អាជ្ញាធរខេត្តតាកែវ ចាប់ផ្ដើម ចាក់វ៉ាក់សាំងអាមេរិក Johnson and Johnson ជូនពលរដ្ឋ

(តាកែវ)៖ វ៉ាក់សាំងការពារជំងឺកូវីដ-១៩ ដែលជាជំនួយរបស់អាមេរិក តាមយន្តការកូវ៉ាក់ ប្រភេទ Johnson and Johnson ចំនួន៣ម៉ឺនដូស ត្រូវបានយកទៅចាក់ជូនប្រជាពលរដ្ឋ នៅស្រុកកោះអណ្តែត នៃខេត្តតាកែវ។ ពិធីបើក​យុទ្ធនាការចាក់វ៉ាក់សាំងនេះ ធ្វើឡើងនៅព្រឹកថ្ងៃទី៥ ខែសីហា ឆ្នាំ២០២១នេះ ក្រោមអធិបតីភាពលោក អ៊ូច ភា អភិបាល នៃគណៈអភិបាលខេត្តតាកែវ និងមានការចូលរួម ពីលោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្ត ព្រមទាំងមន្ត្រីពាក់ព័ន្ធមួយចំនួនទៀត។

លោក អ៊ូច ភា អភិបាលខេត្តតាកែវ បានថ្លែងអំណរគុណ យ៉ាងជ្រាលជ្រៅបំផុត ចំពោះសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលសម្ដេចបានខិតខំ ក្នុងការជួយសង្រ្គោះអាយុជីវិតប្រជាពលរដ្ឋ តាម រយ:ការស្វែងរកវ៉ាក់សាំង មកពីបណ្តាប្រទេសនានា យកមកចាក់ជូនប្រជាពលរដ្ឋ បានជាបន្តបន្ទាប់ ដោយឥតគិតថ្លៃ។

លោកអភិបាលបានជម្រាបជូនដែរថា នៅពេលខាងមុខឆាប់ៗនេះ វ៉ាក់សាំងការពារជំងឺកូវីដ-១៩ សម្រាប់ចាក់ជូនកុមារ និងយុវវ័យ នឹងមកដល់ខេត្តតាកែវ។ ដូច្នេះសូមអាណាព្យាបាលកុមារ និងយុវវ័យ ដែលមានអាយុ ចាប់ពី១២ឆ្នាំ ដល់ក្រោម១៨ឆ្នាំ នាំកូនចៅរបស់ខ្លួន មកទទួលវ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា។

ដោយឡែកតាមការបញ្ជាក់ពី លោក គិន ភក្ដី អភិបាលស្រុកកោះអណ្ដែត បានឲ្យដឹងថា រដ្ឋបាលស្រុក បានសហការ ជាមួយការិយាល័យសុខាភិបាលស្រុក រៀបចំទីតាំងចំនួន៤ សម្រាប់ការចាក់វ៉ាក់សាំងជូនពលរដ្ឋ។ ក្នុងនោះមាន មន្ទីរពេទ្យបង្អែកកោះអណ្តែត សាលាបឋមសិក្សាកោះអណ្តែត សាលាបឋមសិក្សាក្រពុំឈូក និងសាលាបឋមសិក្សាព្រៃមេលង ដោយដំណើរការចាប់ពីម៉ោង៧ និង៣០នាទីព្រឹក រហូតដល់ម៉ោង៤ល្ងាច ដោយប្រជាពលរដ្ឋ ត្រូវភ្ជាប់មក ជាមួយអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន សំបុត្រកំណើត សៀវភៅគ្រួសារ ឬឯកសារបញ្ជាក់អត្តសញ្ញាណ។

ចំពោះចំនួន នៃវ៉ាក់សាំងការពារជំងឺកូវីដ-១៩ ប្រភេទ Johnson and Johnson នេះ ត្រូវបានលោក នុត ស៊ីណាត ប្រធានមន្ទីរសុខាភិបាលខេត្តតាកែវ បញ្ជាក់នៅរសៀលថ្ងៃទី៥ ខែសីហា ឆ្នាំ២០២១នេះថា រាជរដ្ឋាភិបាលបានផ្តល់មកខេត្តតាកែវ សម្រាប់ចាក់ជូនប្រជាពលរដ្ឋ ចំនួន៣ម៉ឺនដូស៕ (ដោយ)៖ វីរៈ