អាជ្ញាធរខណ្ឌចំការមន ឆ្មក់បង្ក្រាបទីតាំងបើក​ល្បែងស៊ីសងក្នុងឃ្លាំងមួយកន្លែង នៅផ្លូវលេខ​៤៧៤

កម្លាំងគណៈបញ្ជាការឯកភាពខណ្ឌចំការមន ដឹកនាំដោយលោក កៀង ល័ក អភិបាលនៃគណៈអភិបាលខណ្ឌចំការមន នៅព្រលប់ថ្ងៃទី១៦ ខែកុម្ភៈ ឆ្នាំ២០២៣ បានបើកការឆ្មក់បង្ក្រាបទីតាំងឃ្លាំងមួយកន្លែងត្រង់ចំណុចផ្ទះលេខ១៨ ផ្លូវលេខ៤៧៤ ក្នុងសង្កាត់បឹងត្របែក  ដោយមានបង្កប់ល្បែងស៊ីសងខុសច្បាប់។

សមត្ថកិច្ចបានឲ្យដឹងថា បន្ទាប់ពីមានប្រជាពលរដ្ឋបានរាយការថាទីតាំងខាងលើបើកល្បែងស៊ីសងខុសច្បាប់ទើបកម្លាំងអាជ្ញាធរជំនាញបានបើកការស្រាវជ្រាវ និងតាមដានជាប់លាប់ដោយកំណត់បានច្បាស់ថា ទីតាំងខាងលើពិតជាមានការលួចលាក់លេងល្បែងស៊ីសង ទើប រៀបចំកម្លាំងបើកការឆ្មក់បង្ក្រាបជាក់ស្តែងតែម្តង ។

សមត្ថកិច្ចបន្តថា ក្នុងការចុះបង្ក្រាបនេះក្រុមអ្នកលេងល្បែងទាំងនោះបានរត់គេចខ្លួនតាមទ្វារក្រោយអស់ ដោយបានដកហូតបានតែវត្ថុតាងមួយចំនួនធំពាក់ព័ន្ធនឹងល្បែងស៊ីសង ដូចជាបៀអាប៉ោង ជាដើម និងដកហូត បានម៉ូតូចំនួន០៦គ្រឿងផងដែរ ។

ក្រោយការដកហូតវត្ថុតាងទាំងអស់ត្រូវបញ្ចូនទៅកាន់សាលាខណ្ឌចំការមន ដើម្បីរក្សាទុកបណ្តោះអាសន្ន។ ដោយឡែកទីតាំងខាងលើ ត្រូវអាជ្ញាធរធ្វើកំណត់ហេតុបិទជាបណ្តោះអាសន្ន៕

អត្ថបទ៖ សុខា