បាញ់តដៃគ្នាក្នុងប្រតិបត្តិការបង្ក្រាបមុខសញ្ញាបណ្ដាលឲ្យស្លាប់ពីរនាក់ និងរបួសសមត្ថកិច្ចម្នាក់

មន្ត្រីនគរបាលព្រហ្មទណ្ឌកម្រិតស្រាលម្នាក់បានរងរបួសក្នុងហេតុការណ៍បាញ់តដៃគ្នាជាមួយជនសង្ស័យ ខណៈជនសង្ស័យ២នាក់ស្លាប់នៅកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី១៨ ខែមេសា ឆ្នាំ២០២៣ នៅក្នុងភូមិគោកចំបក់  សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

តាមសេចក្ដីរាយការណ៍ពីក្រុមការងារកម្ពុជាថ្មីដែលនៅកន្លែងកើតហេតុ ក្រុមជនសង្ស័យមានគ្នា៤នាក់បាញ់តដៃជាមួយកម្លាំងជាច្រើនគ្រាប់ បណ្ដាលឲ្យសមត្ថកិច្ចរងរបួសម្នាក់ និងជនសង្ស័យ២នាក់បានស្លាប់ ចំណែក២នាក់ទៀតគេចខ្លួនបាត់។ ក្នុងប្រតិបត្តិការណ៍ កម្លាំងសមត្ថកិច្ចបានដកហូតអាវុធខ្លីមួយដើម។

បើតាមលោកឩត្ដមសេនីយ៍ត្រី សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានឲ្យដឹងនៅមុននេះថា ក្រុមជនសង្ស័យ ជាមុខសញ្ញាកាច់កលួចម៉ូតូ និងលួចរថយន្តយ៉ាងសកម្ម ដោយមានអាវុធ​ដែលតែងតែបាញ់គម្រាមជនរងគ្រោះពេលចេញធ្វើសកម្មភាពនាពេលកន្លងមក។ លោកឩត្ដមសេនីយងត្រី បានបន្ថែមថា ក្រុមជនសង្ស័យបានបាញ់ស្រោចមកលើសមត្ថកិច្ច ដែលបណ្តាលឲ្យនាយរងការិយាល័យព្រហ្មទណ្ឌកម្រិតស្រាលម្នាក់រងរបួសត្រង់ជើង ខណ:នោះដើម្បីការពារខ្លួនសមត្ថកិច្ចបានប្រើប្រាស់សិទ្ធការពារខ្លួនដោយបាញ់តបតវិញបណ្តាលឲ្យជនសង្ស័យ២នាក់ស្លាប់នៅនឹងកន្លែង៕

រាយការណ៍៖ សុខា