កីឡា

លោក McConkey ថា បើមិនជួប ភ្នំពេញក្រោន វគ្គ ៨ ក្រុម នឹងចំណេញច្រើនសម្រាប់ កម្ពុជា

បានផុស

៦ ខែ មុន

នៅ

ថ្ងៃអាទិត្យ ២ វិច្ឆិកា ២០២៥

ដោយ

គ្រូបង្គោលក្រុម ព្រះខ័នរាជស្វាយរៀង លោក Matthew McConkey ចាត់ទុកការជួបក្រុម ភ្នំពេញក្រោន នៅវគ្គ ៨ ក្រុមចុងក្រោយពាន AFC Challenge League គឺមិនសូវចំណេញច្រើនសម្រាប់ចំណាត់ថ្នាក់ក្លិបលីគបាល់ទាត់កំពូលកម្ពុជា ក្នុងចំណាត់ថ្នាក់អាស៊ី AFC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង ត្រូវជួបជាមួយក្រុម ភ្នំពេញក្រោន នៅវគ្គ ៨ ក្រុមចុងក្រោយពាន ACGL រដូវកាលនេះ បន្ទាប់ពីពួកគេឈរនៅលេខ ១ ក្នុងពូល D ក្រោយថ្ងៃទី ១ ខែ វិច្ឆិកា ឆ្នាំ ២០២៥ បានស្មើគ្នា ២-២ ទល់នឹងក្រុម Manila Digger FC នៅពហុកីឡដ្ឋានជាតិមរតកតេជោ ខណៈ ភ្នំពេញក្រោន ឈរនៅលេខ ២ ក្នុងពូល E។

ក្រោយបញ្ចប់ការប្រកួតទល់នឹងក្រុម Manila Digger FC លោក McConkey ត្រូវបានអ្នកសារព័ត៌មានសួរ ថា តើវាជារឿងល្អប្រសើរសម្រាប់ក្រុមលោកទេ ដែលត្រូវជួប ភ្នំពេញក្រោន នៅវគ្គបន្ត? ភ្លាមនោះគ្រូបង្វឹកសញ្ជាតិ អៀរឡង់ បានមានប្រសាសន៍ ថា៖ «ជាថ្មីម្តងទៀត ដូចខ្ញុំបាននិយាយពីមុនមកហើយ វាមិនមែនជាអ្វីដែលយើងអាចគ្រប់គ្រងបានទេ។ ដូច្នេះយើងពិតជាមិនបានគិតច្រើនអំពីវានោះទេ។ ជាក់ស្តែង យើងស្គាល់ពួកគេច្បាស់។ យើងបានលេងទល់ពួកគេ ២ ដងហើយ នៅដើមរដូវកាលនេះ។ ការប្រកួត គឺតឹងតែងទាំង ២ ប្រកួត»។

លោក McConkey បានបន្តទៀត ថា៖ «ខ្ញុំគិតថា វានឹងល្អប្រសើរសម្រាប់កម្ពុជា បើយើងមិនជួបគ្នាឯងនៅជុំបន្ទាប់ ព្រោះវាជាឱកាសល្អជាងនេះ ក្នុងការដណ្តើមពិន្ទុសម្រាប់ចំណាត់ថ្នាក់លីគ (ក្នុង AFC)។ ខ្ញុំគិតថា វានឹងនៅតែជាការប្រកួត ដែលគួរឱ្យចាប់អារម្មណ៍។ ខ្ញុំមិនដឹងថា ពីមុនធ្លាប់មានប្រវត្តិច្រើនដងដែរឬទេ ដែលក្រុមកម្ពុជា ២ បានជួបប្រកួតគ្នាជាលក្ខណៈអន្តរជាតិបែបនេះ។ ប្រហែលជានេះជាលើកទីមួយ ខ្ញុំមិនដឹងទេ។ ដូច្នេះខ្ញុំគិតថា វានឹងក្លាយជាការប្រកួតដ៏ល្អ និងជាឱកាសល្អសម្រាប់ប្រទេស»។

តាមការលើកឡើងរបស់លោក McConkey គឺលោកមិនអាចគ្រប់គ្រងការប្រកួតនៅពេលអនាគត ថាត្រូវជួប ភ្នំពេញក្រោន ឬមិនជួបនៅវគ្គ ៨ ក្រុមពាន ACGL បាននោះទេ។ យ៉ាងណា ការជួប ភ្នំពេញក្រោន នឹងក្លាយជាការប្រកួតដ៏តឹងតែង ព្រោះលោកធ្លាប់ជួបពួកគេ ២ លើករួចមកហើយនៅដើមរដូវកាលនេះ។

រូបភាពអំឡុងការប្រកួតលីគរវាង ព្រះខ័នរាជស្វាយរៀង និង ភ្នំពេញក្រោន

លោកបានបន្ថែម ថា វានឹងក្លាយជារឿងប្រសើរជាងនេះ ប្រសិនបើក្រុមលោកមិនទាន់ជួប ភ្នំពេញក្រោន នៅវគ្គ ៨ ក្រុម ព្រោះករណីបើក្រុមទាំង ២ ត្រូវជួបគូប្រជែង ដែលជាក្រុមផ្សេងរៀងៗខ្លួន នោះនឹងអាចជួយដណ្តើមពិន្ទុនៅក្នុងចំណាត់ថ្នាក់លីគ AFC បន្ថែមទៀត សម្រាប់ កម្ពុជា។

គួរបញ្ជាក់ ថា ការប្រកួតវគ្គ ៨ ក្រុមចុងក្រោយរវាង ព្រះខ័នរាជស្វាយរៀង និង ភ្នំពេញក្រោន នឹងធ្វើឡើង ២ ជើង ដោយជើងទី ១ ធ្វើនៅថ្ងៃទី ៥ ខែ មីនា និងជើងទី ២ ធ្វើនៅថ្ងៃទី ១២ ខែ មីនា ឆ្នាំ ២០២៦៕