាប់ជនសង្ស័យ ហើយនឹងសម្ភារៈដែលបាត់បង់យកមកវិញ។

ក្រោយពីទទួលបានពាក្យបណ្តឹងភ្លាមសមត្ថកិច្ចនគរបាលបានធ្វើការស្រាវជ្រាវឆែកមើលតាមកាមេរ៉ាសុវត្ថិភាព ទើបស្គាល់អត្តសញ្ញាណជនសង្ស័យរហូតឈានដល់ការឃាត់ខ្លួនជនសង្ស័យបានតែម្តង៕

អត្ថបទ៖ ឆៃ យ៉ា