កីឡា

អត្តពលិកតេក្វាន់ដូ WT កម្ពុជានឹងធ្វើការប្រកួតវគ្គជម្រុះកីឡាអូឡាំពិកតូក្យូទ្វីបអាស៊ី នៅហ្ស៊កដង់នាថ្ងៃទី២១-២២ ឧសភា

បានផុស

៥ years មុន

នៅ

ថ្ងៃអង្គារ ១១ ឧសភា ២០២១

ដោយ

កីឡាករ-កីឡាការិនីតេក្វាន់ដូ WT កម្ពុជាចំនួន២នាក់ ដែលចូលរួមការប្រកួតវគ្គជម្រុះកីឡាតេក្វាន់ដូ WT នៃព្រឹត្តិការណ៍ការប្រកួតកីឡាអូឡាំពិកតូក្យូទ្វីបអាស៊ី “Asia qualification Tournament for Tokyo 2020 Olympic Game ” នៅប្រទេសហ្ស៊កដង់នឹងធ្វើការប្រកួតជាផ្លូវការនាថ្ងៃទី២១-២២ ខែឧសភា ឆ្នាំ២០២១នេះ។

លោក ឆយ យ៉ុងសុក គ្រូបង្វឹកជម្រើសជាតិបានមានប្រសាសន៍ប្រាប់កម្ពុជាថ្មីឲ្យដឹងថា រូបលោក និងកីឡាករ វ៉ា មិថុនា នឹងធ្វើដំណើរចេញពីប្រទេសកម្ពុជានាថ្ងៃទី១៦ ខែឧសភា ឆ្នាំ២០២១វេលាម៉ោង១១.៥៥យប់ នឹងទៅដល់កន្លែងប្រកួតវគ្គជម្រុះកីឡាតេក្វាន់ដូ WT ផ្លូវការនាថ្ងៃទី១៨ ខែឧសភា ឆ្នាំ២០២១វេលាម៉ោង១០យប់ ដោយសារតែមេរោគ CIVOD-19 ជើង ហោះហើរមួយចំនួនត្រូវសម្រាក គ្រាន់តែលោក និងកីឡាកររង់ចាំជើងហោះហើរនៅប្រទេសកូរ៉េខាងត្បូងរយៈពេល១៩ម៉ោង ហើយពេលទៅដល់ព្រលានយន្តហោះប្រទេសហ្ស៊កដង់ ក៏បន្តដំណើរទៅកន្លែងប្រកួតទៀត។ លោកគ្រូបង្វឹកបន្តថា សម្រាប់ប្រភេទទម្ងន់កីឡាការិនីថិប កាសាន់ទ្រីនីកូល និងកីឡាករ វ៉ា មិថុនា យើងមិនទាន់ដឹងថា មានកីឡាករ-កីឡា ការិនីប៉ុន្មាននាក់ចូលរួមទេ ប្រហែលថ្ងៃទី១៩ ឬ ២០ទើបដឹង ពីព្រោះកីឡាករ វ៉ា មិថុនា ប្រកួតនៅថ្ងៃទី២១ រីឯកីឡាការិនី ថិប កាសាន់ទ្រីនីកូល ប្រកួតនៅថ្ងៃទី២១ ខែឧសភា។

សម្រាប់ទ្វីបអាស៊ីយើង គណៈកម្មការតេក្វាន់ដូ WTជ្រើសរើសយកតែ២នាក់ គឺកីឡាករ២នាក់ និងកីឡាការិនី២នាក់ ដោយមួយប្រភេទទម្ងន់មានកីឡាករ១៦នាក់ និងកីឡាការិនី១៦នាក់មានសិទ្ធិចូលរួមព្រឹត្តិការណ៍ការប្រកួតកីឡាអូឡាំពិកតូក្យូនៅប្រទេសជប៉ុន។

លោក គង់ សក្ខិដា អគ្គលេខាធិការរងនៃខេមរសហព័ន្ធតេក្វាន់ដូWTបានប្រាប់តាមប្រព័ន្ធអនឡាញថា លោកគ្រូ Tubbs Gregory Allan ជាគ្រូជំនួយ ចំណែកកីឡាការិនី ថិប កាសាន់ទ្រីនីកូល នឹងធ្វើដំណើរពីសហរដ្ឋអាមេរិកទៅប្រទេសហ្ស៊កដង់តែម្តង ដូច្នេះពួកគេនឹងជួបលោកគ្រូបង្វឹក ឆយ យ៉ុងសុក និងកីឡាករ វ៉ា មិថុនាមនៅទីនោះ។ លោកបានបន្តថា កម្ពុជាបញ្ជូនគ្រូបង្វឹក និង កីឡាករ-កីឡាការិនីចំនួន៤នាក់រួមមានលោក ឆយ យ៉ុងសុក ជាគ្រូបង្វឹក លោកគ្រូ Tubbs Gregory Allan ជាគ្រូជំនួយ ចំណែកកីឡាកា រិនី ថិប កាសាន់ទ្រីនីកូល កូនខ្មែររស់នៅសហរដ្ឋ អាមេរិកប្រកួតក្នុងប្រភេទទម្ងន់ក្រោម៥៧ គីឡូ ក្រាម និងកីឡាករ វ៉ា មិថុនា ប្រកួតក្នុងប្រភេទទម្ងន់ក្រោម៨០គីឡូក្រាម៕

អត្ថបទ៖ វិសិទ្ធ

សូមចុចអាន៖ ម្ចាស់ខ្សែក្រវាត់ទម្ងន់ធ្ងន់ Brandon Vera ប្រាប់ពីការទៅហាត់នៅអាមេរិក