កីឡា

រឿងសំខាន់ ៦ ចារជាប្រវត្តិ ក្រោយព្រះខ័នរាជស្វាយរៀងឡើងវគ្គផ្តាច់ព្រ័ត្រ AFC លើកទី២

បានផុស

១ សប្តាហ៍ មុន

នៅ

ថ្ងៃអង្គារ ២១ មេសា ២០២៦

ដោយ

ព្រះខ័នរាជស្វាយរៀង ត្រូវបានចាត់ទុកជាក្រុមទទួលបានជោគជ័យជាងគេបំផុតទាំងក្នុងស្រុក និងអន្តរជាតិ បន្ទាប់ពីទទួលបានលទ្ធផលយ៉ាងល្អនៅក្នុងរដូវកាល ២០២៥-២០៦។ ក្រឡេកមើលកំណត់ត្រាថ្មីៗរបស់ក្លិបជើងឯកលីគកម្ពុជាមួយនេះបង្កើតឡើងពិតជាគួរឲ្យចាប់អារម្មណ៍។

ទី១. ព្រះខ័នរាជស្វាយរៀង បានក្លាយជាក្រុមកម្ពុជាទី ១ ឈ្នះជើងឯកលីគបាល់ទាត់កំពូលកម្ពុជា ៣ រដូវកាលជាប់គ្នាគឺរដូវកាល ២០២៣-២៤, ២០២៤-២៥ និង ២០២៥-២៦។ នេះជាកំណត់ត្រាថ្មីក្នុងប្រវត្តិសាស្ត្រលីគបាល់ទាត់កំពូលកម្ពុជា។
ទី២. ព្រះខ័នរាជស្វាយរៀង ជាក្រុមទី ១ របស់កម្ពុជា និងជាក្រុមទី១នៅក្នុងតំបន់អាស៊ីខាងកើត ដែលបានឈានដល់វគ្គផ្តាច់ព្រ័ត្រ ពានរង្វាន់ AFC Challenge League ពីររដូវកាលជាប់គ្នា បន្ទាប់ពីពានអាស៊ីកម្រិតទី៣នេះ ត្រូវបានប្តូរឈ្មោះពី AFC President’s Cup មកជា AFC Challenge League។ កាលពីរដូវកាលមុន ក្រុម Arkadag បានឡើងវគ្គផ្តាច់ព្រ័ត្រ និងឈ្នះជើងឯក ប៉ុន្តែក្រុមនេះបានឡើងទៅលេងពានអាស៊ីកម្រិតទី២។
ទី៣. ព្រះខ័នរាជស្វាយរៀង បានបង្កើតកំណត់ត្រាមិនទាន់ចាញ់សោះក្នុងពានរង្វាន់ AFC Challenge League នៅក្នុងរដូវកាលនេះ។ វគ្គសន្សំពិន្ទុក្នុងពូល ពួកគេឈ្នះ SP Falcons ៣-០, ឈ្នះ Ezra FC ៣-០ និងស្មើ Manila Digger ២-២។ នៅវគ្គ ៨ ក្រុមចុងក្រោយ ព្រះខ័នរាជស្វាយរៀង ឈ្នះ ភ្នំពេញក្រោន ៤-១ ក្នុងជើងទី១ និងឈ្នះ ២-១ ក្នុងជើងទី២ ហើយវគ្គពាក់កណ្តាលផ្តាច់ព្រ័ត្រ ស្មើ Manila Digger ១-១ ក្នុងជើងទី១ និងឈ្នះ ៣-០ ក្នុងជើងទី២ ដើម្បីឡើងទៅកាន់វគ្គផ្តាច់ព្រ័ត្រ។
ទី៤. ព្រះខ័នរាជស្វាយរៀង ជាក្រុមកម្ពុជាទី ១ ដែលបានធ្វើម្ចាស់ផ្ទះរៀបចំការប្រកួតវគ្គផ្តាច់ព្រ័ត្រ AFC Challenge League នៅលើទឹកដីកម្ពុជា។ នៅក្នុងប្រវត្តិសាស្ត្របាល់ទាត់កម្ពុជាប្រមាណជាង ៥០ ឆ្នាំចុងក្រោយ គឺការប្រកួតវគ្គផ្តាច់ព្រ័ត្រ ពានរង្វាន់អាស៊ីទើបកើតមានលើកដំបូង នៅពហុកីឡដ្ឋានជាតិមរតកតេជោ កាលពីថ្ងៃទី១០ ខែឧសភា ឆ្នាំ ២០២៥។
ទី៥. កម្ពុជាបានក្លាយជាកន្លែងរៀបចំការប្រកួតពានរង្វាន់ AFC Challenge League ដែលមានអ្នកគាំទ្រចូលទស្សនាច្រើនជាងគេបំផុតពីររដូវកាលជាប់គ្នា តាំងពីវគ្គសន្សំពិន្ទុក្នុងពូល រហូតដល់វគ្គផ្តាច់ព្រ័ត្រ។ និយាយតែវគ្គផ្តាច់ព្រ័ត្រមួយគឺមានអ្នកទស្សនាផ្ទាល់ចំនួន ៥១.៦១០ នាក់នៅពហុកីឡដ្ឋានជាតិមរតកតេជោ ដែលចំនួននេះច្រើនជាងការប្រកួតវគ្គផ្តាច់ព្រ័ត្រណាៗទាំងអស់ក្នុងប្រវត្តិសាស្ត្រពានរង្វាន់ AFC Challenge League។
ទី៦. ព្រះខ័នរាជស្វាយរៀង បានជួយឲ្យក្លិបលីគបាល់ទាត់កម្ពុជាទទួលបានកៅលេងពានអាស៊ីកម្រិតទី ២ AFC Champions League Two ពីររដូវកាលជាប់គ្នា។ ក្នុងនាមជាក្រុមឡើងវគ្គផ្តាច់ព្រ័ត្រពានរង្វាន់ AFC Challenge League រដូវកាលមុន កម្ពុជាទទួលបាន ១ កៅអីកន្លះ ដើម្បីប្រកួតក្នុងពានរង្វាន់អាស៊ីកម្រិតទី ២ សម្រាប់រដូវកាល ២០២៦-២៧ ហើយបានឡើងវគ្គផ្តាច់ព្រ័ត្រ AFC Challenge League ២០២៥-២៦ កម្ពុជា ទទួលបាន ១ កៅអីកន្លះទៀតសម្រាប់រដូវកាល ២០២៧-២៨។ នេះនៅមិនទាន់គិតពីអត្ថប្រយោជន៍ផ្សេងៗទៀត ហើយប្រសិនបើឈ្នះជើងឯក AFC Challenge League ទៀតនោះគឺរឹតតែមានផលល្អសម្រាប់ក្លិបកម្ពុជា៕