កំណត់ត្រាមិនចាញ់ ១៥ ប្រកួតជាប់គ្នារបស់ជើងខ្លាំងចិន Ouyang Feng ត្រូវបានបញ្ចប់

កំណត់ត្រាមិនចាញ់សោះរបស់កំពូលអ្នកប្រដាល់ឃីគបុកស៊ីងចិន Ouyang Feng ចំនួន ១៥ ប្រកួតជាប់គ្នា ក្នុងរយៈពេល ៣ ឆ្នាំ ត្រូវបានបញ្ចប់ ក្រោមថ្វីដៃកីឡាករ ប្រេស៊ីល Jonas Salsicha។

កីឡាករ Ouyang Feng ត្រូវបានគេចាត់ទុកជាកីឡាករឃីគបុកស៊ីងលំដាប់កំពូល​ម្នាក់របស់ប្រទេសចិន បន្ទាប់ពីរូបគេចាប់ផ្តើមឡើងប្រកួតអាជីពតាំងពីឆ្នាំ ២០១៨ ដល់ខែ កញ្ញា ឆ្នាំ ២០២៥ ដោយ​ស្គាល់រស់ជាតិចាញ់ត្រឹមតែ ៣ លើកគត់​ក្នុង​ចំណោម​ការប្រកួតសរុប ៤៨ លើក។ កីឡាករវ័យ ២៨ ឆ្នាំរូបនេះ បានគ្រងខ្សែក្រវាត់ធំៗដល់ទៅ ៣ ខ្សែ​គឺ​ K-1 ទម្ងន់​៧០គីឡូក្រាម, ខ្សែក្រវាត់ពិភពលោក Wu Lin Feng ទម្ងន់ ៧០ គីឡូក្រាម និងនៅឆ្នាំ ២០២៥ ទើបដណ្តើមខ្សែក្រវាត់ពិភពលោក Wu Lin Feng World MAX ទម្ងន់ ៧០ គីឡូក្រាម។

ជាមួយគ្នានេះ កីឡាករ Ouyang Feng បានធ្វើឱ្យអ្នកគាំទ្រកីឡាឃីគបុកស៊ីង មានការចាប់អារម្មណ៍ជាខ្លាំង បន្ទាប់ពីកាន់កំណត់ត្រាប្រកួតមិនចាញ់សោះចំនួន ១៥ ប្រកួតជាប់គ្នា ដោយរាប់ពីឆ្នាំ ២០២២ មក។ ទោះបីជាយ៉ាងណា កំណត់ត្រានេះត្រូវបានបញ្ចប់​កាល​ពី​ថ្ងៃទី ១៥ ខែ វិច្ឆិកា ឆ្នាំ ២០២៥ ក្រោមថ្វីដៃកីឡាករ ប្រេស៊ីល Jonas Salsicha។

ជំនួបនេះ គឺជាការប្រកួតវគ្គ ៨ នាក់ចុងក្រោយ ដែលធ្វើឡើងនៅទីក្រុង តូក្យូ ប្រទេស ជប៉ុន ដើម្បីដណ្តើមខ្សែក្រវាត់ពិភពលោក K-1 World MAX ទម្ងន់ ៧០ គីឡូក្រាម។ Ouyang Feng បានបញ្ចប់ការប្រកួត ៣ ទឹកពេញយ៉ាងស្វិតស្វាញទល់នឹងកីឡាករ Jonas Salsicha ហើយចុងក្រោយរូបគេបានចាញ់ដោយពិន្ទុ។

ដូច្នេះការបរាជ័យនេះ បានធ្វើឱ្យ Ouyang Feng ​ធ្លាក់​ចេញពីការឡើងវគ្គបន្ត ដើម្បីដណ្តើមខ្សែក្រវាត់ K-1 World MAX ទម្ងន់ ៧០ គីឡូក្រាមហើយ។ គួរបញ្ជាក់ ថា អ្នកប្រដាល់ចិនរូបនេះ ធ្លាប់ដណ្តើមបានខ្សែក្រវាត់របស់ស្ថាប័ន K-1 មួយរួចហើយ គឺខ្សែក្រវាត់ K-1 ទម្ងន់​៧០គីឡូក្រាម ខណៈបច្ចុប្បន្នកីឡាករនៅតែកំពុងគ្រងខ្សែក្រវាត់មួយនេះ បន្ទាប់ពីដណ្តើមបានតាំងពីឆ្នាំ ២០២៣៕

អត្ថបទ៖ សេម កុសល