Update៖ លោកមេប៉ុស្ដិ៍ស្រែចា ដែលចុះហាមឃាត់ក្រុមល្ខោនបាសាក់ ត្រូវបានផ្អាកការងារបណ្ដោះ​អាសន្ន

លោកឧត្ដមសេនីយ៍ទោ អ៊ូ សុប៊ុណ្ណា ស្នងការនៃស្នងការដ្ឋាននគរបាលខេត្តក្រចេះ បានឲ្យដឹងនៅរសៀលថ្ងៃទី២៣វិច្ឆិកានេះថា លោកអនុសេនីយ៍ទោ រស សំអឿន ហៅក្រាវ ដួង ជានាយប៉ុស្ដិ៍នគរបាលរដ្ឋបាលស្រែចា ត្រូវបានផ្អាកការងារអនុវត្តវិន័យកងកម្លាំងនគរបាលជាបណ្ដោះអាសន្នហើយ និងបានតែងតាំងមេប៉ុស្ដិ៍ស្ដីទីជំនួស។

លោកអនុសេនីយ៍ទោ រស សំអឿន ហៅក្រាវ ដួង ជានាយប៉ុស្ដិ៍នគរបាលរដ្ឋបាលស្រែចា ត្រូវបានកោះហៅមកសួរនាំនៅស្នងការដ្ឋាននគរបាលខេត្ត នៅព្រឹកថ្ងៃទី២៣វិច្ឆិកា បន្ទាប់ពីចុះហាមឃាត់ និងបញ្ឈប់ការសម្ដែងល្ខោនបាសាក់ក្នុងពិធីបុណ្យកឋិនមួយនៅវត្តអូរលុង ស្ថិតក្នុងភូមិអូរលុង ឃុំស្រែចា ស្រុកស្នួល ខេត្តក្រចេះ។

គូររំលឹកថា កាលពីយប់ថ្ងៃទី២២ ខែវិច្ឆិកា ឆ្នាំ២០២៣ លោកអនុសេនីយ៍ទោ រស សំអឿន ហៅក្រាវ ដួង ជានាយប៉ុស្ដិ៍នគរបាលរដ្ឋបាលស្រែចា បានចុះទៅហាមឃាត់ និងបញ្ឈប់ការសម្ដែងរបស់ក្រុមអ្នកលេងសិល្បៈល្ខោនបាសាក់ ក្នុងពិធីបុណ្យកឋិនមួយ នៅវត្តអូរលុង ស្ថិតក្នុងភូមិ អូរលុង ឃុំស្រែថា ស្រុកស្នួល ខេត្តក្រចេះ ដែលទង្វើនេះបានធ្វើឲ្យមហាជនជាច្រើន កំពុងផ្ទុះប្រតិកម្មជាខ្លាំង។

បើតាមឃ្លីបវីដេអូនៅយប់កើតហេតុ លោកមេប៉ុស្តិ៍ ក៏បានឆ្លើយបញ្ជាក់ដែរថា លោកមិនបានទទួលព័ត៌មានថា នឹងមានកម្មវិធីបុណ្យកឋិន ក៏ដូចជាការសម្ដែងសិល្បៈល្ខោនបាសាក់អ្វីនោះទេ ទើបលោកចុះមកសួរនាំ មិនមានគោលបំណងមករករឿង ឬក៏រំខានអ្វីឡើយ៕