ឥទ្ធិពល Ronaldo ពហិការ ២ ប្រកួត ធ្វើឱ្យ Al-Nassr ព្រមដោះស្រាយបញ្ហា​ជាប់គាំងធំពីរ

ការជ្រើសរើសយកវិធីពហិការលេង ២ ប្រកួតរបស់ Cristiano Ronaldo បានធ្វើឱ្យក្លិប Al-Nassr ព្រមដោះស្រាយរឿងជាប់គាំងក្នុងក្លិបធំៗចំនួន ២ ខណៈបច្ចុប្បន្នខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ ក៏យល់ព្រមត្រឡប់មកលេងជាមួយក្រុមឡើងវិញ។

Ronaldo បានធ្វើឱ្យអ្នកគាំទ្រមានការភ្ញាក់ផ្អើលជាខ្លាំង បន្ទាប់ពីគាត់អវត្តមានការប្រកួតជាមួយ Al-Nassr ចំនួន ២ ប្រកួត នៅពេលយកឈ្នះក្រុម Al-Riyadh ១-០ និងយកឈ្នះ Al-Ittihad ២-០ ដោយសារមិនសប្បាយចិត្តនឹងមូលនិធិវិនិយោគរដ្ឋរបស់ប្រទេសអារ៉ាប៊ីសាអូឌីត (PIF) ដែលមិនបានផ្តល់ឱ្យក្លិប Al-Nassr នាំចូលកីឡាករថ្មីនៅទីផ្សារដោះដូរកីឡាករខែ មករា។

ផ្ទុយពីក្លិប Al-Hilal ដែលស្ថិតក្រោមការគ្រប់គ្រងរបស់ PIF ដូចគ្នា ប៉ុន្តែពួកគេបែរជា​ទទួលបានការចុះកិច្ចសន្យានាំ​ចូល​កីឡាករថ្មីៗ ហើយថែមទាំងបាននាំយកអតីតមិត្តរួមក្រុមរបស់ខ្លួន​នៅ Real Madrid គឺ​កីឡាករ Karim Benzema ថែមទៀត។

យោងតាមប្រភពពី ESPN ដែលទើបចុះផ្សាយនៅថ្ងៃទី ១០ ខែ កុម្ភៈ ឆ្នាំ ២០២៦ បានអះអាង ថា Ronaldo ពេលនេះបានសម្រេចចិត្តត្រឡប់មកកាន់ទីលានវិញហើយ ដោយនឹង​អាច​ចូលលេងការប្រកួតទល់នឹងក្រុម Al Fateh នៅថ្ងៃ សៅរ៍ ទី ១៤ ខែ កុម្ភៈ សប្តាហ៍នេះ បន្ទាប់ពី PIF បំពេញលក្ខខណ្ឌ ២ ចំណុច តាមអ្វីដែលគាត់ចង់បាន។

រឿងធំទី ១ គឺក្លិប Al-Nassr បានផ្តល់នូវប្រាក់ឈ្នួលទាំងអស់​ដល់​បុគ្គលិក និងកីឡាករ ដែលបានជំពាក់។ រឿងសំខា​ន់ទី ២ គឺ Al-Nassr បានផ្តល់អំណាចគ្រប់គ្រងពេញលេញឡើងវិញ​ឲ្យ​នាយកផ្នែកកីឡាលោក Simao Coutinho និងនាយកប្រត្តិបត្តិលោក José Semedo៕

ប្រែសម្រួល៖ សេម កុសល
ប្រភព៖ ESPN