សួង វិរៈ ជាអ្នករកបានគ្រាប់បាល់ច្រើនជាងគេក្នុងប្រវត្តិម្ចាស់ស្បែកជើងមាស ពានសម្តេចតេជោ

អតីតខ្សែប្រយុទ្ធក្រុម ណាហ្គាវើលដ៍ លោក សួង វិរៈ បានជាប់ឈ្មោះជាកីឡាករឈ្នះស្បែកជើងមាស ដែល​រកបានគ្រាប់បាល់ច្រើនជាងគេបំផុត​ នៅក្នុងប្រវត្តិសាស្ត្រពានរង្វាន់​សម្តេចអគ្គមហាសេនាបតីតេជោ ហ៊ុន សែន។

ការប្រកួតពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ ក្នុងប្រវត្តិពានសម្តេចតេជោនេះ មានកីឡាករច្រើនរូប ដែលធ្លាប់ឈ្នះស្បែកជើងមាស ប៉ុន្តែមានតែលោក សួង វិរៈ ម្នាក់គត់ ដែលមានប្រវត្តិរកបានគ្រាប់បាល់ច្រើនជាងគេបំផុត អំឡុងពេលឈ្នះស្បែកជើងមាសនៅឆ្នាំ ២០១៦។

លោក សួង វិរៈ ធ្លាប់បានឈ្នះស្បែកជើងមាស ក្នុងពានសម្តេចតេជោ ១ លើកគត់នៅឆ្នាំ ២០១៦ ដែលពេលនោះលេងឱ្យក្រុម អង្គរថាយហ្គើរ។ លោករកបានគ្រាប់បាល់រហូតដល់ទៅ ២៥ គ្រាប់ ដែលចំនួននេះបានជាប់ជាកីឡាកររកបានគ្រាប់បាល់ច្រើនបំផុត ក្នុងប្រវត្តិអ្នកឈ្នះស្បែកជើងមាស។ ទោះបីជាលោកបង្ហាញថ្វីជើងស៊ុតដ៏ល្អបែបនេះក៏ដោយ ប៉ុន្តែពេលនោះក្រុម អង្គរថាយហ្គើរ បានត្រឹមឡើងដល់វគ្គ ៨ ក្រុមចុងក្រោយប៉ុណ្ណោះ។

កីឡាករ ដែលស្ថិតនៅលំដាប់លេខ ២ បានទៅលើកីឡាករ ប្រាក់ មុន្នីឧត្តម ដោយនៅឆ្នាំ ២០១៥ កីឡាកររកបាន ២៤ គ្រាប់។ ចំណែកកីឡាករស្ថិតនៅលំដាប់លេខ ៣ គឺលោក ឃួន ឡាបូរ៉ាវី ដោយនៅឆ្នាំ ២០១១ និង ២០១២ លោករកបាន ២២ គ្រាប់ដូចគ្នា៕

អត្ថបទ៖ សេម កុសល