គម្រោងស្ថាបនាលូប្រអប់ទទឹង៤ម៉ែត្រ នៅផ្លូវជាតិលេខ៤​ កំពុងស្ថិតក្នុងដំណាក់កាលទី១ លើប្រវែងជិត៧គីឡូម៉ែត្រ

គម្រោងលូរំដោះទឹក ប្រភេទលូប្រអប់ដែលមានកម្ពស់២ម៉ែត្រ ទទឹង៤ម៉ែត្រ និងប្រវែង៦៥៦០ម៉ែត្រ ចាប់ពីក្រោមស្ពានអាកាស ផ្លូវក្រវាត់ក្រុងទី៣ កែងផ្លូវជាតិ៤ ឆ្លងកាត់ខណ្ឌកំបូល រហូតដល់ព្រំប្រទល់ឃុំបែកចាន ស្រុកអង្គស្នួល ខេត្តកណ្ដាល បាននិងកំពុងអនុវត្តក្នុងដំណាក់កាលទី១ ដើម្បីរំដោះជំនន់ទឹកភ្លៀងក្នុងមូលដ្ឋាន។

លោក ជា ឃឿន ប្រធានការិយាល័យសាធារណៈខណ្ឌកំបូល បានប្រាប់ភ្នាក់ងារសារព័ត៌មាន កម្ពុជាថ្មី នាព្រឹកថ្ងៃទី២២សីហា នេះថា ការដ្ឋានកំពុងសាងសង់លូរំដោះទឹកនេះ ជាគម្រោងរបស់មន្ទីរសាធារណៈការ និងដឹកជញ្ជូន រាជធានីភ្នំពេញ អនុវត្តដោយនាយកដ្ឋានថែទាំចម្រោះទឹកកខ្វក់ ទទួលសាងសង់ដោយ ក្រុមហ៊ុន PHNOM PENH PRECAST PLANTS ។

លោកបានបន្តថា បច្ចុប្បន្នគម្រោងនេះកំពុងសាងសង់ក្នុងដំណាក់កាលទីមួយ ចាប់ពីមុខបុរីពិភពថ្មីកំបូល ទៅបញ្ចប់ត្រឹមព្រំប្រទល់ឃុំបែកចាន និងដំណាក់កាលទី២ ទៅបញ្ចប់នៅក្រោមស្ពានអាកាសផ្លូវក្រវាត់ក្រុងទី៣ កែងផ្លូវជាតិ៤ មូលដ្ឋានសង្កាត់ចោមចៅទី៣ ហើយធ្វើតែម្ខាងប៉ុណ្ណោះ (ខាងត្បូងផ្លូវជាតិលេខ៤) គម្រោងនេះ គឺរយៈពេល១ឆ្នាំ ឬអាចលើសនេះ តាមស្ថានភាព។

លោក សុជាតិ ជាប្រជាពលរដ្ឋរស់នៅតំបន់នោះ បានសម្ដែងការអរគុណដល់អាជ្ញាធរដែលតែងគិតគូរពីទុក្ខកង្វល់ប្រជាពលរដ្ឋ ហើយសមិទ្ធផលនេះ នឹងជួយសម្រួលដល់ប្រជាពលរដ្ឋ ចំនួន២ខណ្ឌ រំដោះទឹកនារដូវរស្សា និងការជន់លិចដោយទឹកភ្លៀង ជាពិសេស ជួយសម្រួលយ៉ាងខ្លាំងដល់ការចេញចូលផ្ទះពលរដ្ឋ ដោយបច្ចុប្បន្នពលរដ្ឋត្រូវធ្វើស្ពានឆ្លងចេញចូលផ្ទះពីលើប្រឡាយទឹកចាស់៕

អត្ថបទ៖ សំណាង