កំណត់ត្រាដ៏អាក្រក់ ២ ត្រូវបានចារសម្រាប់លោក Oleg និង ភ្នំពេញក្រោន ក្រោយចាញ់ បឹងកេត

ក្រុម ភ្នំពេញក្រោន ចាញ់ក្រុម បឹងកេត កាលពីថ្ងៃ អាទិត្យ កន្លងទៅ បានបង្កើតជាកំណត់ត្រាអាក្រក់ ២ សម្រាប់ក្រុមរហស្សនាម សិង្ហក្រហម និងគ្រូបង្វឹកលោក Oleg Starynskyi។

ក្រុម ភ្នំពេញក្រោន បានជួបបរាជ័យជាបន្តបន្ទាប់នាប៉ុន្មានប្រកួតចុងក្រោយនេះ ខណៈកាលពីថ្ងៃ អាទិត្យ ទី ១៥ ខែ មីនា ឆ្នាំ ២០២៦ ពួកគេបានបន្តចាញ់ក្រុម បឹងកេត នៅទឹកដីខ្លួនឯងក្នុងលទ្ធផល ២-១។ ការបរាជ័យនេះ ក៏បានក្លាយជាកំណត់ត្រាដ៏អាក្រក់មួយផងដែរ សម្រាប់ក្លិបពួកគេទាំងមូល ដោយនេះជាការចាញ់ បឹងកេត នៅក្នុងដីរបស់ខ្លួនឯងជាលើកដំបូងក្នុងរយៈពេល ៧ ឆ្នាំចុងក្រោយ។

ជាមួយគ្នានេះ វាក៏បានបង្កើតនូវកំណត់ត្រាដ៏អាក្រក់មួយបន្ថែមទៀតសម្រាប់គ្រូបង្វឹកលោក Oleg ផងដែរ ដោយនេះជាការដឹកនាំក្រុម ភ្នំពេញក្រោន មិនស្គាល់ជ័យជម្នះសោះ ៦ ប្រកួតជាប់ៗគ្នាជាលើកដំបូង ចាប់តាំងពីលោកដឹកនាំពីឆ្នាំ ២០២០ មក។ ការដឹកនាំរបស់បុរសសញ្ជាតិ អ៊ុយក្រែន ក្នុង ៦ ប្រកួតចុងក្រោយ គឺ ភ្នំពេញក្រោន ស្មើ ២ និងចាញ់ ៤។

លទ្ធផល ៦ ប្រកួតចុងក្រោយរបស់ ភ្នំពេញក្រោន គឺបានស្មើ អាយអេសអាយ ដង្កោសែនជ័យ ២-២ ក្នុងពានសម្តេចតេជោ, ស្មើ អង្គរថាយហ្គឺរ ០-០ ក្នុងលីគកំពូល កម្ពុជា, ចាញ់ ព្រះខ័នរាជស្វាយរៀង ជើងទីមួយ ១-៤ និងជើងទីពីរ ១-២ ក្នុងពាន AFC Challenge League, ចាញ់ក្រុម អឹមអូអាយ កំពង់ដេវ៉ា ១-២ ក្នុងលីគកំពូល កម្ពុជា និងចុងក្រោយចាញ់ក្រុម បឹងកេត ១-២ ក្នុងលីគកំពូល កម្ពុជា។

គួរបញ្ជាក់ផងដែរ ថា នៅរដូវកាលនេះ ក្រុម ភ្នំពេញក្រោន ដែលជាគូប្រជែងធំបំផុតរបស់ ព្រះខ័នរាជស្វាយរៀង ហាក់កំពុងអស់ឱកាសប្រជែងលីគហើយ បន្ទាប់ពីពួកគេត្រូវដេញពិន្ទុក្រុមកំពូលតារាងដល់ទៅ ១១ ពិន្ទុ។ គិតត្រឹម បច្ចុប្បន្នក្រុម សិង្ហក្រហម នៅសល់តែពានសម្តេចតេជោមួយប៉ុណ្ណោះ ដើម្បីប្រជែង៕

អត្ថបទ៖ សេម កុសល