អាជ្ញាធរចុះកាយសាបបេតុងដែលពលរដ្ឋចាក់បិទផ្លូវទឹក ខណៈពលរដ្ឋថា ទោះកាយរួចក៏ទឹកមិនហូរដែរ ព្រោះប្រព័ន្ធលូចាស់មិនទាន់ស្តារ

អាជ្ញាធរខណ្ឌពោធិ៍សែនជ័យ នៅព្រឹកថ្ងៃទី១៧ ខែកញ្ញា ឆ្នាំ២០២៤ នេះ​ បានដាក់គ្រឿងចក្រឈូសឆាយកៀរសម្អាតផ្លូវមួយខ្សែក្នុងភូមិត្រពាំងថ្លឹង៤ សង្កាត់ចោមចៅទី១ ក្រោយពិនិត្យឃេីញប្រជាពលរដ្ឋចាក់សាបបេតុងលើផ្លូវជាច្រើនកន្លែង តាមមុខផ្ទះបណ្តាលឱ្យទឹកដក់លើផ្លូវ។

អាជ្ញាធរបានឱ្យដឹងថា ប្រជាពលរដ្ឋមួយចំនួនបានចាក់សាបបេតុងលើដងផ្លូវខាងផ្ទះរបស់ពួកគាត់ ដែលធ្វើឱ្យទឹកភ្លៀង និងទឹកបង្ហូរចេញពីតាមផ្ទះដក់ជន់លិចលើផ្លូវធ្វើឱ្យប៉ះពាល់បរិស្ថាន។

តែបើតាមប្រជាពលរដ្ឋបានលើកឡើងថា ក្នុងភូមិរបស់គាត់មានបណ្តាញលូតូចៗ ចាស់យូរឆ្នាំ ហើយកកស្ទះមកដល់បច្ចុប្បន្ន ពេលទឹកភ្លៀងមកម្តងៗមិនហូរចេញនោះទេ ហើយកន្លងមកក្នុងភូមិរបស់ពួកគាត់ក៏ធ្លាប់រងគ្រោះទឹកភ្លៀងជន់​លិចចូលដល់ក្នុងផ្ទះ បង្កប៉ះពាល់ខូចខាតទ្រព្យសម្បត្តិមួយចំនួន ទើបមានពលរដ្ឋមួយចំនួនចាក់បេតុងមកលើផ្លូវគ្រាន់បានដើរ។

ពលរដ្ឋបន្ថែមថា ទោះជាមិនចាក់សាបមកលើផ្លូវ ក៏ទឹកភ្លៀងនៅតែដក់ជន់លិច បើអាជ្ញាធរគ្រាន់តែកាយចេញ ខណៈប្រឡាយមេ បណ្តាញលូតូចៗ ចាស់ៗ ពុំមានស្តារឡើងវិញ ជាងនេះទៅទៀត ប្រឡាយមេជាច្រើនកន្លែង ត្រូវបានអ្នកមានលុយ ចាក់ដីលុបជិតសង់ផ្ទះល្វែងអស់ហើយ ទើបភ្លៀងមកម្តងៗតែងតែជន់លិចព្រោះតែគ្មានផ្លូវទឹកហូរ៕

អត្ថបទ៖ សុខា