មន្ត្រីជំនាញជួសជុលកែសម្រួលជម្រាលស្ពានប្រឡាយទឹកស្អុយក្រាំងធ្នង់ បន្ទាប់ពីបង្កគ្រោះថ្នាក់ញឹកញាប់

បន្ទាប់ពីបង្កគ្រោះថ្នាក់ដល់អ្នកដំណើរនៅពេលយប់ញឹកពាប់នៅចំណុចជម្រាលស្ពានប្រឡាយទឹកស្អុយក្រាំងធ្នង់ មន្ត្រីជំនាញការិយាល័យសាធារណការ បរិស្ថាន និងអនាម័យខណ្ឌសែនសុខ សហការជាមួយមន្ទីរសាធារណៈការ និងដឹកជញ្ជូនរាជធានីភ្នំពេញ បានជួសជុលកែសម្រួលដើម្បីបង្កភាពងាយស្រួលដល់អ្នកដំណើរ។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ បរិស្ថាន និងអនាម័យខណ្ឌសែនសុខ បានប្រាប់ កម្ពុជាថ្មី ឱ្យដឹងនាព្រឹកថ្ងៃទី២៥ធ្នូ នេះថា ការជួសជុលកែសម្រួលជម្រាលនៅចំណុចស្ពានប្រឡាយទឹកស្អុយក្រាំងធ្នង់ នៅលើផ្លូវសម្ដេចជាសុីម នេះ ក្រុមមន្ត្រីជំនាញបានធ្វើការអ៊ុតកៅស៊ូប្រវែង២០ម៉ែត្រ ខាងកើត និងខាងលិច ផ្លូវ ២០ម៉ែត្រ ហើយក៏បានបន្ថែមនូវចំណាំងផ្លាតនៅបង្កាន់ដៃស្ពាន ដើម្បីបង្កើនភាពងាយស្រួលក្នុងការធ្វើដំណើរឆ្លងកាត់របស់ប្រជាលរដ្ឋ និងមិនបង្កគ្រោះថ្នាក់តទៅទៀត។

ក្នុងនាមរដ្ឋបាលខណ្ឌសែនសុខ លោក ធាម ច័ន្ទសេរីវុឌ្ឍ បានអំពាវនាវដល់ប្រជាពលរដ្ឋ និងអ្នកធ្វើដំណើរគ្រប់មធ្យោបាយទាំងអស់ មេត្តាយោគយល់​ និងអធ្យាស្រ័យ​ ចំពោះការរំខានដោយការដ្ឋាន​ និងសូមបង្កេីនការប្រុងប្រយ័ត្នពេលបេីកបរ ដោយការរដ្ឋានដំណើរការរយៈពេល២ថ្ងៃ គឺថ្ងៃទី២៥និង២៦នេះ៕

អត្ថបទ៖ សំណាង