កីឡា

កីឡដ្ឋាន«គោកធ្លក» កសាងបានប្រមាណ ១៩ % ហើយ គ្រោងបញ្ចប់ឆ្នាំក្រោយ

បានផុស

៥ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

កីឡដ្ឋាន និងជាទីស្នាក់ការរបស់ សហព័ន្ធកីឡាបាល់ទាត់កម្ពុជា បានកំពុងកសាងសម្រេចបានប្រមាណ ១៩ % ហើយ បន្ទាប់ពីបានចុះបឋមសិលាកសាងកាលពីខែ មីនា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សៅ សុខា ប្រធានសហព័ន្ធកីឡាបាល់ទាត់កម្ពុជា មានប្រសាសន៍ក្នុងមហាសន្និបាតកាលពីថ្ងៃទី២១ ខែកុម្ភៈ ឆ្នាំ២០២៦ នៅសណ្ឋាគារ Raffles Hotel Le Royal ថា ការកសាងកីឡដ្ឋាន គោកធ្លក និងទីស្នាក់ការផ្ទាល់ខ្លួនរបស់សហព័ន្ធកីឡាបាល់ទាត់កម្ពុជាសម្រេចបានប្រមាណ ១៩% ហើយ ហើយគ្រោងនឹងបញ្ចប់នៅឆ្នាំ ២០២៧។

កីឡដ្ឋានគោកធ្លក និងទីស្នាក់ការរបស់សហព័ន្ធកីឡាបាល់ទាត់កម្ពុជានេះគ្រោងចំណាយអស់ប្រមាណ ៤.៤លានដុល្លារអាមេរិក។ កីឡដ្ឋាននេះអាចផ្ទុកអ្នកទស្សនាផ្ទាល់ប្រមាណ១២០០០នាក់ ដែលស្ថិតនៅព្រែកអញ្ចាញ ស្រុកមុខកំពូល ខេត្តកណ្តាល។

បច្ចុប្បន្ន សហព័ន្ធកីឡាបាល់ទាត់កម្ពុជាមានការិយាល័យស្ថិតនៅក្នុងពហុកីឡដ្ឋានជាតិអូឡាំពិក និងមានមជ្ឈមណ្ឌលបណ្តុះបណ្តាលថ្នាលបាល់ទាត់ជាតិបាទី ព្រមទាំងទីលានបាល់ទាត់សាលាតម្រង់ទិស២៤ខេត្ត-ក្រុង ប៉ុន្តែមិនទាន់មានកីឡដ្ឋាន ក៏ដូចជាទីស្នាក់ការផ្ទាល់ខ្លួនទេ។

កីឡដ្ឋាន គោកធ្លក ជាកីឡដ្ឋានមួយទៀតរបស់សហព័ន្ធកីឡាបាល់ទាត់កម្ពុជា សម្រាប់រៀបចំការប្រកួតផ្លូវការរបស់ក្រុមបាល់ទាត់ជម្រើសជាតិ។ ប្រធានសហព័ន្ធកីឡាបាល់ទាត់កម្ពុជាបានឲ្យដឹងថា នៅពេលមានព្រឹត្តិការណ៍ប្រកួតអន្តរជាតិធំបំផុតនឹងរៀបចំនៅពហុកីឡដ្ឋានជាតិមរតកតេជោ ហើយពហុកីឡដ្ឋានជាតិអូឡាំពិកសម្រាប់ការប្រកួត ក៏ដូចជាព្រឹត្តិការណ៍ផ្លូវការធំៗដែរ ខណៈកីឡដ្ឋាន គោកធ្លក សម្រាប់ការប្រកួតផ្លូវការដែលមានទ្រង់ទ្រាយមធ្យម៕

អត្ថបទ៖ វិរបុត្រ

Related Topics:កីឡដ្ឋានគោកធ្លក