គណៈគ្រប់គ្រងចំណតបេនឡានផ្សារធំថ្មី តែងតែយកចិត្តទុកដាក់​អប់រំណែនាំក្រុមអ្នករត់តាក់ស៊ី ឲ្យចតមានសណ្ដាប់ធ្នាប់

គណៈ​គ្រប់គ្រង​ចំណត​បេនឡាន​ផ្សារ​ធំ​ថ្មី តែងតែ​យកចិត្តទុកដាក់​ចុះ​អប់រំ​ណែនាំ​ដល់​អ្នក​រត់​តាក់ស៊ី​ទម្លាក់​អីវ៉ាន់​គ្មាន​សណ្ដាប់ធ្នាប់ នៅ​ចំណុច​ផ្លូវ ២១៧ ក្បែរ​នឹង​ចំណត​រថយន្ត​ក្រុង​ផ្សារ​សូរិយា ដែល​បង្ក​ឲ្យ​មាន​ការ​កកស្ទះ​ចរាចរណ៍​ពិបាក​ដល់​ប្រជាពលរដ្ឋ​ធ្វើដំណើរ។

បើ​តាម​ប្រជាពលរដ្ឋ​ធ្វើដំណើរ​ឆ្លងកាត់ លើក​ឡើង​ថា ហេតុអ្វី​បាន​ជា​ក្រុម​អ្នក​រត់​តាក់ស៊ី​មក​ចត​រថយន្ត​គ្មាន​សណ្ដាប់ធ្នាប់​ដូច្នេះ​ទៅវិញ ដោយ​ដេញ​ចាប់​ម៉ូយ​យ៉ាង​អនាធិបតេយ្យ​ពេញ​ផ្លូវ មិន​ខ្វល់​ពី​គ្រោះថ្នាក់​ដល់​អ្នក​ធ្វើ​ដំណើរ​តាម​ផ្លូវ។

ពាក់ព័ន្ធ​បញ្ហា​ចំណត​ខាងលើ​នេះ​ដែរ ប្រធាន​គ្រប់គ្រង​ចំណត​បេនឡាន​ផ្សារ​ធំ​ថ្មី ប្រាប់​ឲ្យ កម្ពុជា​ថ្មី ដឹង​ថា ចំពោះ​បញ្ហា​នេះ គណៈ​គ្រប់គ្រង​បាន​យកចិត្តទុកដាក់​ឲ្យ​កម្លាំង​ចុះ​ទៅ​អប់រំ​ណែនាំ​ជា​ប្រចាំ និង​ដាក់​កម្លាំង​ប្រចាំការ​ក្នុង​ការ​ជួយ​បញ្ចៀស​ដល់​អ្នក​រត់​តាក់ស៊ី​ដែល​ឈប់​រថយន្ត​ទម្លាក់​អីវ៉ាន់​រយៈពេល​យូរ គឺ​ខាង​កម្លាំង​របស់​គណៈ​គ្រប់គ្រង​មិន​អនុញ្ញាត​នោះ​ទេ ដោយសារ​កុំ​ឲ្យ​កក​ស្ទះ​ចរាចរណ៍​ដល់​ប្រជាពលរដ្ឋ​ពេល​ធ្វើ​ដំណើរ​ឆ្លងកាត់។

ប្រធាន​គ្រប់គ្រង​ចំណត​បេនឡាន​ផ្សារ​ធំ​ថ្មី បញ្ជាក់​ថា សម្រាប់​រថយន្ត​ទម្លាក់​ទំនិញ​មកពី​តាម​បណ្ដា​ខេត្ត​រយៈពេល​ខ្លី ខាង​កម្លាំង​លោក តែងតែ​បញ្ចៀស​ទៅ​កន្លែង​ដែល​មិន​មាន​ការ​កកស្ទះ​ដល់​អ្នក​ធ្វើ​ដំណើរ​តាម​ផ្លូវ​ឲ្យ​ចត ដើម្បី​ទម្លាក់​អីវ៉ាន់។

ជាមួយ​នេះ ប្រធាន​គ្រប់គ្រង​បេនឡាន​ផ្សារ​ធំ​ថ្មី ក៏បាន​សំណូមពរ​ប្រជាពលរដ្ឋ សូម​មេត្តា​យោគយល់​ចំពោះ​អ្នក​រត់​តាក់ស៊ី​រកស៊ី​ចិញ្ចឹម​ក្រពះ ព្រោះថា ដោយ​មាន​ការ​យោគយល់​ដល់​អ្នក​រត់​តាក់ស៊ី ទើប​លោក​តែងតែ​ចុះ​ណែនាំ​ជាប្រចាំ​ថ្ងៃ​តែម្ដង ដើម្បី​កុំ​ឲ្យ​មាន​ភាព​អ​សណ្ដាប់ធ្នាប់ ប៉ះពាល់​ការ​ធ្វើដំណើរ​របស់​ប្រជាពលរដ្ឋ​ឆ្លងកាត់ រួម​នឹង​អ្នក​ប្រកប​អាជីវកម្ម​នៅ​ក្បែរ​នោះ​ផង​ដែរ៕

អត្ថបទ ៖ រដ្ឋា , ម៉េង