កីឡាករ Miura សាងភាពភ្ញាក់ផ្អើល ដោយចុះកុងត្រាជាមួយក្លិបថ្មី ក្នុង​វ័យ ៥៨ ឆ្នាំទៅហើយ

កីឡាករបាល់ទាត់សញ្ជាតិ ជប៉ុន Kazuyoshi Miura កំពុងសាងភាពភ្ញាក់ផ្អើលនៅក្នុងវិស័យបាល់ទាត់ ដោយបច្ចុប្បន្នមានវ័យ ៥៨ ឆ្នាំទៅហើយ ប៉ុន្តែនៅតែអាចបន្តលេងជាកីឡាករអាជីពទៀតបាន ដោយ​លោក​ទើបតែព្រមព្រៀងចុះកិច្ចសន្យាផ្លាស់ទៅក្លិបថ្មីមួយនៅលីគទី ៣ របស់ ជប៉ុន។

យោងតាមសារព័ត៌មាន The Japan Times ខ្សែប្រយុទ្ធវ័យ ៥៨ ឆ្នាំរូបនេះ គ្រោងនឹងចូលរួមជាមួយក្លិប Fukushima United ដែលស្ថិតនៅលីគទី ៣ ជប៉ុន តាមរយៈលក្ខខណ្ឌខ្ចីជើងរយៈពេលមួយឆ្នាំ ពីក្លិប Suzuka។ ការផ្លាស់ប្តូរនេះមិនទាន់ត្រូវបានប្រកាសជាផ្លូវការនៅឡើយទេ ប៉ុន្តែការប្រកាសត្រូវបានគេរំពឹង ថា នឹងធ្វើឡើងនៅម៉ោង ១១:១១ នាទីព្រឹក ថ្ងៃទី ១១ ខែមករា ឆ្នាំ ២០២៦ ដើម្បីគោរពដល់លេខអាវរបស់លោក ដែលពាក់លេខ ១១។

រម្លឹកប្រវត្តិត្រួសៗ កីឡាករ Miura ដែល​បានកើតនៅឆ្នាំ ១៩៦៧ បានចាប់ផ្តើមលេងបាល់ទាត់អាជីពជាលើកដំបូងនៅឆ្នាំ ១៩៨៦ ជាមួយក្លិប Santos ក្នុងប្រទេសប្រេស៊ីល។ ប្រការនេះ មានន័យថា លោក​បានលេងបាល់ទាត់អាជីពជិត ៤ ទសវត្សមកហើយ។

ក្នុងអំឡុងអាជីព លោក Miura បានលេងឱ្យក្លិបជាច្រើននៅប្រទេសប្រេស៊ីល ជប៉ុន អ៉ីតាលី និងអូស្ត្រាលី។ លោក​មានពេលវេលាជោគជ័យខ្លាំងបំផុតជាមួយក្រុម Verdy Kawasaki ដែលបានចំណាយពេល ៨ ឆ្នាំ និងស៊ុតបញ្ចូល​ទីបាន ១១០ គ្រាប់។ លោក​ក៏ជាកីឡាករសំខាន់របស់ក្រុមជម្រើសជាតិជប៉ុនពីមុនផងដែរ ដោយស៊ុតបញ្ចូលទីបាន ៥៥ គ្រាប់ និងជួយឱ្យក្រុមរហស្សនាមដាវសាំម៉ូរ៉ៃឈ្នះពាន AFC Asian Cup កាលពីឆ្នាំ ១៩៩២។

កីឡាករ Miura មិនទាន់គិតគូអំពីការចូលនិវត្តន៍នៅឡើយទេ ទោះបីជាលោកមានវ័យ​ដល់ទៅ ៥៨ ឆ្នាំក៏ដោយ។ លោកធ្លាប់បានបង្ហើប ថា ប្រសិនបើរាងកាយរបស់លោកនៅអាចទ្រាំទ្របាន នោះលោកនឹងបន្តលេងរហូត ដល់វ័យ ៨០ ឆ្នាំ៕

ប្រែសម្រួល៖ សេម កុសល
ប្រភព៖ Sportbible