កីឡា

AFC U19៖ សហព័ន្ធបាល់ទាត់អាស៊ី លើកទៅរៀបចំនៅខែមីនា ឆ្នាំ២០២១ ក្នុងប្រទេសអ៊ូបេគីស្ថានខណៈកម្ពុជា បន្តត្រៀមខ្លួន

បានផុស

៦ years មុន

នៅ

ថ្ងៃសុក្រ ១៣ វិច្ឆិកា ២០២០

ដោយ

សហព័ន្ធកីឡាបាល់ទាត់អាស៊ី (AFC) បានសម្រេចលើកពេលប្រកួតក្នុងវគ្គជម្រុះជុំចុងក្រោយក្នុងព្រឹត្តិការណ៍ពានរង្វាន់បាល់ទាត់យុវជនក្រោមអាយុ១៩ឆ្នាំ ប្រចាំទ្វីប AFC U-19 Championship 2020 ទៅខែមីនា ឆ្នាំ២០២១ខាងមុខ ក្រោយស្ថានភាពជំងឺកូវីដ-១៩ មិនទាន់ថមថយ ខណៈប្រទេសអ៊ូបេគីស្ថាន ទទួលធ្វើជាម្ចាស់ផ្ទះ។

តាមគម្រោងការប្រកួតនេះ គ្រោងរៀបចំឡើងពីថ្ងៃទី១៤ ដល់ថ្ងៃទី៣១ ខែតុលា ឆ្នាំ២០២០ ប៉ុន្តែដោយសារបញ្ហាជំងឺកូវីដ-១៩ ទើប AFC សម្រេចលើកទៅរៀបចំនៅថ្ងៃទី៣ ដល់ថ្ងៃទី២០ ខែមីនា ឆ្នាំ២០២១ ក្នុងទីក្រុងTashkent,Olmaliq, Namangan នៅប្រទេសអ៊ូបេគីស្ថាន។ ក្រុមយុវជនក្រោមអាយុ១៩ឆ្នាំរបស់កម្ពុជា ស្ថិតក្នុងពូល A ជាមួយក្រុមម្ចាស់ផ្ទះអ៊ូបេគីស្ថាន, អ៊ីរ៉ង់ និង ឥណ្ឌូណេស៊ី។ក្រៅតែពីពូលរបស់កម្ពុជា ពូលដទៃទៀតមានដូចជា ពូល B មាន កូរ៉េខាងត្បូង, ជប៉ុន, អ៊ីរ៉ាក់ និងបារ៉ែន ពូល C អារ៉ាបប៊ីតសាវឌីត, អូស្ត្រាលី, វៀតណាម និងឡាវ និងពូល D កាតា, តាជីគីស្ថាន, ម៉ាឡេស៊ី និងយេម៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Gyotoku Koji គ្រូបង្វឹកក្រុមយុវជនអាយុក្រោម១៩ឆ្នាំកម្ពុជា ធ្លាប់បានលើកឡើងថា៖« កម្ពុជា អាចជួបការលំបាកច្រើន ព្រោះកម្ពុជាស្ថិតនៅកម្រិតក្រោមគេក្នុងពូល ម្យ៉ាងកម្ពុជា មិនធ្លាប់មានបទពិសោធន៍ចូលរួមពីមុន ដែលជារឿងដ៏ពិបាកសម្រាប់ក្រុម ក្នុងការត្រូវតតាំងជាមួយក្រុម U19 ឥណ្ឌូណេស៊ី អ៊ូបេគីស្ថាន និងក្រុមចំណាត់ថ្នាក់លេខ២ នៅអាស៊ីគឺក្រុម U19 អ៊ីរ៉ង់ ដែលសុទ្ធតែជាក្រុមខ្លាំង និងមានអនុភាពជាងយើង»។

ម្យ៉ាងលោកក៏មានការបារម្ភខ្លាំង ចំពោះកីឡាករក្រោយសម្រាករយៈពេលយូរ ដោយសារវិបត្តិជំងឺកូវីដ-១៩ ដូចជាកម្លាំង និងស្មារតីរបស់កីឡាករម្នាក់ៗដែលងាយនឹងជួបបញ្ហា ប្រសិនបើការប្រមូលផ្ដុំមិនបានល្អ។ ដូច្នេះ ដើម្បីអាចឆ្លងវគ្គ ១៦ក្រុមចុងក្រោយបាន វាអាស្រ័យលើលទ្ធផលប្រកួតពីមួយប្រកួតទៅមួយប្រកួតរបស់កម្ពុជា ហើយអ្វីដែលអាចធ្វើបាន គឺការខំប្រឹងប្រែងឲ្យខ្លាំងគ្រប់ការប្រកួត ដើម្បីយកឲ្យបានលទ្ធផលល្អជូនកម្ពុជា។

គេចាំបានថា នេះគឺកៅអីឡើងទៅជុំផ្ដាច់ព្រ័ត្រ ជាលើកទី៤ ក្នុងប្រវត្តិសាស្ត្ររយៈពេល ៤៥ឆ្នាំចុងក្រោយ សម្រាប់ U-19 កម្ពុជា ខណៈការបង្ហាញខ្លួន៣ដងកន្លងមក គឺនៅឆ្នាំ១៩៦៣, លើកទី២ នៅឆ្នាំ១៩៧២ និងលើកទី៣ នៅឆ្នាំ១៩៧៤ ហើយគេហៅពានរង្វាន់នេះ ពានយុវជនអាស៊ី «AFC Youth Championship»៕

អត្ថបទ៖ ងិនលីម

សូមចុចអាន៖ សិក្ខាកាមកីឡាកាយសម្ព័ន្ធ១០រូប ទទួលបាននិទ្ទេសល្អ ក្នុងវគ្គបណ្ដុះបណ្ដាលបច្ចេកទេសគ្រូបង្វឹកកម្រិត១

Related Topics:កីឡាបាល់ទាត់