កីឡា

វិលត្រឡប់ពីចូលនិវត្តន៍ដោយសុខភាពមិនសូវរឹងមាំ សួន ចាន់ណារ៉ូ តស៊ូរហូតឈ្នះពានអន្តរជាតិជាថ្មី

បានផុស

៣៣ នាទី មុន

នៅ

ថ្ងៃអង្គារ ២១ កក្កដា ២០២៦

ដោយ

ដៃប៉ះសេចាស់វស្សា សួន ចាន់ណារ៉ូ បានឈ្នះពានកីឡាករលើកបាល់ល្អបំផុត បន្ទាប់ពីបានជួយឲ្យក្រុមបាល់ទះជម្រើសជាតិកម្ពុជា ឈ្នះជើងឯក SEA Volleyball Cup ឆ្នាំ ២០២៦ តាមរយៈជ័យជម្នះ ៣-១ លើឥណ្ឌូណេស៊ី នៅវគ្គផ្តាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអ្នកមាននៅចាំទេ សួន ចាន់ណារ៉ូ បានប្រកាសចូលនិវត្តន៍កាលពីថ្ងៃទី២១ ខែតុលា ឆ្នាំ២០២៤ បន្ទាប់ពីចាប់អាជីពកីឡាបាល់ទះអស់រយៈពេល១៥ឆ្នាំដោយបន្សល់ទុកស្នាដៃជាច្រើនដល់ក្រុមបាល់ទះជម្រើសជាតិកម្ពុជា និងក្លិប។

សួន ចាន់ណារ៉ូ បានចាប់ផ្តើមលេងបាល់ទះតាំងពីក្មេងជាមួយនឹងអំណោយផលកាយសម្បទាល្អគឺកម្ពស់១.៩០ម៉ែត្រ។ ឆ្លងកាត់ការលេងបាល់ទះក្នុងវ័យក្មេងជាច្រើនឆ្នាំតាំងពីក្រុមបាល់ទះបឋមសិក្សា រហូតដល់ក្រុមវិទ្យាល័យ រូបគេបានចាប់ផ្តើមចូលក្លិបអាជីពដំបូងគឺកងពលធំអន្តរាគមន៍លេខ៣ នៅឆ្នាំ២០១២ មុនពេលផ្លាស់ទៅក្រុមបាល់ទះសហភាពសហព័ន្ធយុវជនកម្ពុជាខេត្តព្រៃវែង ក្នុងឆ្នាំ២០១៧ ដែលក្រោយមកប្តូរឈ្មោះ ក្លិបបាល់ទះវិសាខា ។

ឆ្នាំ២០១៧ សួន ចាន់ណារ៉ូ ជួយឲ្យក្លិបវិសាខាឈ្នះមេដាយមាស ក្នុងព្រឹត្តិការណ៍កីឡាជាតិ, ឈ្នះជើងឯកពានរង្វាន់ស្រាបៀរកម្ពុជា និងឈ្នះជើងឯកពានរង្វាន់ស្រាបៀរលីអូ។ ឆ្នាំ២០២២ រូបគេបានជួយក្លិបវិសាខាឈ្នះជើងឯកពានរង្វាន់ Ganzberg Special Volleyball League ជាប្រភេទវិញ្ញាសាលេង៤នាក់ទល់នឹង៤នាក់។ នៅឆ្នាំដដែលនោះ រូបគេ បានជួយក្លិបបានឈ្នះជើងឯកពានរង្វាន់ សម្តេចអគ្គមហាសេនាបតីតេជោ ហ៊ុន សែន។

ឆ្នាំ២០២៣ សួន ចាន់ណារ៉ូ បានជួយក្លិបវិសាខាឈ្នះពានរង្វាន់ Wurkz Special Volleyball ជាការលេង៤នាក់ទល់នឹង៤នាក់ ព្រមទាំងទទួលបានចំណាត់ថ្នាក់លេខ ២ ពានរង្វាន់ឯកឧត្តមអភិសន្តិបណ្ឌិត ស សុខា និងទទួលបានចំណាត់ថ្នាក់លេខ ៤ ពានរង្វាន់ Johor Bahru Mayors Cup នៅប្រទេសម៉ាឡេស៊ី។

ក្រុមកម្ពុជា ឈ្នះមេដាយប្រាក់កីឡាស៊ីហ្គេម ឆ្នាំ ២០២៣

ឆ្នាំ២០២៤ គឺជាពេលវេលាដ៏អស្ចារ្យបំផុតសម្រាប់ សួន ចាន់ណារ៉ូ លេងឲ្យក្លិបវិសាខា។ រូបគេជាផ្នែកដ៏សំខាន់ជួយឲ្យក្លិបឈ្នះពានរង្វាន់អន្តរជាតិ Win+ Streak Cup នៅតៃវ៉ាន់ និងទទួលបានចំណាត់ថ្នាក់លេខ២ ពានរង្វាន់តេជោលីគ។

បើនិយាយពីជម្រើសជាតិកម្ពុជាវិញ សួន ចាន់ណារ៉ូ បានជាប់ក្នុងក្រុមបាល់ទះជម្រើសជាតិកម្ពុជា តាំងពីឆ្នាំ២០១៦។ រូបគេបានលេងក្នុងព្រឹត្តិការណ៍កីឡាស៊ីហ្គេម ៤ លើកជាប់គ្នាគឺឆ្នាំ២០១៧ ២០១៩ ២០២១ និង២០២៣។ ក្នុងនោះ រូបគេបានរួមចំណែកជាច្រើនសម្រាប់វិស័យបាល់ទះកម្ពុជា ជាពិសេសរូបគេបានជួយកម្ពុជាឈ្នះមេដាយសំរិទ្ធ ជាលើកដំបូង ពីកីឡាស៊ីហ្គេម ឆ្នាំ២០២១ និងឈ្នះមេដាយប្រាក់ កីឡាស៊ីហ្គេម ឆ្នាំ២០២៣។

ក្រុមកម្ពុជា ឈ្នះជើងឯក SEA V. League Challenge ឆ្នាំ ២០២៤

បន្ទាប់មក រូបគេបានជួយកម្ពុជាទទួលបានជ័យជម្នះក្នុងការប្រកួតមិត្តភាពអន្តរជាតិជាច្រើន និងទទួលបានចំណាត់ថ្នាក់លេខ ២ ពានរង្វាន់ Tri-Nation Cup 2023 នៅប្រទេសម៉ាឡេស៊ី ព្រមទាំងបង្ហាញខ្លួនជាលើកដំបូងក្នុងព្រឹត្តិការណ៍កីឡាទ្វីបអាស៊ី ឆ្នាំ២០២៣ នៅប្រទេសចិន។

អ្វីដែលកាន់តែពិសេសអស្ចារ្យថែមទៀតនោះ សួន ចាន់ណារ៉ូ ក្នុងនាមប្រធានក្រុម និងអ្នកប៉ះសេ បានជួយកម្ពុជាឈ្នះជើងឯកពានរង្វាន់អាស៊ានកម្រិតទី២ SEA V. League Challenge ឆ្នាំ២០២៤ និងបានឡើងទៅកាន់ពានរង្វាន់លំដាប់ទី១ SEA V. Cup នៅឆ្នាំ២០២៥។

ក្រុមកម្ពុជា ឈ្នះជើងឯក SEA V. Cup ឆ្នាំ ២០២៦

នៅថ្ងៃទី២១ ខែតុលា ឆ្នាំ២០២៤ សហព័ន្ធកីឡាបាល់ទះកម្ពុជាបានរៀបចំពិធីចូលនិវត្តន៍យ៉ាងឱឡារិកដោយមានវត្តមានលោក អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជា អ្នកឧកញ៉ា លាង ម៉េង ជាអ្នកឧបត្ថម្ភ កីឡាករជាមិត្តរួមក្រុម និងអ្នកគាំទ្រយ៉ាងច្រើន។ មូលហេតុចម្បងដែល សួន ចាន់ណារ៉ូ បានសម្រេចចូលនិវត្តន៍គឺដោយសារសុខភាពមិនអំណោយផល។ ទម្ងន់របស់កីឡាករកាន់តែឡើង ជាពិសេសឈឺចង្កេះពិបាកធ្វើឲ្យរូបគេបន្តការលេងកម្រិតអាជីព។

ទោះបីបានប្រកាសចូលនិវត្តន៍ពីជម្រើសជាតិ សួន ចាន់ណារ៉ូ នៅតែបន្តលេងឲ្យក្លិបក្នុងនោះរូបគេបានចូលរួមជាមួយ ក្រុមបាល់ទះស្នងការខេត្តស្វាយរៀង ក្នុងពានរង្វាន់សម្តេចក្រឡាហោម ស ខេង ឆ្នាំ ២០២៤ និងបានជួយឲ្យក្រុមឈ្នះជើងឯកថែមទៀត។ រូបគេក៏បានចូលរួមជាមួយក្រុមក្នុងការប្រកួតពានរង្វាន់តេជោលីគដែរ។

ក្រុមស្នងការស្វាយរៀង ឈ្នះជើងឯកសម្តេចក្រឡាហោម ស ខេង

ក្រោយគ្មានវត្តមានដៃប៉ះសេ សួន ចាន់ណារ៉ូ ក្រុមបាល់ទះជម្រើសជាតិកម្ពុជា ពិតជាជួបការលំបាកខ្លាំងមែនទែនក្នុងការចូលរួមប្រកួតពាន SEA V. Cup ជាលើកដំបូងកាលពីឆ្នាំ ២០២៥ ដោយចាញ់ទាំង ៨ ប្រកួតស្ថិតនៅបាតតារាង។ បញ្ហាប្រឈមធំបំផុតគឺអ្នកលើកបាល់ ដូច្នេះសម្រាប់ស៊ីហ្គេម ចុងឆ្នាំ ២០២៥ នៅសៀម សហព័ន្ធបាល់ទះកម្ពុជា បានកោះហៅឲ្យ សួន ចាន់ណារ៉ូ មកជួយជម្រើសជាតិជាថ្មី បើទោះបីជារូបគេមានសុខភាពមិនសូវល្អប្រសើរតាមកម្រិតអ្នកលេងអាជីពលើឆាកអន្តរជាតិក៏ដោយ។ រូបគេក៏បានសម្រេចមកជួយជម្រើសជាតិជាថ្មី ប៉ុន្តែដោយសារជម្លោះនៅព្រំដែន កីឡាកម្ពុជាមិនបានចូលរួមប្រកួត ស៊ីហ្គេម នៅសៀមទេ។

ឈានចូលដល់ ឆ្នាំ ២០២៦នេះទើប សួន ចាន់ណារ៉ូ បានបង្ហាញខ្លួនឲ្យជម្រើសជាតិផ្លូវការជាថ្មីក្នុងពានរង្វាន់ SEA V. Cup នៅប្រទេសហ្វីលីពីន។ វត្តមានរបស់ដៃប៉ះសេរូបនេះបានរួមចំណែកយ៉ាងធំធេងជួយឲ្យក្រុមបាល់ទះជម្រើសជាតិកម្ពុជា ឈ្នះ ឥណ្ឌូណេស៊ី ដោយរូបគេបានលេង ៥ សិតពេញ ដើម្បីគ្រងជើងឯក SEA V. Cup ជើងទី១ ជាលើកដំបូងនៅក្នុងប្រវត្តិសាស្ត្រ។ ជាមួយគ្នានេះ រូបគេក៏បានឈ្នះពានកីឡាករលើកបាល់ល្អបំផុតប្រចាំព្រឹត្តិការណ៍ថែមទៀត៕