សន្តិសុខសង្គម

ប្រទះឃើញយុវជនម្នាក់ ជាប់នៅកណ្ដាលត្រឹប នៃអាងទឹកកំពីងពួយ ដោយមិនដឹងមូលហេតុ

បានផុស

១ year មុន

នៅ

ថ្ងៃចន្ទ ១៣ កុម្ភៈ ២០២៣

ដោយ

យុវជនម្នាក់ មើលពីសំបកក្រៅហាក់ដូចជាមានសតិមិនគ្រប់ ឬក៏អាចថា ដោយសារការភ័យខ្លាច ត្រូវបានក្រុមប្រជាការពារប្រទះឃើញជាប់ក្នុងទឹកពោរពេញដោយពើក និងត្រឹប នៅក្នុងអាងទឹកកំពីងពួយ មិនអាចរើខ្លួនបាន ហើយក៏មិនទាន់ដឹងមូលហេតុដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រទះឃើញនេះ កាលពីរសៀលថ្ងៃទី ១១ ខែកុម្ភៈ ឆ្នាំ ២០២៣ ត្រង់ចំណុចចន្លោះភ្នំដំបង និងទំនប់អូរដូនពៅ នៃអាងទឹកកំពីងពួយ ក្នុងភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង។

ក្រោយប្រទះឃើញបែបនេះ ក្រុមប្រជាការពារ បានរាយការណ៍ទៅសមត្ថកិច្ច ព្រមទាំងជួយស្រង់ចេញពីទឹក និងនាំយកមកលើគោកដើម្បីសាកសួរ ដោយយុវជនរូបនេះ អាយុប្រហែលជិត ៣០ ឆ្នាំ គ្មានពាក់អាវ ស្ថិតក្នុងសភាពរងាញ័រញាក់ និងសួរនាំទៅមិនអាចនិយាយដឹងអ្វីទាំងអស់ សូម្បីតែឈ្មោះខ្លួនឯង និងភូមិ-ឃុំដែលគេរស់នៅក៏មិនចាំដែរ ហើយនៅក្នុងខ្លួនមានតែថ្នាំពេទ្យ ប្រេងកូឡា និងលុយ ២ ម៉ឺនរៀល តែប៉ុណ្ណោះ។

នៅពេលនោះដែរ សមត្ថកិច្ចកំពុងតែឆ្ងល់ថា ត្រង់ចំណុចខាងលើ គឺកាណូត ឬទូក មិនអាចចូលដល់ឡើយ ដោយសារតែពើក និងត្រឹប ក្រាស់ខ្លាំងពេក ដូច្នេះហេតុអ្វីបានជាយុវជនរូបនេះទៅជាប់ក្នុងទឹកបែបនេះទៅវិញ។ ហើយក៏មិនដឹងថាជាប់តាំងពីពេលណាមកនោះឡើយ ដោយសារតែយុវជនរូបនេះនិយាយមិនដឹងអីទាល់តែសោះ។

លោក នី ពៅ មេឃុំតាគ្រាម បានបញ្ជាក់ប្រាប់កម្ពុជាថ្មីថា តាមការសន្និដ្ឋានគាត់អាចជាមនុស្សញៀនថ្នាំ ហើយក៏អាចទំនងជាវង្វេងវង្វាន់ដើរចូលទៅក្នុងតំបន់ខាងលើតែម្នាក់ឯង ក៏ជាប់នៅទីនោះតែម្ដង ដោយសារក្រុមប្រជាការពារឃើញក៏ស្រង់ឡើងមកដាក់លើគោក។ ពេលនេះ លោកបានចាត់ឲ្យសមត្ថកិច្ចបញ្ជូនទៅកាន់មណ្ឌលសុខភាពហើយ ដើម្បីពិនិត្យទៅលើស្ថានភាពរបស់យុវជនរូបនេះ៕

អត្ថបទ ៖ សោ និយមរ័ត្ន