ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក (គ.ស.ច.គ) ប្រចាំឆ្នាំ២០២២ និងលើកទិសដៅការងាឆ្នាំ២០២៣ នៅថ្ងៃទី៣០ ខែមករានេះ លោកស្រី មឹន មាណវី អគ្គលេខាធិការ នៃអគ្គលេខាធិការដ្ឋាន គ.ស.ច.គ បានមានប្រសាសន៍ថា ២០២២ មានគ្រោះថ្នាក់ចរាចរណ៍ផ្លូវគោកនៅទូទាំងប្រទេសបានកើតឡើងចំនួន ២ ៩៧៦ ករណី បណ្ដាលឱ្យស្លាប់ចំនួន ១ ៧០៩ នាក់ និងរងរបួសជាង ៤ ពាន់នាក់ បានកើនឡើងដល់ ១៤ ភាគរយ។

លោកស្រី មឹង មាណវី បញ្ជាក់ថា អ្នកស្លាប់ភាគច្រើនមាននៅរាជធានីភ្នំពេញ ខេត្តកណ្ដាល និងខេត្តកំពង់ចាម។ មូលហេតុបណ្ដាលឱ្យមានគ្រោះថ្នាក់ចរាចរណ៍ គឺការបើកបរដោយលើសល្បឿនកំណត់ មិនគោរពសិទ្ធិ មិនប្រកាន់ស្ដាំ វ៉ាជែង បត់ ស្រវឹង កត្តាយានយន្ត និងងងុយ។ ក្នុងចំណោមជនរងគ្រោះជិះម៉ូតូសរុបជាង ៤ពាន់នាក់, ជនរងគ្រោះមិនពាក់មួកសុវត្ថិភាពជាង ៣ពាន់នាក់ ដែលភាគច្រើនមិនពាក់នៅពេលយប់៕

លោកស្រី មឹន មាណវី មានប្រសាសន៍ថា ករណីគ្រោះថ្នាក់ចរាចរណ៍ក្នុងឆ្នាំ២០២២ សមត្ថកិច្ចបានបញ្ជូនសំណុំរឿងទៅដោះស្រាយនៅតុលាការចំនួន ១ ០២៧ ករណី, បានដោះស្រាយចំនួន ១២១ ករណី កំពុងអង្កេតចំនួន ៦៦៤ ករណី បញ្ជូនជនល្មើសទៅតុលាការចំនួន ៣១៦នាក់។

សមត្ថកិច្ចបានត្រួតពិនិត្យយានយន្តសរុបជាង ១លានគ្រឿង រកឃើញ​យានយន្តល្មើស និងពិន័យជាង ១៤ម៉ឺនគ្រឿង, ពិន័យបានថវិកា ១២ ៤៥៤ ​លានរៀល។ ចំពោះដំណើរការសាកល្បងធ្វើការពិន័យ និងដកពិន្ទុបណ្ណបើកបរ ដោយឧបករណ៍​បច្ចេកទេស គិតចាប់ពីថ្ងៃទី១ ខែកញ្ញា ដល់ទី៣១ ខែធ្នូ ឆ្នាំ២០២២ សមត្ថកិច្ចបានផាកពិន័យសរុបចំនួនជាង ៨ ៥០០ នាក់ (ស្រី ៤៨៩នាក់)៕

អត្ថបទ៖ សំអឿន