កីឡា

កីឡាករអាមេរិក Jalen Penrose កំពូលអ្នកវ៉ៃសេវាកាច ចូលរួមជាមួយក្រុមបាល់ទះស្វាយរៀង

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

ក្រុមបាល់ទះស្នងការខេត្តស្វាយរៀង បានបង្កើតការភ្ញាក់ផ្អើលទៀតហើយតាមរយៈការនាំចូលកីឡាករសញ្ជាតិអាមេរិក Jalen Penrose ដើម្បីប្រជែងជើងឯកលីគបាល់ទះកំពូលកម្ពុជា ដែលហៅកាត់«តេជោលីគ» នៅរដូវកាលទី៣ ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Jalen Penrose អាយុ ៣១ ឆ្នាំ កម្ពស់ ២,០៣ម៉ែត្រ លេងក្នុងតួនាទីជាអ្នកវាយផ្តាច់ស្លាបឆ្វេង ប៉ុន្តែរូបគេល្បីខាងវាយសេវាកាច។ រហូតដល់ដល់ពេលនេះ កីឡាករកើតនៅ Boston សហរដ្ឋអាមេរិក មានបទពិសោធច្រើន និងឆ្លងកាត់លេងឲ្យក្លិបជាច្រើនក្នុងរយៈពេលប្រមាណ ១០ ឆ្នាំចុងក្រោយ។

ក្លិបផ្លូវការដែលរូបគេធ្លាប់លេងមាន Al Ittihad Tripoli នៅលីប៊ី ក្លិប Caribe de San Sebastian នៅប្រទេសព័រតូរីកូ ក្លិប Indios de Mayaguez នៅប្រទេសព័រតូរីកូ ក្លិប Las Vegas Ramblers នៅសហរដ្ឋអាមេរិក ក្លិប Safilva Hokkkaido នៅប្រទេសជប៉ុន ក្លិប Volley Schonenwerd នៅប្រទេសស្វីស ក្លិប WWK Volleys Herrsching នៅប្រទេសអាល្លឺម៉ង់ ក្លិប VK CEZ Karloversko នៅសាធារណរដ្ឋឆេក និងក្រុមរបស់សាកលវិទ្យាល័យ Penn State University សហរដ្ឋអាមេរិក។

បើនិយាយពីសមិទ្ធផលវិញ កីឡាករ Jalen Penrose ធ្លាប់ឈ្នះជើងឯកចំនួន ១២ លើក និងពានឯកត្តជនចំនួន ៦ លើក។ សម្រាប់ពានរង្វាន់ឯកត្តជនទាំង ៦ គឺ ពានកីឡាករប្រយុទ្ធឆ្វេងល្អបំផុត ២ លើកនៅលីគបាល់ទះព័រតូរីកូ រដូវកាល ២០២៥-២៦ និង ២០២៤-២៥, ពានកីឡាករប្រយុទ្ធឆ្វេងល្អបំផុត ២ លើកក្នុងពាន National Volleyball Association នៅសហរដ្ឋអាមេរិក រដូវកាល ២០២៣-២៤ និងកាល ២០២២-២៣, ពានកីឡាករវាយសេវាល្អបំផុត ចំនួន ២ លើកគឺនៅលីគអាល្លឺម៉ង់ German Bundesliga រដូវកាល ២០១៩-២០ និងនៅពានរង្វាន់ NACC សហរដ្ឋអាមេរិករដូវកាល ២០១៧-១៨។

ពេលនេះ កីឡាករបានសម្រេចចូលរួមជាមួយ ក្រុមបាល់ទះស្នងការខេត្តស្វាយរៀង ដើម្បីប្រជែងជើងតេជោលីគ។ ឆ្លងកាត់ ២ លើកក្នុងតេជោលីគ រដូវកាលនេះ ក្រុមខេត្តស្វាយរៀង មាន ៦ ពិន្ទុ កំពុងឈរលើកំពូលតារាង បន្ទាប់ពីបានយកឈ្នះ ស្នងការខេត្តព្រះសីហនុ ៣-១ និងឈ្នះក្រុមកងពលធំអន្តរាគមន៍លេខ៣ ដោយលទ្ធផល ៣-០។

ក្រុមស្នងការខេត្តស្វាយរៀង កាលពីលើកមុនបានធ្វើឲ្យមានការភ្ញាក់ផ្អើលតាមរយៈការនាំចូលកីឡាករឥណ្ឌាដែលមានកម្ពស់ខ្ពស់ៗ ហើយពេលនេះនាំចូលកីឡាករអាមេរិក៕