សៀមរាប និង ព្រះសីហនុ ជាខេត្ត​ឈានមុខគេ លើការអភិវឌ្ឍកីឡដ្ឋានបាល់ទាត់

ក្នុងឆ្នាំ ២០២៦ នេះ សៀមរាប និង ព្រះសីហនុ កំពុងក្លាយជាខេត្តឈានមុខគេ សម្រាប់ការអភិវឌ្ឍ​ហេដ្ឋារចនា​សម្ព័ន្ធ​កីឡា​​ទាំង​​ទី​លាន​កីឡា​បាល់ទាត់ និង​កីឡាផ្សេង​ៗ​ទៀត។

ជាការពិត បាល់ទាត់ កម្ពុជា បច្ចុប្បន្នកំពុងរីកចម្រើនយ៉ាងខ្លាំង ទាំងកម្រិតប្រកួតប្រជែងរបស់កីឡាករ និងហេដ្ឋារចនាសម្ព័ន្ធ។ នៅឆ្នាំ ២០២៦ មានគម្រោងសាងសង់កីឡដ្ឋានថ្មីៗជាច្រើនរបស់ខេត្តផ្ទាល់ និងក្លិបអាជីព ដែលត្រូវបានប្រកាសដូចជានៅខេត្ត កណ្តាល សៀមរាប ព្រះសីហនុ ស្វាយរៀង និងត្បូងឃ្មុំ។

យ៉ាងណាមិញ ក្នុងចំណោមខេត្តរបស់ កម្ពុជា ទាំងអស់ គឺមានតែខេត្ត សៀមរាប និង ព្រះសីហនុ ប៉ុណ្ណោះ ដែលត្រូវបានគេមើលឃើញ ថា ហាក់​រីកចម្រើនជាងគេលើការកសាងកីឡដ្ឋានបាល់ទាត់ និង​កីឡា​ផ្សេង​ៗ​ទៀត។

គិតត្រឹមខែ មេសា ឆ្នាំ ២០២៦ នៅខេត្ត​ព្រះសីហនុ មានកីឡដ្ឋានចំនួន ៣ ដែលបានសាងសង់ និងកំពុងស្ថិតក្នុង​គម្រោង​សាងសង់។ នៅខេត្តតំបន់សមុទ្រមួយនេះ មានកីឡដ្ឋានឡាយហ្វមួយ បានសាងសង់រួចរាល់ ជាកម្មសិទ្ធិរបស់ក្លិប ឡាយហ្វ ព្រះសីហនុ។

ក្នុងពេលខាងមុខ ខេត្តនេះនឹងមានកីឡដ្ឋានថ្មី ២ ទៀត គឺកីឡដ្ឋានខេត្ត ព្រះសីហនុ ជាកម្មសិទ្ធិរបស់ខេត្ត​ និងកីឡដ្ឋាន អឹមអូអាយ កំពង់ដេវ៉ា ដែលជាកម្មសិទ្ធិរបស់ក្លិប អឹមអូអាយ កំពង់ដេវ៉ា។ កីឡដ្ឋានទាំង ២ នេះ សុទ្ធតែបានបញ្ចុះបឋមសីលានៅឆ្នាំ ២០២៦ ហើយបច្ចុប្បន្នកំពុងស្ថិតក្នុងការសាងសង់ទាំងពីរ។

ក្រឡេកទៅកាន់ខេត្ត សៀមរាប វិញ ក៏នឹងមានកីឡដ្ឋានចំនួន ៣ ដូចខេត្ត ព្រះសីហនុ ដែរ។ បច្ចុប្បន្ន នៅខេត្តនេះមានកីឡដ្ឋាន Akihiro Kato ជាកម្មសិទ្ធិរបស់ក្លិប អង្គរថាយហ្គឺរ។ តាមផែនការ គឺក្លិបនៅមានគម្រោងពង្រីកកីឡដ្ឋានបន្តទៀត។

កីឡដ្ឋានមួយទៀត គឺកីឡដ្ឋានរបស់ក្លិប សៀមរាប យូណាយធីត ដែលមានទីតាំងនៅ​ស្រុក​បន្ទាយ​ស្រី​។ បច្ចុប្បន្នក្លិបសៀមរាប យូណាយធីត កំពុងផ្តោតលើការបណ្តុះថ្នាលយុវជន។ ពួកគេមិនត្រឹមតែមានកីឡដ្ឋានប្រកួតប៉ុណ្ណោះទេ ហើយក៏មានមជ្ឈមណ្ឌលហ្វឹកហាត់ សម្រាប់ម្រើការហ្វឹកហាត់ដល់កីឡាករផងដែរ។

ដោយឡែកកីឡដ្ឋានមួយទៀត ដែលនឹងកើតមាននៅខេត្តសៀមរាបផងដែរ គឺកីឡដ្ឋានឡាយអ៉ិនឃីង ជាកម្មសិទ្ធិរបស់ក្លិប ឡាយអ៉ិនឃីង។ តាមការប្រកាសរបស់ក្លិប គឺកីឡដ្ឋានរបស់ពួកគេ ដែលគ្រោងធ្វើការសាងសង់ គឺជាកីឡដ្ឋានស្តង់ដាទំហំ ៦៨​ម៉ែត្រ x ១០៥​ម៉ែត្រ អាចផ្ទុកអ្នកទស្សនាបានចន្លោះពី ៧៥០០ នាក់ ទៅ ៨០០០ នាក់។ ជា​មួយ​គ្នា​នេះ ក៏​មាន​មជ្ឈមណ្ឌលហ្វឹក​ហាត់ និង​បណ្តុះ​បណ្តាល​ថ្នាល​យុវជន​ផងដែរ។

ក្លិបកូនពៅនៅខេត្តសៀមរាបមួយនេះ មានផែនការចូលប្រកួតលីគទី ២ កម្ពុជា នាពេលឆាប់ៗខាងមុខ៕

អត្ថបទ៖ សេម កុសល