កីឡា

បាល់ទាត់អាស៊ាន ជ្រើសរើស «ស្តាតមរតកតេជោ» ជាកន្លែងអបអរខួប ៣០ឆ្នាំ ពាន ASEAN Cup

បានផុស

១ minute មុន

នៅ

ថ្ងៃអង្គារ ២១ កក្កដា ២០២៦

ដោយ

សហព័ន្ធកីឡាបាល់ទាត់អាស៊ាន (AFF) បានសម្រេចជ្រើសរើសយក«ពហុកីឡដ្ឋានជាតិមរតកតេជោ»ជាកន្លែងរៀបចំការប្រកួតដើម្បីអបអរសាទរខួប ៣០ ឆ្នាំ ដែលពានរង្វាន់អាស៊ាន ASEAN Championship ត្រូវបានបង្កើតឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់ ASEAN Championship ត្រូវបានបង្កើតឡើងកាលពីឆ្នាំ ១៩៩៦ ដោយសហព័ន្ធកីឡាបាល់ទាត់អាស៊ីអាគ្នេយ៍។ ពានរង្វាន់នេះត្រូវបានរៀបចំការប្រកួតរាល់ ២ ឆ្នាំម្តងដែលចូលរួមប្រកួតដោយក្រុមបាល់ទាត់ជម្រើសជាតិជាសមាជិកអាស៊ានទាំង ១១ ប្រទេស។

ការប្រកួត ឆ្នាំ ២០២៦ គឺឈានដល់ឆ្នាំទី៣០ ដែលត្រូវបានរៀបចំជាពិសេស និងខុសប្លែកពីឆ្នាំមុនៗដើម្បីអបអរសាទរ។ ទី១ ការប្រកួតត្រូវបានផ្លាស់ប្តូរមករៀបចំពាក់កណ្តាលឆ្នាំជាលើកដំបូង។ រាល់លើកកាលពីមុន ការប្រកួតធ្វើឡើងនៅចុងឆ្នាំ និងឈានចូលដើមឆ្នាំ ប៉ុន្តែសម្រាប់ឆ្នាំ ២០២៦ នេះមករៀបចំនៅខែកក្កដា។

ទី២ ការប្រកួតរវាង ក្រុមបាល់ទាត់ជម្រើសជាតិកម្ពុជា និង សិង្ហបុរី វគ្គសន្សំពិន្ទុក្នុងពូល នៅថ្ងៃសុក្រ ទី២៤ ខែកក្កដា គឺជាការប្រកួតបើកឆាកមុនគេក្នុងព្រឹត្តិការណ៍ឆ្នាំ ២០២៦ ដូច្នេះសហព័ន្ធកីឡាបាល់ទាត់អាស៊ានបានសម្រេចយកការប្រកួតទី ១ នេះដើម្បីរៀបចំពិធីអបអរសាទរខួប ៣០ឆ្នាំ។

ដើម្បីរៀបចំពិធីអបអរសាទរឲ្យកាន់តែឱឡារិក សហព័ន្ធកីឡាបាល់ទាត់កម្ពុជា និង សហព័ន្ធកីឡាបាល់ទាត់អាស៊ាន បានសម្រេចជ្រើសរើសយក«ពហុកីឡដ្ឋានជាតិមរតកតេជោ»ដែលជាទីកន្លែងស្តង់ដាអន្តរជាតិដើម្បីរៀបចំពិធីបើកជាផ្លូវការ។

ពិធីអបអរសាទរនេះ មានការចូលរួមសម្តែងដោយ ព្រះនាង នរោត្តម ជេនណា និងតារាចម្រៀងលោក សុខ សម្បត្តិ ក្នុងនោះក៏មានការច្រៀងបទចម្រៀងកីឡាអាស៊ានគឺ«១២ប្រទេស ចង្វាក់បេះដូងតែមួយ (12 Nations, 1 Heartbeat)»។ ជាមួយគ្នានេះក៏មានការសម្តែងសិល្បៈវប្បធម៌ផ្សេងៗជាច្រើនទៀត។

សូមបញ្ជាក់ថា សំបុត្រចូលទស្សនាមានលក់តាមតេឡេក្រាម Mini App របស់សហព័ន្ធកីឡាបាល់ទាត់កម្ពុជា ដែលតំបន់ A មានតម្លៃ ១២,០០០រៀល និងតំបន់ B មានតម្លៃ ៨,០០០ រៀល។

សូមបងប្អូនប្រជាពលរដ្ឋ ចូលទស្សនាឲ្យបានច្រើនកុះករដើម្បីគាំទ្រដល់ក្រុមបាល់ទាត់ជម្រើសជាតិកម្ពុជា និងធ្វើឲ្យ កម្ពុជា ក្នុងនាមជាម្ចាស់ផ្ទះសម្រាប់ពិធីអបអរសាទរខួប ៣០ ឆ្នាំកាន់តែអស្ចារ្យ និងឱឡារិកឡើង៕