ឆ្លងចរន្ដពីបង្គោលភ្លើង ផ្ទះពលរដ្ឋ២ខ្នងត្រូវបានអណ្ដាតភ្លើងឆាបឆេះទាំងព្រឹក

អគ្គិភ័យបានឆាបឆេះផ្ទះប្រជាពលរដ្ឋ២ខ្នងយ៉ាងសន្ធោសន្ធៅទាំងព្រឹកប្រលឹមបង្កមានការភ្ញាក់ផ្អើលរថយន្តពន្លត់អគ្គិភ័យចេញអន្តរាគមន៍ភ្លាមៗ សំណាងល្អគ្មានអ្នករងរបួស គ្រាន់តែខូចខាតសំភារៈក្នុងផ្ទះទាំងស្រុង។

ហេតុការណ៍នេះកើតឡើងនៅវេលាម៉ោង៧ព្រឹក ថ្ងៃទី២៤ខែសីហាឆ្នាំ២០២៤ ស្ថិតតាមបណ្តោយផ្លូវជាតិលេខ៥ ក្រុម២ ភូមិលូ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។

បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញផ្ទះលក់ចាប់ហួយមួយកន្លែងកំពុងរៀបចំអីវ៉ាន់លក់ហើយក៏កំពុងចាក់សាំងចូលដបសំរាប់លក់ផងដែរ។ ភ្លាមៗនោះបង្គាលភ្លើងមួយដើមនៅជាប់កន្លែងកើតហេតុបានឆ្លងចរន្តអគ្គិសនីធ្លាក់ផ្កាភ្លើងចំកន្លែងដាក់សាំងបណ្ដាលឲ្យមានការឆាប់ឆេះ ភ្លាមៗអ្នកនៅជិតកន្លែងកើតហេតុបាននាំគ្នាយកបំពង់ពន្លត់អគ្គិភ័យមកបាញ់តែមិនរលត់ ក៏រាយការណ៍ជូនសមត្ថកិច្ចមូលដ្ឋានដើម្បីបន្តទាក់ទងទៅសមត្ថកិច្ចជំនាញអគ្គិភ័យមកជួយអន្តរាគមន៍បាញ់ពន្លត់ ។

ក្នុងរង្វង់ប្រតិបត្តិការនេះរថយន្តពន្លត់អគ្គិភ័យបានមកដល់ទីតាំងចំនួន១០គ្រឿង បាញ់ពន្លត់រហូតរលត់ជាស្ថាពរ ។ ចំពោះមូលហេតុសមត្ថកិច្ចជំនាញស្រាវជ្រាវ៕

អត្ថបទ៖ ម៉េង