Update៖ អគ្គិភ័យឆេះផ្ទះពលរដ្ឋនៅខណ្ឌច្បាអំពៅ ខូចខាតផ្ទះ៤ខ្នង ខណៈស្ត្រីម្នាក់របួសបាក់ជើង

ករណីអគ្គិភ័យដែលឆេះផ្ទះប្រជាពលរដ្ឋនៅសង្កាត់ច្បាអំពៅទី១ ខណ្ឌច្បាអំពៅ កាលពីវេលាម៉ោង៨ព្រឹក ថ្ងៃទី២៤ឧសភានេះ បណ្ដាលឲ្យឆេះខូចខាតផ្ទះមួយខ្នងទាំងស្រុង និង៣ខ្នងទៀតខូចខាត៥០ភារយ ខណៈស្ត្រីជាជនជាតិវៀតណាមម្នាក់រងរបួសបាក់ជើង។

យោងតាមរបាយការណ៍របស់សមត្ថកិច្ចបានឲ្យដឹងថា ផ្ទះដែលត្រូវអគ្គិភ័យឆាបឆេះធ្វើអំពីឈើប្រក់ស័ង្កសី ទំហំ 04×20 ម៉ែត្រ ដែលមានម្ចាស់ឈ្មោះ អាន ឧស្សាហ៍ ភេទប្រុស អាយុ៤១ឆ្នាំ មុខរបរ លក់ដូរ(ខូចខាតទាំងស្រុង)។​ ផ្ទះធ្វើអំពីឈើលើ ថ្មក្រោម ប្រក់ស័ង្កសី ទំហំ 04×20ម៉ែត្រ ម្ចាស់ឈ្មោះ គីម ឡុង ភេទប្រុស អាយុ៥៩ឆ្នាំ មុខរបរលក់ដូរ (ខូចខាត ៥០%)។ ផ្ទះអំពីឈើលើ ថ្មក្រោម ប្រក់ស័ង្កសី ទំហំ 10×15 ម៉ែត្រ ម្ចាស់ឈ្មោះ ថាច់ ថឺម ភេទ ប្រុស អាយុ៥៦ ឆ្នាំ មុខរបរ លក់ដូរ ( ខូចខាត ៥០%)។ ផ្ទះធ្វើអំពីឈើ ប្រក់ស័ង្កសី ទំហំ 04×20 ម៉ែត្រ ម្ចាស់ឈ្មោះ លឹម មិនថាន់ ភេទ ប្រុស អាយុ ៤៥ ឆ្នាំ មុខរបរ លក់ដូរ( ខូចខាត ៥០%)។ តាមរបាយការណ៍ករណីអគ្គីភ័យនេះកើតឡើងដោយសារឆ្លងចរន្ដអគ្គិសនី។

របាយការណ៍បណញ្ជាក់ថា ក្នុងហេតុការណ៍នេះបណ្ដាលឲ្យស្ត្រីជាជនជាតិវៀតណាមម្នាក់រងរបួសបាក់ជើងឈ្មោះ តុប ម៉ីហៀប អាយុ៣៦ឆ្នាំ ដោយសាររថយន្តពន្លត់អគ្គីភ័យថយក្រោយប៉ះជនរងគ្រោះបណ្តាលឲ្យបាក់ជើង និងបានបញ្ជូនទៅសង្គ្រោះ។

ក្នុងប្រតិបត្តិការពន្លត់ កម្លាំងជំនាញបានប្រើប្រាស់រថយន្ដពន្លត់អគ្គិភ័យចំនួន១៧គ្រឿង ប្រើប្រាស់ទឹកអស់ ១៧ ឡាន=៦៨ ម៉ែត្រគូប៕