មន្រ្តីសង្ឃ និងបុគ្គលមានឥទ្ធិពលអំពាវនាវឱ្យបញ្ឈប់ការផ្សាយល្បែងស៊ីសងអនឡាញ

មន្រ្តីសង្ឃ និងបុគ្គលមានឥទ្ធិពលលើបណ្តាញប្រព័ន្ធផ្សព្វផ្សាយសង្គម បានអំពាវនាវឱ្យបញ្ឈប់ការផ្សព្វផ្សាយល្បែងស៊ីសងអនឡាញខុសច្បាប់ ដែលកំពុងជះឥទ្ធិពលយ៉ាងធ្ងន់ធ្ងរដល់ការអភិវឌ្ឍប្រទេសជាតិ និងនាំឱ្យមានសោកនាដកម្មក្នុងគ្រួសារ។

ការអំពាវនាវនេះ ស្របពេលដែលមាននិន្នាការកើនឡើងនៃការលេងល្បែងអនឡាញនៅលើវេទិកាប្រព័ន្ធផ្សព្វផ្សាយសង្គម ដែលបង្កការគំរាមកំហែងយ៉ាងធ្ងន់ធ្ងរដល់សន្តិសុខ និងសណ្តាប់ធ្នាប់សាធារណៈ ទោះបីជាមានការខិតខំប្រឹងប្រែងរបស់រដ្ឋាភិបាលក្នុងការប្រយុទ្ធប្រឆាំង និងដាក់ចេញវិធានបង្ក្រាបជាបន្តបន្ទាប់ក្តី។ កាលពីពេលថ្មីៗនេះ មានហេតុការណ៍ដ៏សោកសៅមួយ ដោយសារតែល្បែងអនឡាញ បុរសម្នាក់បានផុងខ្លួននៅក្នុងល្បែងខុសច្បាប់នេះ នាំឱ្យជំពាក់បំណុលវ័ណ្ឌក ហើយបានសម្លាប់ប្រពន្ធ និងកូន រួចចងកសម្លាប់ខ្លួនតាមក្រោយ។ នេះគ្រាន់តែជាករណីមួយប៉ុណ្ណោះ នៅមានករណីជាច្រើនទៀត​ ដែលផុងខ្លួនទៅនឹងការភ្នាល់ល្បែងអនឡាញ។

ជុំវិញបញ្ហានេះ ព្រះមេធានុរ័ក្ខ បណ្ឌិត គូ​ សុភាព ព្រះធម្មធរគណរាជធានីភ្នំពេញ សមាជិកការិយាល័យព័ត៌មាន ផ្សព្វផ្សាយ និងទំនាក់ទំនងអន្តរជាតិ នៃលេខាធិការដ្ឋានគណៈសង្ឃនាយក​ មានសង្ឃដីកា អំពាវនាវដល់បងប្អូនគួរឈប់ផ្សាយឱ្យខ្មែរយើងលេងល្បែង Online ក្តី Offline ក្តី។ ព្រះតេជគុណ មានសង្ឃដីកា ដាស់តឿនថា ការលេងល្បែងនាំឱ្យអន្តរាយ មានសោកនាដកម្មក្នុងគ្រួសារ និងជាអំពើបាប ។

ជាមួយគ្នានេះ ព្រះបញ្ញាមុនីញាណ ហាក់ សៀងហៃ ព្រះប្រធានអង្គការសាសនាដើម្បីការអប់រំនៃកម្ពុជា មានសង្ឃដីកា​ នៅលើបណ្តាញសង្គមថា៖«ប្រយ័ត្នប្រយែង សព្វថ្ងៃមានល្បែងអនឡាញច្រើនណាស់ កុំឈ្លក់វង្វេងចង់ឈ្នះផ្តេសផ្តាស តែគិតមិនច្បាស់នាំឱ្យវិនាស»។

ចំណែក អតីតព្រះសង្ឃ លោក សាន សុជា មានប្រសាសន៍ថា ល្បែងតែងវិនាស គប្បីប្រជាជនប្រុសស្រីគេចចេញឱ្យឆ្ងាយពីល្បែងស៊ីសង។ លោកកត់សម្គាល់ថា ជាទូទៅក្រុមហ៊ុនដែលវិយោគល្បែងធំៗគេមានប្រៀប មិនងាយចាញ់អ្នកលេងល្បែងនោះទេ។ លោកបានថ្លែងថា៖«អ្នកលេងល្បែង ពេលខ្លះឈ្នះបានពីរ បី អាទិត្យ ឃើញជិះម៉ូតូ ប៉ុន្តែក្រោយមកពេលចាញ់ល្បែងលក់ដី និងផ្ទះសម្បែង។ ល្បែងដែលនាំឱ្យវិនាសទ្រព្យសម្បត្តិ​ គឺជាល្បែងដែលយើងចង់ឈ្នះធ្វើមានបាន»។

ក្នុងន័យនេះ លោកថា ការលេងល្បែងលក្ខណៈក្រុមគ្រួសារម្តងម្កាល បង្កើនបរិយាកាសសប្បាយនាឱកាសបុណ្យទានម្តងៗ ដែលជាការលេងមិនចង់ចាញ់ឈ្នះនោះមិនអីទេ ប៉ុន្តែបុគ្គលដែលញៀននឹងល្បែង ហើយលេងល្បែងដើម្បីចង់ក្លាយជាអ្នកមានដោយសារល្បែងនឹងនាំវិនាសដល់ខ្លួន។

កន្លងទៅ និយ័តករទូរគមនាគមន៍កម្ពុជា (ន.ទ.ក.) បានសហការ ជាមួយអគ្គស្នងការដ្ឋាននគរបាលជាតិនៃក្រសួងមហាផ្ទៃ ចាត់វិធានការបិទខ្ទប់គេហទំព័ររាប់ពាន់ករណី បន្ទាប់ពីរកឃើញថាគេហទំព័រទាំងនេះ បានធ្វើប្រតិបត្តិការ និងផ្តល់សេវាលេងល្បែងស៊ីសងខុសច្បាប់ តាមប្រព័ន្ធអនឡាញនៅក្នុងព្រះរាជាណាចក្រកម្ពុជា។

ន.ទ.ក. នឹងបន្តសហការជាមួយអគ្គស្នងការដ្ឋាននគរបាលជាតិ អាជ្ញាធរពាក់ព័ន្ធ និងប្រតិបត្តិករ ទូរគមនាគមន៍ទាំងអស់ ដើម្បីលុបបំបាត់រាល់គេហទំព័រដែលធ្វើប្រតិបត្តិការនិងផ្តល់សេវាលេងល្បែងស៊ីសង តាមប្រព័ន្ធអនឡាញខុសច្បាប់ ផ្ទុយនឹងសារាចរណែនាំរបស់រាជរដ្ឋាភិបាល ចុះថ្ងៃទី ១៨ ខែសីហា ឆ្នាំ២០១៩ ស្តីពីការពង្រឹងការគ្រប់គ្រងអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ីនធឺណិតអនឡាញ ក្នុងនិងក្រៅប្រទេសគ្រប់ប្រភេទ។

ន.ទ.ក. បានសង្កត់ធ្ងន់ថា៖«សកម្មភាពនេះ បង្កផលប៉ះពាល់ ដល់សន្តិសុខ សណ្តាប់ធ្នាប់សាធារណៈនិងរបៀបរៀបរយក្នុងសង្គម»។

សម្តេចនាយករដ្ឋមន្រ្តី ហ៊ុន ម៉ាណែត កាលពីខែកុម្ភៈ ឆ្នាំ ២០២៤ បានចេញបញ្ជាឱ្យអភិបាល-រាជធានីខេត្តទាំងអស់ នៅទូទាំងប្រទេស ត្រួតពិនិត្យលើទីតាំងល្បែងផ្សងសំណាងនៅតាមមូលដ្ឋានក្នុងដែនសមត្ថកិច្ចរបស់ខ្លួន ហើយក្នុងករណីបន្តកើតមានថ្មីទៀត ត្រូវចាត់វិធានការបិទជាបន្ទាន់។

សម្តេចសង្កត់ធ្ងន់ថា៖«ពេលវេលានេះ​និងបន្តទៅមុខ គឺជាពេលវេលាដែលត្រូវចូលរួមទាំងអស់គ្នា អនុវត្តគោល​នយោបាយ​រាជរដ្ឋាភិបាលក្នុងការបង្កើនការកសាង និងពង្រាយសមិទ្ធផលវិជ្ជមាន ដូចជាហេដ្ឋារចនាសម្ព័ន្ធ ផ្លូវថ្នល់ ភ្លើង ប្រឡាយទឹក បង្កើតរោងចក្រសហគ្រាសនៅតាមមូលដ្ឋាន ដើម្បីបង្កើនប្រាក់ចំណូលជូនពលរដ្ឋ មិនមែនជាពេលវេលាដែលត្រូវយកចិត្តទុកដាក់ក្នុងពង្រាយទីតាំងល្បែង​នោះទេ»៕