នាយកដ្ឋានព្រហ្មទណ្ឌ ស្រាវជ្រាវឃាត់ខ្លួនជនដៃដល់ពីរនាក់ ពាក់ព័ន្ធករណីកាប់សម្លាប់

កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការជាមួយកម្លាំងនគរបាលនៃស្នងការដ្ឋាននគរបាលខេត្តក្រចេះ និងខេត្តមណ្ឌលគិរី បានស្រាវជ្រាវឃាត់ខ្លួនក្រុមជនដៃដល់ចំនួន២នាក់ ពាក់ព័ន្ធករណីកាប់សម្លាប់ជនរងគ្រោះម្នាក់កាលពីថ្ងៃទី២១ ខែធ្នូ កន្លងទៅនៅស្រុកស្នួល ខេត្តក្រចេះ។

ប្រតិបត្តិការឃាត់ខ្លួនក្រុមជនដៃដល់នេះ បានធ្វើឡើងជាបន្តបន្ទាប់ក្រោយពីជនដៃដល់ធ្វើសកម្មភាពរួច និងព្យាយាមគេចខ្លួន រហូតថ្ងៃទី២៦ ខែធ្នូ ឆ្នាំ២០២៤ ទើបកម្លាំងជំនាញកំណត់បានទីតាំងលាក់ខ្លួនរបស់ជនសង្ស័យ និងឈានដល់ការចាប់ខ្លួនបាននៅចំណុចភូមិខ្មូម ឃុំស្រែឈូក ស្រុកកែវសីមា ខេត្តមណ្ឌលគិរី។ ជនដៃដល់ទាំងនាក់មានឈ្មោះ ឌួង ឡង់ឌី (ហៅភួង) ភេទប្រុស អាយុ១៨ឆ្នាំ រស់នៅភូមិស្រែថ្មី ឃុំខ្សឹម ស្រុកស្នួល ខេត្តក្រចេះ។ និងឈ្មោះ សឿន មិថុនា (ហៅខ្មៅ) ភេទប្រុស អាយុ១៨ឆ្នាំ រស់នៅភូមិស្រែថ្មី ឃុំខ្សឹម ស្រុកស្នួល ខេត្តក្រចេះ។

តាមរបាយការណ៍របស់នាយកដ្ឋាននគរបាលព្រហ្មទណ្ឌ ជនសង្ស័យទាំងពីរនាក់បានសារភាពថា ពួកខ្លួនពិតជាបានធ្វើសកម្មភាពកាប់សម្លាប់ទៅលើជនរងគ្រោះឈ្មោះ ឃឿន អឿន ភេទប្រុស អាយុ៣១ឆ្នាំ ប្រាកដមែន ដោយសារតែកន្លងមក ជនរងគ្រោះបានធ្វើសកម្មភាពកាប់មកលើពួកខ្លួន ទើបពួកខ្លួនមានការគុំគួន រហូតដល់មានករណីខាងលើកើតឡើង។ ជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ឌប្រគល់ជូនស្នងការដ្ឋាននគរបាលខេត្តក្រចេះដែលជាម្ចាស់ករណី ដើម្បីកសាងសំណុំរឿងតាមនីតិវិធីបន្ត។

សូមបញ្ជាក់ថា កាលពីថ្ងៃទី២១ ខែធ្នូ ឆ្នាំ២០២៤ វេលាម៉ោង១៦និង១០នាទី នៅចំណុចផ្លូវលំ ស្ថិតនៅភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ ក្រុមជនដៃដល់បានជិះម៉ូតូ១គ្រឿង ម៉ាកវ៉េវឆ្លាម ពណ៌ខ្មៅ ស្ទាក់កាប់ទៅលើជនរងគ្រោះឈ្មោះ ឃឿន អឿន ភេទប្រុស អាយុ៣១ឆ្នាំ រស់នៅភូមិឃុំកើតហេតុ បណ្ដាលឲ្យស្លាប់ភ្លាមៗនៅកន្លែងកើតហេតុ។ ក្រោយពីធ្វើសកម្មភាពរួចក្រុមជនដៃដល់បានគេចខ្លួនបាត់ ដោយបន្សល់ទុកវត្ថុតាងមួយចំនួនរួមមាន ដាវចំនួន ១ដើម កាំបិតផ្គាក់ចំនួន ១ដើម និងដំបងឈើចំនួន១ដើម៕

អត្ថបទ៖​ សុខុម