កីឡា

សមិទ្ធផលបាល់ទាត់ថ្មី ៥ កន្លែង កំពុងសាងសង់អាចនឹងបើកដំណើរការនៅឆ្នាំថ្មីខាងមុខ

បានផុស

៤ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

កីឡដ្ឋានបាល់ទាត់ចំនួន ៥ ដែលបានកំពុងដំណើរការសាងសង់អាចនឹងបើកដំណើរការប្រកួតនៅឆ្នាំថ្មី ក្នុងនោះមានកីឡដ្ឋានគោកធ្លក កីឡដ្ឋានខេត្តស្វាយរៀង កីឡដ្ឋានអឹមអូអាយកំពង់ដេវ៉ា កីឡដ្ឋានខេត្តព្រះសីហនុ និងកីឡដ្ឋានខេត្តត្បូងឃ្មុំ។

កីឡដ្ឋានគោកធ្លក

សហព័ន្ធបាល់ទាត់កម្ពុជាកំពុងសាងសងទីស្នាក់ការ និងកីឡដ្ឋានផ្ទាល់ខ្លួន ដែលចំណាយថវិកាសរុប ៤.៤ លានដុល្លារអាមេរិក។ កីឡដ្ឋានថ្មីនេះឈ្មោះថា គោកធ្លក ដែលអាចផ្ទុកអ្នកទស្សនាផ្ទាល់ប្រមាណ ១២,០០០ នាក់ ស្ថិតនៅព្រែកអញ្ចាញ ស្រុកមុខកំពូល ខេត្តកណ្តាល និងគ្រោងបញ្ចប់នៅចុងឆ្នាំ២០២៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបំណងនៃសាងសងកីឡដ្ឋាននេះគឺសម្រាប់ការប្រកួតរបស់ក្រុមជម្រើសជាតិកម្ពុជា ទាំងការប្រកួតមិត្តភាពអន្តរជាតិ និងពានរង្វាន់ផ្សេងៗ ប៉ុន្តែសម្រាប់ការប្រកួតកម្រិតស្តង់ដាធំៗនឹងធ្វើនៅពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោ។

កីឡដ្ឋានខេត្តស្វាយរៀង

កីឡដ្ឋានខេត្តស្វាយរៀង ត្រូវបានកសាងឡើងវិញកាលពីដើមឆ្នាំ ២០២៥ ដែលត្រូវចំណាយពេលជាងមួយឆ្នាំ ហើយតាមការគ្រោងទុកអាចនឹងបើកដំណើរការប្រកួតនៅពាក់កណ្តាលឆ្នាំ ២០២៦។

ការកសាងកីឡដ្ឋានឡើងវិញនេះគឺដើម្បីបំពេញទៅតាមលក្ខខណ្ឌ និងស្តង់ដារបស់សហព័ន្ធកីឡាបាល់ទាត់អាស៊ី ដែលរួមមានស្តង់ដាពន្លឺភ្លើង ស្មៅ ប្រព័ន្ធទឹក ប្រព័ន្ធសុវត្ថិភាព កន្លែងអង្គុយ បន្ទប់ក្រុមម្ចាស់ផ្ទះ បន្ទប់ភ្ញៀវ បន្ទប់សន្និសីទ និងហេដ្ឋានរចនាសម្ព័ន្ធផ្សេងៗទៀតស្របតាមតម្រូវការរបស់ AFC។

កីឡដ្ឋាន អឹមអូអាយ កំពង់ដេវ៉ា

កីឡដ្ឋាន អឹមអូអាយ កំពុងដេវ៉ា ត្រូវបានបើកដំណើរការសាងសង់កាលពីថ្ងៃទី ១៤ ខែមីនា ឆ្នាំ២០២៦ នៅខេត្តព្រះសីហនុ។ កីឡដ្ឋានដែលនឹងបម្រើការប្រកួតក្នុងលីគ និងពានរង្វាន់សម្តេចតេជោនេះ ក៏មានបំណងបម្រើដល់ការប្រកួតរបស់ក្រុមបាល់ទាត់ជម្រើសជាតិកម្ពុជា និងការបោះជំរុំរបស់ក្រុមជម្រើសជាតិដែរ។

កីឡដ្ឋាននេះ អាចផ្ទុកអ្នកទស្សនាបានជិត ១ ម៉ឺននាក់ និងមានប្រព័ន្ធភ្លើង ទឹក សុវត្ថិភាព និងសេវាបម្រើដល់អ្នកគាំទ្រជាដើម។

កីឡដ្ឋានខេត្តព្រះសីហនុ

ពហុកីឡដ្ឋាន ខេត្តព្រះសីហនុ គឺជារបស់រដ្ឋ ស្ថិតនៅតាមបណ្ដោយផ្លូវល្បឿនលឿនខេត្តព្រះសីហនុ ចូលតាមផ្លូវក្បាលឆាយចម្ងាយ ៥គីឡូម៉ែត្ររួចបត់ស្ដាំចម្ងាយ ១,៥ គីឡូម៉ែត្រ។ តាមផែនការ កីឡដ្ឋានខេត្តព្រះសីហនុមានទ្រទ្រាយធំ និងស្តង់ដាដែលមានទីលានផ្សេងៗជាច្រើនទៀត។

កីឡដ្ឋានខេត្តត្បូងឃ្មុំ

កីឡដ្ឋានខេត្តត្បូងឃ្មុំ នឹងក្លាយជាកីឡដ្ឋានដែលមានលក្ខណៈស្តង់ដាជាគេបំផុតនៅក្នុងខេត្តត្បូងឃ្មុំ។ កីឡដ្ឋាននេះត្រូវបានបញ្ចុះបឋមសិលាសាងសង់កាល ពីថ្ងៃទី២៤ ខែមីនា ឆ្នាំ ២០២៦។ តាមផែនការ ខេត្តដែលសំបូរអ្នកចូលចិត្តបាល់ទាត់មួយនេះ មិនត្រឹមតែផ្តោតលើកីឡាបាល់ទាត់ប៉ុណ្ណោះទេ ប៉ុន្តែមានទាំងទីលានកីឡាផ្សេងៗដូចជា បាល់ទះ និងប៉េតង់ជាដើម៕