លោក ភឺន ផល្លា បដិសេធការចុះផ្សាយព័ត៌មាន​ចោទថា បានរំលោភយកដីពលរដ្ឋនៅស្រុកកោះធំ

មេធាវីតំំណាងដោយអណត្តិលោក ភឺន ផល្លា ដែលត្រូវបានសារព័ត៌មានមួយចំនួនចុះផ្សាយថា បានរំលោភយកដីប្រជាពលរដ្ឋនៅស្រុកកោះធំ ខេត្តកណ្ដាលកាលពីកន្លងទៅ នាថ្ងៃតី១៤សីហាម្សិលមិញនេះ បានចេញមុខច្រានចោល និងបដិសេធការចុះផ្សាយនេះថា ជាការចុះផ្សាយមិនពិតធ្វើឱ្យប៉ះពាល់ដល់កេរ្តិ៍ឈ្មោះ កិត្តិយស និងសេចក្ដីថ្លៃថ្នូររបស់កូនក្ដីខ្លួនយ៉ាងធ្ងន់ធ្ងរ។

យោងតាមសេចក្ដីថ្លែងការរបស់លោក លី វិទូ មេធាវីតំណាងដោយអាណត្តិរបស់លោក ភឺន ផល្លា បានឲ្យដឹងថា ក្រុមហ៊ុនបានប្រមូលទិញដី ដោយមានការទទួលស្គាល់ពីអាជ្ញាធរត្រឹមត្រូវ និងដោះស្រាយគោលនយោបាយជូនប្រជាពលរដ្ឋក្នុងមូលដ្ឋានឃុំពោធិបាន ស្រុកកោះធំ ខេត្តកណ្ដាល និងបានបន្តកាន់កាប់ គ្រប់គ្រង ប្រើប្រាស់ និងអាស្រ័យផលនៅលើទីតាំងដីនេះរហូតមក ហើយទីតាំងដីនេះមានប័ណ្ណកម្មសិទ្ធិ (ប្លង់រឹង) ត្រឹមត្រូវធ្វើឡើងស្របតាមនីតិវិធីច្បាប់ ក្នុងនោះ ក្រុមហ៊ុនបានបោះបង្គោល ជីកព្រំ និងលើកទំនប់ក្រវ៉ាត់ព័ទ្ធជុំវិញទីតាំងដីផងដែរ ។

ថ្មីៗកន្លងមកនេះ ទើបតែមានក្រុមជនអាណាធិបតេយ្យ ដែលដឹកនាំដោយក្រុមទុច្ចរិតមានការចាត់តាំងត្រឹមត្រូវ ធ្លាប់បានដើរលួចលើកស្លាកជាច្រើនលើកច្រើនសារនៅលើទីតាំងដីរបស់ក្រុមហ៊ុន ក្នុងគោលបំណងញុះញង់ និងគៀងគរជនអាណាធិបតេយ្យឱ្យចូលមកកាន់កាប់ចាប់យកដី ដើម្បីធ្វើការបែងចែកគ្នាយកជាកម្មសិទ្ធិថែមទៀតផង ហើយក្រុមហ៊ុនក៏ធ្លាប់បានដាក់ពាក្យបណ្ដឹងប្ដឹងមេខ្យល់ ទៅរដ្ឋបាលស្រុកកោះធំ និងអធិការដ្ឋាននគរបាលស្រុកកោះធំ ថែមទៀតផង ។

តាមរយៈការផ្សាយបន្តផ្ទាល់នេះ បានបញ្ជាក់ថា ក្រុមជនអាណាធិបតេយ្យទាំងនោះ ជាអ្នករស់នៅក្នុងមូលដ្ឋានឃុំកោះធំ(ក) ស្រុកកោះធំ ខេត្តកណ្ដាល ដែលជាអ្នករស់នៅក្រៅមូលដ្ឋាន បាននាំគ្នាមកតវ៉ាទាមទារដីរបស់ក្រុមហ៊ុន ស្ថិតនៅក្នុងឃុំពោធិ៍បាន ស្រុកកោះធំ ខេត្តកណ្ដាល ទៅវិញ ដែលនេះជាការទាមទារដីខុសដែនរដ្ឋបាលទាំងស្រុង ។ សកម្មភាពទាំងនេះ គឺត្រូវបានដឹកនាំ និងមានការរៀបចំដោយក្រុមជនអាណាធិបតេយ្យ ដែលមានគំនិតទុច្ចរិត ញុះញង់ គៀងគរ បង្កភាពអសន្តិសុខ និងភាពអាណាធិបតេយ្យ ដោយប្រមូលផ្ដុំក្រុមជនអាណាធិបតេយ្យ មកធ្វើការតវ៉ាទាំងគ្មានឯកសារសំអាង និងគ្មានភស្តុតាងច្បាស់លាស់ ដោយគ្មានការបញ្ជាក់ទទួលស្គាល់ពីអាជ្ញាធរ ដើម្បីកេងចំណេញផលប្រយោជន៍ ហើយបានធ្វើឱ្យប៉ះពាល់ដល់កេរ្តិ៍ឈ្មោះ កិត្តិយស និងសេចក្ដីថ្លៃថ្នូររបស់កូនក្ដីខ្ញុំបាទយ៉ាងធ្ងន់ធ្ងរ៕