ពលរដ្ឋស្នើអាជ្ញាធរ និងគណៈគ្រប់គ្រងសាលាគួរមានវិធានការចំពោះការលក់ដូរភេសជ្ជៈគ្រឿងកំប៉ុងនៅមុខសាលារៀន

ប្រជាពលរដ្ឋរស់នៅក្នុងមូលដ្ឋានខណ្ឌ៧មករា បានសំណូមពរដល់អាជ្ញាធរជួយមានវិធាន និងដំណោះស្រាយឲ្យក្រុមអាជីវករលក់ដូរភេសជ្ជៈគ្រឿងកំប៉ុង នៅមុខបរិវេណសាលារៀនបាក់ទូក ដែលអាចធ្វើប៉ះពាល់ដល់សុខភាពកូនៗរបស់ពួកគាត់ជាខ្លាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បានធ្វើឡើងក្នុងវេទិកាផ្សព្វផ្សាយ និងពិគ្រោះយោបល់ ក្រោមអធិបតីភាពលោក សោម សុវណ្ណ ប្រធានក្រុមប្រឹក្សាខណ្ឌ៧មករា និងលោក ថេង សុថុល អភិបាលនៃគណៈអភិបាលខណ្ឌ៧មករា មន្រ្តីចម្រុះក្រោមឱវាទរដ្ឋបាលខណ្ឌ៧មករា ព្រមទាំងមានការចូលរួមពីប្រជាពលរដ្ឋជាច្រើននាក់ មកពីតាមបណ្តាសង្កាត់ទាំង៨ នៅសាលប្រជុំរបស់សាលាបាក់ទូក កាលពីរសៀលថ្ងៃទី១២ ខែកញ្ញាឆ្នាំ២០២៤ ម្សិលមិញ។

លោក ថេង សុថុល អភិបាលនៃគណៈអភិបាលខណ្ឌ៧មករា បានលើកឡើងថា សំណូមពរនេះពិតជាសំខាន់ណាស់ គឺដើម្បីផលប្រយោជន៍រួម សម្រាប់សិស្សានុសិស្ស និងអាណាព្យាបាលរបស់សិស្ស។ បញ្ហានេះ លោកនឹងពិភាក្សាជាមួយគណៈនាយកសាលាដើម្បីរកដំណោះស្រាយឲ្យបានសមរម្យណាមួយសម្រាប់សំណូមពររបស់ពលរដ្ឋ។

ក្នុងវេទិការនេះដែរ លោកអភិបាលខណ្ឌបានសង្កត់ធ្ងន់ថា អាជ្ញាធរថ្នាក់ប៉ុស្តិ៍រដ្ឋបាល និងសង្កាត់ ដែលជាអាណាព្យាបាលរបស់ពលរដ្ឋផ្ទាល់ ត្រូវយកចិត្តទុកដាក់ពីទុក្ខលំបាករបស់ពលរដ្ឋ។ ប៉ុស្តិ៍រដ្ឋបាលត្រូវមើលពីសន្តិសុខសុវត្ថិភាព សណ្ដាប់ធ្នាប់សាធារណៈ និងសង្កាត់ត្រូវបំរើពលរដ្ឋ ពីសេវាសាធារណៈឲ្យបានលឿនជូនពលរដ្ឋ៕

អត្ថបទ៖ សុភា