កីឡា

លោក Oleg ថា ស្តាតមរតកតេជោ ជាកន្លែងផ្តល់អារម្មណ៍ពិសេសដល់ ភ្នំពេញក្រោន

បានផុស

៤ ខែ មុន

នៅ

ថ្ងៃពុធ ១១ មីនា ២០២៦

ដោយ

គ្រូបង្វឹករបស់ក្រុម ភ្នំពេញក្រោន លោក Oleg Starinsky បានបង្ហាញក្តីសង្ឃឹមមុតមាំចំពោះក្រុមរបស់លោក ដើម្បីវាយបកយកឈ្នះលើក្រុម ព្រះខ័នរាជស្វាយរៀង នៅជើងទី ២ វគ្គ ៨ ក្រុមចុងក្រោយពានរង្វាន់ AFC Challenge league នៅថ្ងៃ ព្រហស្បតិ៍ ទី ១២ ខែ មីនា ស្អែកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជើងទី ១ វគ្គ ៨ ក្រុមចុងក្រោយពាន ACGL កាលពីថ្ងៃទី ៥ ខែ មីនា ឆ្នាំ ២០២៦ កន្លងទៅ ក្រុម ភ្នំពេញក្រោន ត្រូវបាន ព្រះខ័នរាជស្វាយរៀង យកឈ្នះក្នុងលទ្ធផលយ៉ាងធំធេង ៤-១។ យ៉ាងណា នាការប្រកួតជើងទី ២ នៅ ពហុកីឡដ្ឋានជាតិមរតកតេជោ ថ្ងៃ ព្រហស្បតិ៍ ទី ១២ ខែ មីនា ស្អែកនេះ ក្រុម ភ្នំពេញក្រោន ត្រូវការឈ្នះលើក្រុម ព្រះខ័នរាជស្វាយរៀង ចាប់ពី ៤ គ្រាប់ឡើងទៅ ទើបអាចបន្តបេកកម្មឡើងទីវគ្គពាក់កណ្តាលផ្តាច់ព្រ័ត្របាន។

ទោះជាយ៉ាងណា លោក Oleg នៅតែសង្ឃឹមលើក្រុមរបស់លោកនឹងអាចវាយបកយកឈ្នះក្រុម ព្រះខ័នរាជស្វាយរៀង បាន ព្រោះកីឡាកររបស់លោកមានឆន្ទៈចង់បានជ័យជម្នះខ្លាំងនៅថ្ងៃស្អែក ហើយជាមួយគ្នានេះ ក្រុមរបស់លោកក៏តែងតែទទួលបានលទ្ធផលល្អនៅ ពហុកីឡដ្ឋានជាតិមរតកតេជោ ផងដែរ។ លោក Oleg បានសង្កត់ធ្ងន់ ថា ទោះបីជាក្រុមលោកមានសង្ឃឹមត្រឹមតែ ១% ក៏ប្រឹងប្រយុទ្ធដល់ទីបញ្ចប់ផងដែរ។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ ពុធ ទី ១១ ខែ មីនា នេះ លោក Oleg បានមានប្រសាសន៍ ថា ៖«វាជាការពិត ក្នុងពីរប្រកួតចុងក្រោយនៅទីនេះ (ពហុកីឡដ្ឋានជាតិមរតកតេជោ) វាមានលទ្ធផលវិជ្ជមានសម្រាប់ពួកយើង។ កីឡដ្ឋាននេះផ្តល់អារម្មណ៍ពិសេស និងជំរុញចិត្តពួកយើងយ៉ាងពិសេសសម្រាប់ការលេង។ ខ្ញុំប្រាកដថា កីឡាករទាំងអស់នឹងចូលទៅលេងថ្ងៃស្អែកដោយមានឆន្ទៈ។ ឆន្ទៈដែលមិនត្រូវចាញ់»។

ការលើកឡើងរបស់លោក គឺសំដៅលើ ភ្នំពេញក្រោន បានឈ្នះ ព្រះខ័នរាជស្វាយរៀង ពីរលើកចុងក្រោយនៅពេលក្រុមទាំងពីរជួបគ្នានៅទីលាននៃពហុកីឡដ្ឋានជាតិមរតកតេជោ។ លើកទី១ ភ្នំពេញក្រោន ឈ្នះ ២-១ ដើម្បីគ្រងជើងឯកពានរង្វាន់សម្តេចតេជោ ហ៊ុន សែន រដូវកាលមុន និងលើកទី២ ឈ្នះ ៣-២ ក្នុងលីគជើងទី១ រដូវកាលនេះ។

លោកបានបន្តថា៖ «យើងមានយ៉ាងហោចណាស់ ១ ភាគរយនៃឱកាសដើម្បីឆ្លងទៅជុំបន្ទាប់។ ពួកយើងនឹងព្យាយាមចាប់យកឱកាសនោះ។ ពួកយើងនឹងព្យាយាមប្រយុទ្ធសម្រាប់ជ័យជម្នះ។ […] ដូច្នេះ នេះនឹងក្លាយជាបេសកកម្មរបស់យើង ដើម្បីធ្វើអ្វីៗឲ្យបានល្អបំផុតក្នុងការបង្ហាញសមត្ថភាព។ ខ្ញុំសង្ឃឹមថា នឹងមានសំណាងបន្តិច បន្តិចប៉ុណ្ណោះ មិនច្រើនពេក។ ហើយយើងនឹងបង្ហាញសមត្ថភាពរបស់យើងនៅថ្ងៃស្អែក»។

គួរបញ្ជាក់ជាថ្មី ថា ការប្រកួតជើងទី ២ វគ្គ ៨ ក្រុមពាន ACGL រវាង ព្រះខ័នរាជស្វាយរៀង និង ភ្នំពេញក្រោន នឹងធ្វើឡើងនៅ ពហុកីឡដ្ឋានជាតិមរតកតេជោ ថ្ងៃ ព្រហស្បតិ៍ ទី ១២ ខែ មីនា ឆ្នាំ ២០២៦៕