ស្នងការរាជធានីបញ្ជាឲ្យកម្លាំងសមត្ថកិច្ចស្រាវជ្រាវឃាត់ខ្លួនបុរសម្នាក់ដែលប្រើហិង្សាលើស្ត្រីម្នាក់ដល់ក្នុងបន្ទប់

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលយប់ថ្ងៃទី៣ ខែមេសា ឆ្នាំ២០២៤ បានបញ្ជាលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារព្រហ្មទណ្ឌ ដឹកនាំកម្លាំងចុះស្រាវជ្រាវ និងឃាត់បុរសម្នាក់បន្ទាប់ពីបែកធ្លាយវីដេអូពីសកម្មភាពប្រើអំពើហិង្សាលើស្ត្រីម្នាក់ដល់ក្នុងបន្ទប់។ ជាមួយគ្នានេះ លោកស្នងការរាជធានីភ្នំពេញ​ ក៏បានបញ្ជាឲ្យបុរសរូបនោះចូលខ្លួនមកសារភាពកំហុសនៅអធិការដ្ឋាននគរបាលខណ្ឌច្បារអំពៅ ប្ញនៅស្នងការដ្ឋាននគរបាលរាជធានីភ្នំពេញ មុនពេលសមត្ថកិច្ចទៅឃាត់ខ្លួន។

សូមជម្រាបថា កាលពីថ្ងៃទី៣ ខែមេសា ឆ្នាំ២០២៤ មានការបង្ហោះចែកចាយវីដេអូពីសកម្មភាពបុរសម្នាក់ដែលគេស្គាល់ថាឈ្មោះ ដែន សូនី​ បានចូលទៅវាយស្ត្រីម្នាក់ដល់ក្នុងបន្ទប់ ខណៈសាមីខ្លួនទាំងពីរបានចេញមកបញ្ជាក់ថា គ្រាន់តែជាការថតសម្ដែងតែប៉ុណ្ណោះ ហើយរឿងនេះកន្លងហួសយូរហើយដែរ។

បើតាមប្រភពមួយបានបង្ហើបថា ការប្រើអំពើហិង្សាពីសំណាក់លោក ដែន សូនី លើស្ត្រីរូបនោះបានកើតឡើងបន្ទាប់ពីស្ត្រីរងគ្រោះបានចូលទៅខមិនក្នុងគណនីហ្វេសប៊ុករបស់ខ្លួនធ្វើឲ្យជនបង្កមិនពេញចិត្តក៏មកបើកទ្វារបន្ទាប់ចូលទៅវាយស្ត្រីរងគ្រោះដល់ក្នុងបន្ទប់ ហើយថែមទាំងគម្រាមស្ត្រីរងគ្រោះកុំឲ្យជួបមុខទៀត បើកជួបទៀតនឹងវាយឲ្យធ្ងន់ជាងនេះ។

សូមបញ្ចាក់ថា បន្ទាប់ពីបែកធ្លាយ និងមានការផ្សព្វផ្សាយជាច្រើននៅលើបណ្ដាញសង្គមបុរសជនដៃដល់ និងនារីរគ្រោះបានចេញវីដេអូរួមគ្នាមួយ និងបានបកស្រាយថា នេះគ្រាន់តែជាការថតសម្ដែងតែប៉ុណ្ណោះ ហើយក៏បានកន្លងហួសមកយូរហើយដែរ។

តែទោះបីយ៉ាងណា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានតម្រូវឲ្យសាមីខ្លួនទាំងពីរត្រូវចូលខ្លួនមកបំភ្លឺនៅមុខសមត្ថកិច្ចនៅថ្ងៃទី៤មេសានេះជាកំហិត ព្រោះនេះជាការពុលសង្គម៕

អត្ថបទ៖ សុខុម