អាវុធហត្ថរាជធានីបង្ក្រាបទីតាំងគ្រឿងញៀនមួយកន្លែងជ្រកក្រោមស្លាកយីហោ ហាងតែ ឃាត់ខ្លួនមនុស្សជាង៩០នាក់

កម្លាំងកងរាជអាវុធហត្ថ​រាជធានីភ្នំពេញ កាលពីយប់រំលងអធ្រាត្រថ្ងៃទី៤ធ្នូ បានឆ្មក់ចុះបង្ក្រាបទីតាំងប្រើប្រាស់ និងចែក​ចាយគ្រឿងញៀនដ៏ធំមួយកន្លែងជ្រកក្រោមស្លាកយីហោ ហាងតែ ឃាត់ខ្លួនមនុស្សប្រុសស្រីសរុបចំនួន៩៣នាក់ និងថ្នាំញៀនមួយចំនួន។

ប្រត្តិបត្តការចុះបង្ក្រាបគ្រឿងញៀនទ្រង់ទ្រាយធំនេះ បានធ្វើឡើងក្រោមការដឹកនាំបញ្ជាផ្ទាល់ដោយឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ក្រោមការសម្របសម្រួលនីតិវិធីពីលេាក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នៅចំណុចភោជនីយដ្ឋាន ហាងតែ ស្ថិតក្នុងភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។

ក្នុងរង្វង់ប្រត្តិបត្តការនេះ កម្លាំងកងរាជងាវុធហត្ថបានឃាត់ខ្លួនជនជាតិខ្មែរ ចិន វៀតណាម សរុបចំនួន ៩៣នាក់ (ស្រី៤៩នាក់) ព្រមជាមួយថ្នាំញៀនចម្រុះជាង៤០០កញ្ចប់ បំពង់ខ្យល់ជាង១០០បំពង់ និងឧបករណ៍ប្រើប្រាស់គ្រឿងញៀនមួយចំនួន។

ក្រុមជនសង្ស័យដែលឃាត់ខ្លួន ត្រូវបានកម្លាំងកងរាជអាវុធហត្ថរាជធានីភ្នំពេញ បានបញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីបន្តនីតិវិធីច្បាប់៕

អត្ថបទ៖ សុខា