​យុវវ័យមួយចំនួននៅតែបន្តជក់ VAPE ទោះដឹងថា មានហានិភ័យធ្ងន់ធ្ងរដល់សុខភាព​

អ្នកជំនាញសុខភាពនៅកម្ពុជាបានលើកឡើងថា ការជក់ពពួក VAPE ឬបារីអេឡិចត្រូនិច មានផលប៉ះពាល់ខ្លាំងណាស់ដល់សុខភាព​ ដែលងាយនឹងស្រូបចូលដល់ខួរក្បាល និងប្រព័ន្ធប្រាសាទ​របស់យុវជន​ យុវតីមួយចំនួន។

លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពប្រាប់កម្ពុជាថ្មីនៅថ្ងៃទី ០៨ ខែកញ្ញានេះថា បារីអេឡិចត្រូនិច ឬ VAPE ផលិតឡើងដើម្បីទាក់ទាញ​យុវជន និងកុមារ​ហើយមានផលប៉ះពាល់ច្រើន គឺប៉ះពាល់ទៅលើការលូតលាស់​ខួរក្បាល និងប្រព័ន្ធប្រាសាទ​របស់កុមារ ដែលធ្វើឱ្យរាំងស្ទះទៅដល់ការលូតនៃប្រព័ន្ធប្រាសាទ នៃខួរក្បាលកុមារ។

លោកបញ្ជាក់ថា វាប៉ះពាល់ធ្ងន់​ទៅដល់ការរីកលូតលាស់ការរៀនសូត្រ ការកសាងសមត្ថភាពរបស់យុវជន ដែល​អាចនឹងប៉ះពាល់ធ្ងន់ធ្ងរទៅដល់ធនធានមនុស្សនៅពេលអនាគត។

ម្យ៉ាងទៀតរសជាតិរបស់ VAPE និងបារីអេឡិចត្រូនិចឈ្ងុយ ដែលមានផ្លែឈើសិប្បនិម្មិតដែលគេដាក់ចូលក្នុងហ្នឹង វាអាចជ្រាបចូលយ៉ាងជ្រៅទៅក្នុងសួត ធ្វើឱ្យខូចសួត ប៉ះពាល់ទៅដល់ប្រព័ន្ធដំណកដង្ហើម និងប្រព័ន្ធបេះដូងសរសៃឈាមផងដែរ។

បើតាមលោក មុំ គង់ កត្តាដែលនាំឱ្យយុវជននៅតែប្រើប្រាស់ ដោយសារតែនៅតែមានការផ្សព្វផ្សាយលក់បារីអេឡិចត្រូនិចយ៉ាងទូលំទូលាយ នៅតាមបណ្ដាញព័ត៌មានសង្គម។ មានគណនី បណ្ដាញសង្គមដែលផ្សាយលក់បារី កើន​ឡើងពីមួយខែទៅមួយខែជាពិសេស​ក្រោយបោះឆ្នោត។

អ្នកជំនាញសុខភាពរូបនេះ បានឱ្យដឹងថា៖ «នៅពេលដែលគេផ្សព្វផ្សាយលក់ គេបំភាន់ យុវជន គេថា វាជាឧបករណ៍ផ្ដាច់បារី គេប្រាប់ថា ជក់ទៅអត់មានគ្រោះថ្នាក់អ្វីទេ ព្រោះវាគ្រាន់តែជាផ្សែង ជាចំហាយដែលធ្វើឱ្យយុវជនខ្មែរ នៅវ័យក្មេងមិនទាន់ចេះគិតគូបានជ្រៅជ្រះ យល់ច្រលំទៅតាមការបញ្ឆោតរបស់អ្នកលក់តែម្ដង»។

ទោះបីរាជរដ្ឋាភិបាល បានហាមឃាត់ ជាច្រើនឆ្នាំមកហើយក្ដី ប៉ុន្តែ វានៅតែមានវត្តមាននៅក្នុងប្រទេសកម្ពុជា។ មានន័យថា យើងអាចទិញតាមបណ្ដាញសង្គម និងកន្លែងលក់នានា។

បើតាមលោក មុំ គង់ រដ្ឋាភិបាលត្រូវធ្វើយ៉ាងណាកុំឱ្យមានការផ្សព្វផ្សាយលក់តាមបណ្ដាញសង្គម។ ទី២ រឹតបន្តឹងហាមឃាត់ការនាំចូល នោះយុវជននឹងកាត់បន្ថយឈានទៅលុបបំបាត់ចោលទាំងស្រុង។

ការជក់ VAPE ឬបារីអេឡិចត្រូនិក គឺទាន់សម័យ តែមនុស្សស្លាប់ដោយសារបារីអេឡិចត្រូនិចនេះ ដក៏នៅតែជាការពេញនិយមដែរ។ តាមការចុះផ្សាយរបស់មជ្ឈមណ្ឌលគ្រប់គ្រង និងបង្ការជំងឺឆ្លង (CDC) របស់អាមេរិក គឺប្រជាពលរដ្ឋជិត ៣ ពាន់នាក់ ជាពិសេស យុវជន បានចូលពេទ្យដោយសារតែជក់ VAPE និងជិត ១០០នាក់បានស្លាប់ជារៀងរាល់ឆ្នាំ។ ទិន្នន័យនេះ បង្ហាញថា គ្មានឡើយសុវត្ថិភាពណាមួយដែលបានមកពីការជក់បារីអេឡិចត្រូនិច VAPE នេះ៕